394
10 января 2020 в 10:29
2019 сылга VI ыҥырыылаах Ил Түмэн үлэтин түмүктэрэ
2019 сылга СӨ VI ыҥырыылаах Судаарыстыбаннай Мунньаҕа (Ил Түмэн) 8 пленарнай мунньаҕы уонна парламент Сэбиэтин 3 мунньаҕын ыытта, олорго 418 нуормалыыр правовой аакта ылылынна, ол иһигэр: 123 сокуон, онтон 7 тирэх, ону таһынан 295 уураах.
Саамай элбэх нуормалыыр правовой аакта судаарыстыба салайыытын, социальнай политика уонна наука, култуура, үөрэх, доруобуйа харыстабылын эйгэлэригэр, ону сэргэ бас билии уонна өрөспүүбүлүкэ экономическай сайдыытын боппуруостарыгар ылылынна.
2019 сылга ылыллыбыт 123 сокуонтан 74-дүн СӨ бар дьонун дьокутааттара киллэрдилэр – 60% (2018 сыл күһүҥҥү сессиятыгар – 36%).
Ылыллыбыт сокуоннар ахсааннарыгар маннык докумуоннары бэлиэтиир тоҕоостоох:
— Аҕа дойду Улуу сэриитин кэмигэр 1945 сыл балаҕан ыйын 3 күнүгэр диэри сокуоннай саастарын туолбатах гражданнарга – сэрии оҕолоругар социальнай өйөбүл дьаһалларын туһунан;
— Саха Өрөспүүбүлүкэтигэр элбэх оҕолоох дьиэ кэргэн статуһун туһунан;
— агропромышленнай комплекс үлэһиттэригэр санаторий-куруорт тэрилтэлэригэр чэпчэтиилээх путевкалары биэриигэ судаарыстыба өйөбүлүн туһунан;
— “Дьиэ кэргэн” өрөспүүбүлүкэтээҕи ийэ хапытаалын туһаныы хайысхаларын кэҥэтэр туһунан;
— СӨ сиригэр-уотугар бүтүннүүтүгэр физическэй сирэйдэртэн ирдэниллэр кыахтара суоҕунан билиниллибит нолуоктарга уонна пеняларга амнистияны биллэрэр туһунан;
— УСН (нолуок судургутутуллубут систиэмэтин) 5% уонна 10% кээмэйинэн намтатыллыбыт ставката дьайар болдьоҕун 2023 сыл ахсынньы 31 күнүгэр диэри уһатар туһунан;
— Арктика сиригэр олорооччу дьону тырааныспар нолуогуттан босхолуур туһунан;
— СӨ-гэр устудьуоннар этэрээттэрин үлэтин өйүүр туһунан;
— СӨ муниципальнай оройуоннарын (куорат уокуруктарын) бүддьүөтүнэн хааччыллыыларын тэҥнээһиҥҥэ дотациялары тыырыы саҥа методикатын туһунан.
Федеральнай сокуон 113 барыла көрүлүннэ, ону сэргэ Россия Федерациятын субъектарын сокуону таһаарар уорганнарын 10 сокуону көҕүлээһинэ уонна 22 ыҥырыыта көрүллэн өйөннө.
Сокуону көҕүлээһин бэрээдэгинэн Ил Түмэн РФ Госдуматыгар судаарыстыбаннай уонна муниципальнай наадыйыыны хааччыйыыга анаан табаардары, үлэлэри, өҥөлөрү атыылаһыы эйгэтигэр контракт систематын туһунан итиэннэ Дьиэ-уот коммунальнай хаһаайыстыбатын судаарыстыбаннай иһитиннэрэр систематын туһунан Федеральнай сокуоннарга уларытыылары таарыйар федеральнай сокуоннар барылларын киллэрдэ. Итини тэҥэ “Россия Федерациятын норуоттарын эпическэй нэһилиэстибэтин туһунан” федеральнай сокуон барыла уонна “Сир аннын туһунан” сокуоҥҥа лицензия ис хоһоонун уонна онно уларытыылары киллэрии боппуруостарыгар федеральнай сокуон барылыгар көннөрүүлэр киллэриллибиттэрэ.
Судаарыстыбаннай Мунньах (Ил Түмэн) үлэтин биир көрүҥүнэн парламент истиилэрин, бырабыыталыстыба чаастарын уонна “төгүрүк остуоллары” тэрийэн ыытыы буолар. VI ыҥырыылаах Судаарыстыбаннай Мунньах (Ил Түмэн) биир сыллаах үлэтин кэмигэр парламент былааннаммыт үлэтэ балачча күүһүрдэ, ол ыытыллыбыт тэрээһиннэр ахсааннара үүнүүтүгэр көстөр.
2019 сылга барыта 9 парламент истиитэ (ол иһигэр 2 аһаҕас истии), 36 бырабыыталыстыба чааһа уонна 39 “төгүрүк остуол” ыытылынна.
Ил Түмэн иһитиннэрэр-аналитическай управлениетын дааннайдарынан
