543
28 сентября 2018 в 12:33
Александр Жирков — Саха сирин Бочуоттаах гражданина
Балаҕан ыйын 26 күнүгэр, үгэс быһыытынан Саха Өрөспүүбүлүкэтин Судаарыстыбаннаһын күнүн иннинэ, Саха сирин Баһылыгынан талыллыбыт Айсен Николаев наукаҕа, култуураҕа, үөрэхтээһиҥҥэ, медицинаҕа, тыа хаһаайыстыбатыгар, бырамыысыланнаска уонна оҥорон таһаарыы үлэтигэр ураты ситиһиилэрдээх биир дойдулаахтарбытыгар Россия Федерациятын уонна Саха Өрөспүүбүлүкэтин наҕараадаларын туттарда.
Саха сирин үрдүкү наҕараадатын – Саха Өрөспүүбүлүкэтин Бочуоттаах гражданинын аатын V ыҥырыылаах Судаарыстыбаннай Мунньах (Ил Түмэн) Бэрэссэдээтэлэ Александр Жирков өрөспүүбүлүкэ судаарыстыбаннаһын, парламентаризм института сайдыытыгар ыйааһыннаах кылаатын уонна өр сыллаах таһаарыылаах общественнай-политическай үлэтин иһин ылла.
СӨ Баһылыгын эбээһинэһин толорооччу Айсен Николаев, судаарыстыбаннай наҕараадалары туттарыы сиэрин-туомун аһарыгар, Саха сирин салалтатын уонна тус бэйэтин аатыттан бары ыҥырыллыбыт дьону өрөспүүбүлүкэ Судаарыстыбаннаһын күнүнэн эҕэрдэлээтэ. «Биһиги бары кыайыыларбыт уонна ситиһиилэрбит кэннигэр дьон тураллар – кинилэр бэйэлэрин үлэлэринэн төрөөбүт улуустарын уонна оройуоннарын, бэйэлэрин өрөспүүбүлүкэлэрин уонна Улуу Россияны албан аатырдаллар. Мин бүгүн бастыҥтан бастыҥнарга наҕараадалары туттарарбыттан муҥура суох киэн туттабын», – диэн бэлиэтээтэ кини.
Итини сэргэ өрөспүүбүлүкэ Бочуоттаах гражданинын аатын СӨ Наукаларын академиятын президенэ Игорь Колодезников ылла. Саха Өрөспүүбүлүкэтин үрдүкү наҕараадатынан – “Хотугу сулус” уордьанынан судаарыстыбаннай сулууспа ветерана, РФ Тас дойдуларга министиэристибэтин бочуоттаах үлэһитэ Иван Рожин наҕараадаланна.
