Комсомол 100 сылынан көлүөнэлэр көрсүһүүлэрэ

Көлүөнэлэр көрсүһүүлэрэ Ленинскэй комсомол Знамятын киллэрииттэн саҕа­ланна. Комсомол хамсааһынын ветераннара өрөс­пүүбүлүкэ комсомольскай тэрилтэтин Знамятын ыччат бэрэстэбиитэллэригэр туттардылар.
ЫБСЛКС 100 сылыгар анаммыт тэрээһиннэри бэлэмнээһиҥҥэ уонна ыытыыга тэрийэр кэмитиэт бэрэссэдээтэлэ, СӨ Баһылыгын уонна Бырабыыталыстыбатын дьаһалтатын салайааччы солбуйааччыта, 1990-1992 сс. Саха сиринээҕи ЫБСЛКС обкомун бастакы сэкирэтээрэ Евгений Федоров көлүөнэлэр көрсүһүүлэрин биэчэрин аста. Кини өрөспүүбүлүкэ үрдүнэн Комсомол үбүлүөйүгэр анаммыт араас көрүҥнээх тэрээһиннэр: көрсүһүүлэр, быыстапкалар, кэнсиэрдэр, фестиваллар, субуотунньуктар, ветераннар уонна ыччат кыттыытынан ЫБСЛКС дойду олоҕор историческай оруолун туһунан санаа атастаһыылара буолбуттарын бэлиэтээтэ.
ЫБСЛКС үлэтэ тохтуоҕуттан төһө да 27 сыл ааспытын, олох биир сиргэ турбатын иһин, көлүөнэлэр сибээстэрэ баар уонна ыччат бастыҥ үгэстэри салгыыр диэн Евгений Федоров итиннэ болҕомтону туһаайда. Ол курдук уопсай сыал туһугар кэлэктиип үлэтигэр комсомол бэртээхэй оскуоланан буолбута, үгүс үтүө дьону иитэн таһаарбыта. Кини РФ Президенэ Владимир Путин аныгы ыччат тэрилтэлэригэр ЫБСЛКС үгэстэрин туһаныыга туруорбут соруктара ситиһиллиэхтэригэр эрэнэрин эттэ.
Саха сирин Ил Дархана Айсен Николаев мустубут дьону бырааһынньыгынан эҕэрдэлииригэр, Опера уонна балет театрыгар ураты энергетика, ураты өрө көтөҕүллүү баарын, манна кэлбит дьону барыларын киэн туттуу уонна Комсомолга – ХХ үйэҕэ эрэ буолбакка, биһиги судаарыстыбабыт историятыгар ыччат саамай модун уопсастыбаннай хамсааһыныгар кыттыгастаах буолуу түмэрин эттэ.
Ил Дархан бэлиэтээбитинэн, дьон доҕор­дуу сыһыанын күүһүгэр эрэнии, бэйэ Ийэ дойдутугар бэриниилээх буолуу — бу Комсомол ииппит сыаннастара киниэхэ, кини үөлээннээхтэригэр олоххо олус суолталаах суолу ыйааччыларынан билигин да хаалаллар.
Айсен Николаев көлүөнэлэр утум­наһыыларын бөҕөргөтүү — бу уопсай суол­талаах кыһамньыбыт диэтэ. Өрөс­пүү­бү­лүкэ баһылыга эдэрдэр дьыалабыай көҕү­лээһиннэрэ, технологияларга сыста­ҕастара аҕа көлүөнэ сүүнэ үөрүйэхтэрин кытта бииргэ өрөспүүбүлүкэ, дойду сайдыытыгар улахан күүс буолар кыахтаахтарыгар болҕомтону туһаайда итиэннэ үгүс сыллаах комсомол уопутун туһанан, бары салааларга наставниктааһын хамсааһынын сайыннарарга көрсүһүү кыттыылаахтарын ыҥырда.
Ил Дархан комсомолецтар санааларын күүһүнэн уонна сыалы ситиһэр дьулуурдарынан, кинилэр өрөспүүбүлүкэҕэ улахан уларыйыылары таһаарбыт албан ааттаах дьыалаларынан Саха сирэ киэн туттарын бэлиэтээтэ.
