Бүлүү сүнньүн олохтоохторун этиитэ, туруорсуута — парламент көрүүтүгэр

Саха Өрөспүүбүлүкэтин Судаарыстыбаннай Мунньаҕын (Ил Түмэн)  VI ыҥырыытын улахан делегацията тохсунньу 19 күнүттэн саҕалаан, тохсунньу 23 күнүгэр диэри Бүлүү бөлөх улуустарыгар сылдьан, бу эҥэр олохтоохторун кытта көрүстэ. Улахан делегацияны өрөспүүбүлүкэ парламенын бэрэссэдээтэлэ Петр Гоголев салайан илдьэ сырытта. 

Парламент делегацията Ньурба, Сунтаар, Үөһээ Бүлүү, Бүлүү улуустарынан эрдэттэн бигэргэммит былаанынан сылдьан, олохтоохтору, ветераннары,  депутаттары, улуустар актыыптарын, тэрилтэлэр салайааччыларын, баһылыктары кытта көрсүһүүлэри оҥордулар, хаһаайыстыбаннай, социальнай тэрилтэлэр үлэлэрин-хамнастарын кытта  билистилэр.

Парламент бэрэссэдээтэлэ Петр Гоголев бу эҥэр улуустар олохтоохторун, депутаттарын кытта көрсөн, кинилэр санааларын, толкуйдарын, кыһалҕаларын кытта билсэн уонна ону кытта туруорсууларын, кыһалҕаларын быһаарыыга сокуону оҥорор, бэрэс­тэбиитэллээх былаас хайдах гынан үлэлэһэр суолларын тобулан, көдьүүстээх үлэни тэрийии  буолар диэн ыытыллыбыт көрсүһүүлэргэ бэлиэтээн эттэ. Кини ону тэҥэ улуустарга ситэриилээх былаас уорганнара туруоруллубут соруктары хайдах толорон иһэллэрин, инникитин торумнанар бырайыактары ситэриигэ туох наадатын билсистибит уонна онуохаҕа былаас икки салаата —  бэрэстэбиитэллээх уонна ситэриилээх  былаастар өрөспүүбүлүкэ дьонун-сэргэтин олоҕун хаачыстыбатын тупсарыыга биир хайысханан, көдьүүстээхтик үлэлиир суолларын тобулуу биһиги   сүрүн сорукпутунан буолар диэтэ.

5 күн устата Ил Түмэн бэрэссэдээтэлэ уонна депутаттар уопсайа 4 улууска сырыттылар, 4 улуус кииннэригэр, ону таһынан Сунтаарга Сиэйэ, Элгээйи, Аллаҥа, Үөһээ Бүлүүгэ Өргүөт, Хоро, Бүлүүгэ Кыадаҥда, Тааһаҕар нэһилиэктэригэр уонна Кыһыл-Сыыр бөһүөлэгэр, ол иһигэр: 17 социальнай тэрилтэҕэ, оскуолаларга, оҕо садтарыгар, доруобуйа харыстабылын тэрилтэлэригэр; 9 хаһаайыстыбаннай тэрилтэҕэ, 6 тутулла турар объектарга, 4 улуус хаһыаттарын редакцияларын кытта көрсүһүү, 4 улуус киинигэр актыыбы кытта улахан мунньахтар, нэһилиэктэргэ, тэрилтэлэргэ 5 көрсүһүү ыытыллан, 6 музейга, 1 культурнай тэрээһиҥҥэ (спектакль) сылдьан, уопсайынан, хас эмэ тыһыынчанан киһини хаптылар.

