Эппиэтинэс хас эмэ төгүл улаатар

Саха сирин норуоттарын VIII спортивнай оонньууларын көрсө

Уус-Алдан улууһа спортивнай оонньуулар историческай миэстэлэринэн буоларын бэлиэтиибин. Ол курдук, 1996 сыллаахха аан маҥнайгы Саха сирин норуоттарын спортивнай оонньуулара Бороҕоҥҥо үрдүк тэрээһиннээхтик ыытыллыбытын үгүстэр өйдүүр буолуохтааххыт. Оччолорго «Мүрү саһарҕата» хаһыакка үлэлиирим. Күннээҕи күрэхтэһиилэр түмүктэринэн тута, түүннэри хаһыат таһаарарбыт. Дьон-сэргэ наһаа да өрө көтөҕүллүбүтүн бу баар курдук өйдүүбүн. Чахчы улахан спорт бырааһынньыга этэ.

Саҥа дьыл бырааһынньыгын эрэ иннинэ өрөспүүбүлүкэ Ил Дархана Айсен Николаев тэрийэр кэмитиэт туһунан уураахха илии баттаабыта. Тустаах кэмитиэт бэрэссэдээтэллэринэн бырабыыталыстыба бэрэссэдээтэлин солбуйааччы Ольга Балабкина уонна Ил Түмэн бэрэссэдээтэлин бастакы солбуйааччы Александр Жирков анаммыттара.

Бөдөҥ тэрээһиннэр хайдах быһыылаахтык ыытыллыылара, ситимнээх бэлэмнэнии үлэттэн улахан тутулуктаах. Тэрийэр кэмитиэт уһата-кэҥэтэ барбакка, кыһыҥҥы уһун сынньалаҥнар саҕаланыахтарын эрэ иннинэ Бороҕоҥҥо көһө сылдьар мунньаҕы ыыппыта.

Тустаах кэмитиэт чилиэннэрэ бастаан Бороҕон, Чараҥ, Мындааба сэлиэнньэлэрин спортивнай объектарын туруктарын көрдүлэр-иһиттилэр.

Көһө сылдьар мунньаҕы Ил Түмэн бэрэссэдээтэлин бастакы солбуйааччы Александр Жирков салайан ыытта. Бөдөҥ политикпыт Александр Николаевич үгүс ахсааннаах өрөспүүбүлүкэ, норуоттар икки ардыларынааҕы таһымнаах бөдөҥ тэрээһиннэри саталлаахтык тэрийбитин, салайбытын билэбит.

Кини мунньаҕы аһарыгар: «Ааспыт сайын от ыйын 27 күнүгэр өрөспүүбүлүкэ Ил Дархана Айсен Николаев Саха сирин норуоттарын VIII спортивнай оонньууларын 2022 сыл от ыйын 4-9 күннэригэр Уус-Алдан улууһугар ыытар туһунан Ыйааҕы таһаарбыта. Бүгүҥҥү көһө сылдьар мунньах боротокуолунан ыытар үлэбит сүрүн хайысхаларын быһаарыахпыт. Ол кэнниттэн чопчу салааларынан спортивнай оонньууларга бэлэмнэнии үлэтин ыытыахпыт», — диэн эттэ.

Спорт уонна физическэй култуура миниистирэ Иннокентий Григорьев спортивнай оонньууларга барыта 16 көрүҥ киирбитин, кыттааччы ахсаана 4800 тиийиэҕин, күрэхтэһии үс түһүмэҕинэн, үс бөлөҕүнэн барыаҕын туһунан эттэ. Кини ыалдьыттары ханна түһэрэр уонна аһылыгы тэрийии боппуруостарын таарыйда.

Уус-Алдан улууһун баһылыга Алексей Федотов Саха сирин норуоттарын бастакы спортивнай оонньуулара Бороҕон сэлиэнньэтигэр ыытыллыбытын, өрөспүүбүлүкэҕэ эмиэ маҥнайгынан улууска 2012 сылы Спорт сылынан биллэрбиттэрин аҕынна. Ити сыл улууска алта спортивнай саала тутуллан үлэҕэ киирбитэ. Бу ситиһиинэн тохтоон хаалбаккалар, миэстэтигэр маассабай спорт сайдыытыгар салалта өттүттэн болҕомто уурулларын, дьарыктанааччылар ахсааннара эбиллэн иһэрин (нэһилиэнньэ 42%), үгүс спортивнай күрэхтэһиилэр ыытыллалларын баһылык бэлиэтээтэ.

