515
23 ноября 2018 в 11:42
Чульман бөһүөлэгин уунан хааччыйыы долгутар
Сэтинньи 22 к. парламент спикерэ Петр Гоголев салайааччылаах Ил Түмэн делегацията Нерюнгри оройуонугар үлэлиир сырыытын кэмигэр олохтоохтор Чульман бөһүөлэгин уунан хааччыйыыны кытта сибээстээх проблемалары иһитиннэрдилэр.
Бөһүөлэги ыраас иһэр уунан хааччыйыы боппуруоһа бэҕэһээ эрэ үөскээбэтэҕэ. Чульман дьаһалтатын баһылыга Сталик Дерягин эмиэ маннык кыһалҕа Серебрянай Бор бөһүөлэгэр баарын эттэ.
«Биһиги бөһүөлэкпит сааһа 90, урут тутуллубут олорор дьиэ ахсаанын учуоттаан, артезианскай скважиналар үүттэммиттэрэ ыраатта. Онтон БАМ тутааччылара кэлэн, эмиэ дьиэлэри туппуттара, скважиналары үүттээбиттэрэ. Барыта 10 скважина баар, ол эрээри онтон ылыллар уу хаачыстыбата балайда мөлтөөтө», — диэтэ баһылык.
Нерюнгритааҕы ГРЭС сэрэппитинэн, ууга тимир састааба элбээбит. Олохтоох гидрогеологтар санааларынан, уу састааба уларыйыыта айылҕаҕа тахсар көстүүлэри кытта сибээстээх. Тимир састааба үрдүгүттэн уу болоорхой өҥнөөх, киһи иһэригэр тимир амтана кэлэр. Күн аайы боруобалары ылан Нерюнгритааҕы эпидемиология уонна гигиена киинигэр баар лабораторияҕа чинчийиигэ анаан ыыталлар.
«Хомойуох иһин, Чульмаҥҥа кыраантан түһэр уу хаачыстыбата САНПИН нуормаларыгар сөп түбэспэт – тимиргэ ПДК 2 төгүл кэриҥэ улахан. Онуоха үлэ профильнайа суох көрүҥэ диэн ааттаан, Нерюнгритааҕы ГРЭС Чульмаҥҥа ууну бэлэмнээһининэн дьарыктаныа суоҕа, станция салалтата ситимнэри уонна носуостары муниципалитекка биэрэр», — диир Сталик Дерягин.
Депутаттарга кэпсээбиттэринэн, Чульмаҥҥа баар скважиналар бары бөһүөлэк туһааннаах микро-оройуонугар сыһыарыллыбыттар. “Бүгүн биһиги иннибитигэр уунан хааччыйар тус-туһунан объектары барыларын биир системаҕа холбуур сорук турар. Өрөспүүбүлүкэ народнай депутаттарын көмөлөрүнэн биһиги үтүө түмүктэри ситиһиэхпит диэн олус эрэнэбит, муниципалитеттар бары кыһалҕаларын кытта соҕотох туран хаалаллара табыллыбат», — диэтэ бөһүөлэк баһылыга.
