Иван Кульбертиновка пааматынньыгы тутуу тула

СӨ Судаарыстыбаннай Мунньаҕын (Ил Түмэн) Бэрэссэдээтэлэ Петр Гоголев салайыытынан парламеҥҥа Аҕа дойду Улуу сэриитин аатырбыт снайпера И.Н.Кульбертиновка пааматынньыгы тутуу бырайыагын олоххо киллэрии боппуруоһугар мунньах ыытылынна.

Пааматынньык эскиһин оҥо­руу хаамыытын, туруохтаах миэстэтин быһаарыыны, бырайыагы үбүлээһини уо.д.а. дьүүллэһиигэ СӨ бырабыыталыстыбатын бэрэссэдээтэлин бастакы солбуйааччы Алексей Стручков, парламент бюджекка, үпкэ, нолуок уонна сыана политикатыгар, бас билии уонна приватизация боппуруостарыгар сис кэмитиэтин бэрэссэдээтэлэ Юрий Николаев, СӨ Арктика сайдыытыгар уонна Хоту сир норуоттарын дьыалаларыгар миниистирин бастакы солбуйааччы Сергей Неустроев, СӨ үлэҕэ уонна социальнай сайдыыга миниистирин солбуйааччы Афанасий Постников, ону сэргэ Дьокуускай куорат архитектураҕа уонна куораты тутуу политикатыгар управлениетын итиэннэ СӨ эбээннэрин Ассоциациятын бэрэстэбиитэллэрэ кыттыыны ыллылар.

Көрсүһүү кыттыылаахтара 2019 с. олунньуга пааматынньыгы тутууга анаммыт мунньах боротокуолун толорууну дьүүллэстилэр.

Үлэ уонна социальнай сайдыы миниистирин солбуйааччыта Афанасий Постников иһитиннэрбитинэн, өрөспүүбүлүкэ бырабыыталыстыбатын 2019 с. муус устар 30 к. дьаһалынан Кыайыы 75 сылын көрсүүгэ тэрээһиннэр былааннарыгар пааматынньыгы 2019 сылга тутуу киллэриллибит.

Арктика сайдыытыгар уонна Хоту сир норуоттарын дьыалаларыгар миниистири бастакы солбуйааччы Сергей Неустроев бүгүҥҥү күҥҥэ “УК Мечел-Майнинг” ХЭТ кытта аатырбыт снайперга пааматынньыгы оҥорууга кыттыһарын туһунан сөбүлэһии ситиһиллибитин эттэ. Ону таһынан, пааматынньыгы Чернышевскай уулуссатын 14-гэр туруорарга миэстэ талыллыбыт.

Ил Түмэн спикерэ Петр Гоголев “Саха сирин снайпера” диэн аан дойдуга бастыҥ бэргэн ытааччы быһыытынан дьоҥҥо барытыгар биллэр, олохсуйбут өйдөбүл суолтатын бэлиэтээтэ. «Биһиги снайпердарбыт – бу өрөспүүбүлүкэбит киэн туттуута, Саха сирин алмаастарын курдук, бренд диэххэ сөп. Итини сэргэ геройбутугар пааматынньыгы туруоруу бу өрөспүүбүлүкэ аҕыйах ахсааннаах төрүт олохтоох норуоттарын биир чаҕылхай бэрэстэбиитэлигэр ытыктабыл уонна билинии бэлиэтин быһыытынан, ону кытта Иван Кульбертиновы иккитэ Сэбиэскэй Сойуус Геройун аатыгар түһэрбиттэрин үрдүнэн, туох эрэ төрүөтүнэн киниэхэ ити ааты биэрбэтэхтэрин да иһин, манна сиэрдээх сыһыан баар буолуохтааҕын өйдүөх тустаахпыт. Онон бу боппуруоһу быһаарыыга эппиэтинэстээхтик сыһыаннаһан, туруоруллубут соругу дьоһуннук толоруохтаахпыт», – диэтэ кини.