01 марта 2019 в 18:28

Ыччат Парламенын саҥа састааба талылынна

Аан бастаан Ыччат парламена 2008 сыллаахха от ыйын 22 күнүгэр Ил Түмэн 193 №-дээх уурааҕынан тэриллибитэ. Эдэр парламентарийдар өрөспүүбүлүкэ ыччатын политикатын эйгэтигэр үлэлэрин ыытыахтара.

Дьиэ кэргэн, оҕо, ыччат, физическэй культура уонна спорт дьыалаларыгар сис кэмитиэт председателэ Михаил Гуляев олунньу 25 күнүгэр Ил Түмэҥҥэ VI ыҥырыылаах Ыччат парламенын саҥа састаабын бигэргэтэр мунньаҕы ыытта.

Норуот депутата Александр Сусоев иһитиннэрбитинэн, Ыччат парламенын VI ыҥырыылаах састаабыгар барыта 129 сайабылыанньа киирбититтэн 70 чилиэн талыллыбыт. Кандидаттар орто саастара 25, ол иһиттэн саамай аҕа саастааҕа — 30, эдэрэ — 17 саастаах. Саҥа талыллыбыт хамаандаҕа партиялар фракцияларын, куорат уонна өрөспүүбүлүкэ араас тэрилтэлэрин, улуус, куорат эргин уокуруктарын бэрэстэбиитэллэрэ киирдилэр. Урукку V ыҥырыылаах ыччат парламенын састаабыттан 4 кандидат собеседование ааһан оннунан хааллылар. Улуустарынан ыллахха, Абый, Аллайыаха, Мииринэй оройуоннарыттан уонна Эбээн Бытантайтан ураты бэрэстэбиитэлинэн өрөспүүбүлүкэ улуустарыттан саҥа састаапка бары киирдилэр. Саҥа састаапка киирэргэ тэрийэр хамыыһыйаҕа сайабылыаньа, анкета, портфолио, видео ролик уонна эссе бэриллибит, кандидаты талыы бэрээдэгэ 4 этабынан ыытыллыбыт. 9 киһилээх тэрийэр хамыыһыйаҕа психологтар уонна юристар үлэлээтилэр.
VI ыҥырыылаах Ыччат парламенын саҥа састаабын бэрэссэдээтэлинэн 5 кандидаттан талыллан, Уус Алдан улууһуттан төрүттээх, 2017 сыллаахтан “Синергия Севера” Уһук Илиҥҥи форум Президенэ, юрист үөрэхтээх Алексей Иннокентьев (@alexey_innokentev) 46 куолаһы ылан ананна.

Эдэр парламентарийдар чаҕылхай уонна суолталаах бырайыактары, саҕалааһыннары ыыталларын эрэнэ күүтэбит, сокуону оҥорор үлэҕэ бастакы хардыыларыгар ситиһиилэри баҕарабыт.

Василий ПРОКОПЬЕВ