Улууска спорт араас көрүҥэ сайдарын тэҥэ, спортивнай федерациялар ахсааннара эбиллэн иһэр эбит. Ол курдук, күн бүгүн миэстэтигэр 16 федерация тэриллэн үлэлии-хамсыы олорор. Биллэрин курдук, 2018 сыл түмүгүнэн улуус мадьынылара бэһис төгүлүн өрөспүүбүлүкэ мас-рестлиҥҥэ федерациятын кубогын хаһаайыннарынан буолбуттара. Майаҕатта Бэрт Хара, Күүстээх Уйбаан, Мас Мэхээлэ курдук кыахтаах, күүстээх-уохтаах өбүгэлэрин туйахтарын хатара сылдьалларын Саха сирин олохтоохторугар көрдөрбүттэрэ.

Маны таһынан улуус спортсменнара өрөспүүбүлүкэҕэ остуол тенниһин күрэхтэһиитигэр уонна национальнай ыстаныыларга иккис бириистээх миэстэҕэ тиксибиттэрэ. Оттон мини-футболга үһүс миэстэ буолбуттара. Үс спортсмен норуоттар икки ардыларынааҕы маастар нуорматын толорбута.

Алексей Федотов спортивнай оонньууларга спортсменнары бэлэмнээһиҥҥэ сыаллаах-соруктаах үлэ барарын ыйда. Кини тустаах тэрээһиҥҥэ бэлэмнэнии үлэтигэр анаан улуустааҕы хамыыһыйа тэриллибитин туһунан эттэ. Баһылык инникитин спортивнай оонньууларга тутуллар объектар улууска маассабай спорду уонна чөл олоҕу сайыннарыыга сулууспалыахтарыгар эрэнэрин биллэрдэ. Кини 1996 сыллаахха тутуллубут «Майаҕатта Бэрт Хара» стадион уонна үгүс спортивнай объектар билиҥҥи ирдэбиллэргэ эппиэттээбэттэрин, тутуулар ороскуоттарын өрөспүүбүлүкэ бюджетыгар киллэрэр туһунан эттэ. Хас даҕаны итинник спортивнай оонньуулары ыыппыт улуустарга сылдьаннар, тутуулары, инфраструктура сайдыытын көрбүттэрин-истибиттэрин бэлиэтээтэ. Алексей Федотов: «Улуус олохтоохторо үрдүк таһымнаах спортивнай оонньуулары ыытарга бэлэммит», — диэн этиитин түмүктээтэ.

Мүрү нэһилиэгин баһылыга Василий Аммосов Бороҕон сэлиэнньэтин уулуссаларын асфальтааһын наадатын, бэлэмнэнии үлэ хайы-үйэ саҕаламмытын туһунан эттэ. Кини ыраас уу боппуруоһун таарыйда. Нэһилиэк олохтоохторо бэйэлэрин күүстэринэн алта спортивнай площадка тутаннар, үлэҕэ киллэрбиттэрин ахтар наадалаах дии саныыбын.

Өрөспүүбүлүкэ профсоюзтарын Федерациятын бэрэссэдээтэлэ Николай Дегтярев Саха сирин ахсыс спортивнай оонньууларыгар паралимпийскай уонна сурдлимпийский, адаптивнай спорт көрүҥнэрэ киллэриллибэтэхтэрэ төрдүттэн сыыһатын эттэ. Кырдьык, адаптивнай спордунан дьарыктанааччы спортсменнарбыт дойду, норуоттар икки ардыларынааҕы, аан дойду араас күрэхтэһиилэригэр, сурдлимпийскай оонньууларга ситиһиилээхтик кытталларын бары бэркэ диэн билэбит.

Ил Түмэн физическэй култуураҕа, спортка уонна ыччат дьыалаларыгар сис кэмитиэтин бэрэссэдээтэлэ Михаил Гуляев бириэмэ олус түргэнник ааһарын, улуус, нэһилиэк салалтата нэһилиэнньэни түмэр, көҕүлүүр үлэни хайдах ыытарыттан күрэхтэһии хайдах барара улахан тутулуктааҕын туһунан сөптөөх ыйыыны-кэрдиини оҥордо. Кини спортивнай оонньуулар аҥаардас биир улуус эрэ буолбакка, өрөспүүбүлүкэ бүттүүнүн интэриэһэ буолалларын туһунан эттэ.

Ил Түмэн депутата Юрий Баишев сырыы ахсын спортивнай оонньуулар, онно тутуллар объектар тупсан-сайдан иһиэхтээхтэрин, манна нэһилиэнньэ оруола улаханын туһунан эттэ. Холобурга Үөһээ Бүлүү улууһун аҕалла.

Тэрийэр кэмитиэт көһө сылдьар мунньаҕын түмүгэр бастакы вице-спикер Александр Жирков Саха сирин норуоттарын VIII спортивнай оонньууларын ыытыллыылара, Саха АССР төрүттэммитэ 100 сыллаах үбүлүөйүгэр сөп түбэһэринэн сибээстээн, эппиэтинэс хас эмэ улаатарын тоһоҕолоон бэлиэтээтэ.

Людмила НОГОВИЦЫНА.