Айсен Николаев комсомол хамсааһынын ветераннарын наҕараадалаата, СӨ Ил Дарханын Бочуотунай грамотатын ССТХГА доценыгар, 1985 с. Москваҕа буолбут ыччат уонна устудьуоннар ХII Аан дойдутааҕы фестивалларын делегата Акулина Поповаҕа, “Гражданскай килбиэн” бэлиэни Байкал-Амур магистралын тутуу ветераныгар Анатолий Руфовка туттарда.
РФ Федеральнай Мунньаҕар Федерация Сэбиэтин чилиэнэ, 1983-1986 сс. Саха сиринээҕи ЫБСЛКС обкомун бастакы сэкирэтээрэ Александр Акимов Федерация Сэбиэтин Бэрэссэдээтэлэ Валентина Матвиенко уонна Москваҕа, Москва уобалаһыгар олорор биир дойдулаахтарын аатыттан Ленин комсомолун үбүлүөйүнэн Саха сирин олохтоохторугар истиҥ эҕэрдэни тиэртэ.
Сенатор барыга-барытыгар хамсатар күүһүнэн ыччат саамай бөдөҥ тэрилтэтэ — Комсомол буолбутун санатта.
Александр Акимов: “Комсомол — бу мин дьылҕам, бу биһиги улахан историябыт, онуоха күндүтүк сыһыаннаһыах тустаахпыт”, — диэтэ.
Федерация Сэбиэтин чилиэнэ быйыл атырдьах ыйыгар Беркакиттан, Томмоттон Дьокуускайга диэри айаннаабыт “Комсомольская правда” агитпоеһын өйөөбүттэрин иһин өрөспүүбүлүкэ Баһылыгар уонна Бырабыыталыстыбатыгар махтанна. Ити айан кыттыылаахтара тимир суолу бастакы тутааччыларга обелиск туруохтаах сиригэр өйдөбүнньүк тааһы туруорбуттара.
Александр Акимов итини сэргэ оччотооҕу үүнэр көлүөнэҕэ Ийэ дойдуга таптал тыынын иитиигэ пионерия оруолун бэлиэтээтэ.
Сенатор “Комсомольскай албан аат” өй­дө­бүнньүк бэлиэнэн Саха сирин Ил Дарханын Айсен Николаевы, Ил Түмэн аппараатын салайааччы сүбэһитэ, СӨ норуотун хаһаайыстыбатын үтүөлээх үлэһитэ, комсомол ветерана Мария Яковлеваны, 1987-1990 сс. ЫБСЛКС обкомун бастакы сэкирэтээрэ, комсомол ветерана Валентин Никифоровы, 1984-1988 сс. ЫБСЛКС обкомун иккис сэкирэтээрэ Александр Власовы уо.д.а. наҕараадалаата.
Саха сирин ыччатын аатыттан Комсомол ветераннарын өрөспүүбүлүкэ волонтердарын кытта үлэлиир Киин активистката Анастасия Кобызева эҕэрдэлээтэ.
«Комсомол дьону түмэрин, кинилэри алтыһарга үөрэтэрин, киһиэхэ лидер хаачыстыбаларын үөскэтэрин уонна үрдүк сыаллары ситиһэргэ туһаайарын билэбин», — диэтэ кини уонна өрөспүүбүлүкэ, дойду уйгутун туһугар ыччат Комсомол үгэстэрин байытарыгар уонна харыстыырыгар эрэннэрдэ.
Сыана маастардара үөрүүлээх түгэн кыттыылаахтарыгар ыччат номоххо киирбит тэрилтэтин историятыгар анаммыт театрализованнай музыкальнай туруорууну бэлэхтээтилэр. Бу күн үгүс көлүөнэлэр таптыыр комсомольскай ырыалара дьиэрэйдилэр, оттон саала артыыстарга кыттыһан күргүөмүнэн ылласта.

Ил Түмэн пресс-сулууспата.
Василий КОНОНОВ хаартыскаҕа түһэриилэрэ.