Петр Васильевич 2018 сыл балаҕан ыйын 9 күнүгэр талыллыбыт Ил Түмэн саҥа састааба маҥнайгы күнүттэн үлэтин аһаҕастык, дьэҥкэтик ыытыаҕа диэн норуокка мэктиэлээн турар диэн санатта. Ону тутуһан уонна толорон, бу сылга үктэнэн баран тохсунньу ыйга   өрөспүүбүлүкэ парламена маннык улахан делегациянан Бүлүү эбэ сүнньүн улуустарыгар  үлэлиир сырыыны оҥоробут. Бу 5 күннээх үлэбит түмүгүнэн,эһиги туруорсууларгытынан салгыы үлэлиэхпит, хас биир пуунунан ситэриилээх былаас уорганнарын толорууларын көрүөхпүт, хонтуруолга ылыахпыт. Олохтоох бэйэни салайыныы хайысхатынан уонна улуустар туруорар боппуруостара элбэх киирбитинэн уонна сытыытык туралларынан сибээстээн, үөрэтэн көрөн баран, олунньу ый бастакы аҥарыгар Ил Түмэн олохтоох бэйэни салайыныы боппуруостарыгар сис комитетын бэрэссэдээтэлэ Василий Александрович Местниковы, сис комитет специалистарын  бөлөҕүн Бүлүү бөлөх улууска командировкалыахпыт, бары боппуруостарынан хоруйдары ыытыахпыт. Бүлүү өрүс киртийиитин,экологическай саахал тахсыытын туһунан боппуруос Ил Түмэн уочараттаах V пленарнай мунньаҕар көрүүгэ киириэҕэ, онно депутаттар быһаарыы ылыныахтара  диэн парламент бэрэссэдээтэлэ быһаарда.

Бүлүү бөлөх улуустарыгар Ил Түмэн делегациятын састааба

Ил Түмэн бэрэссэдээтэлэ П.В. Гоголев, Ил Түмэн сис комитеттарын бэрэссэдээтэллэрэ Ф.В. Габышева, В.М. Прокопьев, Я.А. Ефимов, В.И. Чичигинаров, А.Ю. Николаев, Ил Түмэн депутаттара С.М. Березин, А.В. Гоголев, Нь.Ф. Захарова, Ил Түмэн аппаратын эппиэттээх үлэһиттэрэ.
Ону таһынан СӨ Бырабыыталыстыбатыттан: миниистирдэр солбуйааччылара Н.В. Додохов, В.Д. Романов, Н.Г. Шепелев, П.И. Кушкирин, М.М. Прокопьев; отделлар салайааччылара А.А. Эверстова, А.Д. Петров.

Ньурбаҕа, Сунтаарга, Үөһээ Бүлүүгэ, Бүлүүгэ, нэһилиэктэргэ, тэрилтэлэргэ  бары көрсүһүүлэргэ тыл эппит, туруорсубут дьон  Ил Түмэн маннык улахан,элбэх сас­тааптаах делегациятын кэлиитэ кэмигэр саамай сөптөөх уонна эрэли үөскэтэр диэн махталларын биллэрдилэр.  Бүлүү сүнньүн олохтоохторо Ил Түмэн делегациятын иннигэр сүрүннээн туруорсууларын билиһиннэрдэххэ: 2018 сылга атырдьах ыйыгар Бүлүү өрүһүн киртийиитин боппуруоһугар, айылҕаны чөлүгэр түһэриигэ, промышленнай тэрилтэлэр айылҕаҕа хоромньуну таһааралларын иһин кинилэргэ эппиэтинэс, эбэһээтэлистибэ сүктэриллэрэ наада; Бүлүү өрүһүн кытылынан олохсуйбут нэһилиэнньэлээх пууннарга ыраас иһэр уунан хааччыйыы боппуруоһун быһаарыы;  нэһилиэнньэ доруобуйатыгар охсуу ыларынан, улуустарга балыыһалар тутууларын үбүлээһинин көрөргө; Сунтаар-Ньурба-Үөһээ Бүлүү-Бүлүү хайысхатынан үрдүк күүрүүлээх 220 кВт кыамталаах Л-104 линияны туттарыыны түргэтэтии, туттарыллар үүт сыанатын 35 солкуобайтан 50 солк. диэри үрдэтэргэ  уо.д.а.

Өрөспүүбүлүкэ Судаарыстыбаннай Мунньаҕын (Ил Түмэн) делегациятын Бүлүү бөлөх улуустарынан сырыытын туһунан матырыйаалы аныгыскы нүөмэрдэргэ ааҕыҥ.

Алексей МАТВЕЕВ