Арктика парламентарийдарын ассамблеятын тэрийэр туһунан этии киирдэ

Ил Түмэн спикерэ Петр Гоголев ахсынньы 30 күнүгэр өрөспүүбүлүкэ Арктика уонна Хоту сир аҕыйах ахсааннаах төрүт олохтоох норуоттарын дьыалаларыгар боломуочуйалаах уорганнар бэрэстэбиитэллэрин кытта көрүстэ.

Манна дьүүллэһии сүрүн тематынан Арктика сирин-уотун уонна Хоту сир аҕыйах ахсааннаах төрүт олохтоох норуоттарын сайдыытын боппуруостарыгар 2020 сылга былааннаныллар тэрээһиннэр буоллулар.
Көрсүһүүгэ өрөспүүбүлүкэ тас сибээстэргэ уонна өрөспүүбүлүкэ норуоттарын дьыалаларыгар миниистирэ Гаврил Кириллин, СӨ Арктика сайдыытыгар уонна Хоту сир норуоттарын дьыалаларыгар миниистир солбуйааччыта Михаил Погодаев, Хоту сир аҕыйах ахсааннаах төрүт олохтоох норуоттарын бырааптарыгар боломуочунай Лена Иванова, биллиилээх уопсастыбаннай деятель Анастасия Божедонова, старейшиналар Сэбиэттэрин бэрэссэдээтэлэ Вячеслав Шадрин, Хотугу форум толорооччу директора Дарьяна Максимова тыл эттилэр.
Ил Түмэн Хоту сир аҕыйах ахсааннаах төрүт олохтоох норуоттарын боппуруостарыгар уонна Арктика дьыалаларыгар сис кэмитиэтин бэрэссэдээтэлэ Елена Голомарева ааспыт сылга регион политикатын боппуруостарыгар уонна Хоту сир, Уһук Илин проблемаларыгар, чуолаан Хоту сир, Сибиир уонна Уһук Илин аҕыйах ахсааннаах норуоттарын бырааптарын көмүскээһин эйгэтигэр сокуоннары сүрүннээһиҥҥэ улахан үлэ ыытыллыбытын бэлиэтээтэ.
Кини 2019 сыл балаҕан ыйын 30 күнүгэр ЮАР Претория куоратыгар “ХНТ төрүт олохтоох норуоттар бырааптарыгар декларациятыгар сөп түбэһиннэрэн сиргэ быраап” диэн экспердэр семинардарыгар кыттан, ол иһигэр үгэс буолбут дьарыктарга анаан сири туһаныы туһунан дакылаат аахпытын иһитиннэрдэ.
Арктика уонна Хоту сир аҕыйах ахсааннаах төрүт олохтоох норуоттарын дьыалаларыгар Саха сирин боломуочуйалаах уорганнарын бэрэстэбиитэллэрэ Арктика парламентарийдарын норуоттар икки ардыларынааҕы Ассамблеятын тэрийэр туһунан этии киллэрдилэр. Оччоҕуна бу Ассамблея чилиэннэрэ түмсэн этиилэри көтөҕөр уонна араас боппуруостарга иһитиннэриилэри атастаһар кыахтаныахтара. Итини сэргэ норуоттар икки ардыларынааҕы таһымҥа Арктика сирин-уотун сайдыытын боппуруостарын сүрүннүүр штаб-квартираны Дьокуускайга тэрийэр туһунан этии эмиэ өйөбүлү ылла.
Бу көҕүлээһин быйыл буолуохтаах Хотугу Форум кэмигэр көтөҕүллүөхтээҕэ бэлиэтэннэ. Хотугу Форум толорооччу директора Дарьяна Максимова Хотугу Форум Ненецкэй автономнай уокурук Нарьян-Мар куоратыгар ыытылларын кэпсээтэ. Хотугу регионнар норуоттар икки ардыларынааҕы тэрилтэтигэр Россия Федерациятын 14 региона, Исландия (Акурейри куорат), АХШ (Аляска), Корея Өрөспүүбүлүкэтэ (Кангвон провинция), Финляндия (Лапландия) киирэллэр.
Ил Түмэн спикерэ Петр Гоголев мунньах түмүгүнэн оробуочай бөлөҕү тэрийэргэ уонна туһааннаах докумуоннары оҥорорго дьаһал биэрдэ. Этиилэри түмэн, ырытан баран Ил Түмэн Хоту сир аҕыйах ахсааннаах төрүт олохтоох норуоттарын боппуруостарыгар уонна Арктика дьыалаларыгар сис кэмитиэтигэр киллэриэх­тэрэ.