Ил Түмэн делегацията — Хабаровскайга

Петр Гоголев Хабаровскай кыраай Думатын 25 сылын бэлиэтээһиҥҥэ кыттар

Парламент бэрэссэдээтэлэ Петр Гоголев баһылыктаах Ил Түмэн делегацията кулун тутар 28-30 күннэригэр Хабаровскайга үлэлиир, диэн Ил Түмэн пресс-сулууспата иһитиннэрдэ.

Кулун тутар 28 к. өрөспүүбүлүкэ народнай депутаттара Петр Гоголев, Сергей Никонов, Ил Түмэн аппараатын тэрийэр управлениетын начальнига Айана Другина, өрөспүүбүлүкэтээҕи саллааттар ийэлэрин кэмитиэтин бэрэстэбиитэлэ Мария Емельянова уонна Педагогическай институт 3 курсун устудьуона Иннокентий Тарабукин Князе-Волконское бөһүөлэгэр хас да байыаннай чааска сылдьан, Саха сириттэн сулууспалыыр саллааттары уонна чаастар салайааччыларын кытта көрсүөхтэрэ.
Бу күн Хабаровскайга кыраай Сокуону таһаарар Думата төрүттэммитэ 25 сылыгар анаммыт тэрээһиннэргэ Уһук Илиҥҥи федеральнай уокурукка киирэр регионнар делегацияларын кытта көрсүһүү тэриллэр.
Кулун тутар 29 к. кыраайдааҕы музыкальнай театр кэнсиэрдиир саалатыгар Хабаровскай кыраай судаарыстыбаннай былааһын сокуону таһаарар (бэрэстэбиитэллээх) уорганын үбүлүөйүгэр анаммыт үөрүүлээх мунньах буолуоҕа. Приморскай, Забайкальскай кыраайдартан, Камчаткаттан, Амурскай уонна Еврейскай автономнай уобаластартан, ону сэргэ Саха Өрөспүүбүлүкэтиттэн регионнар парламеннарын делегациялара Хабаровскайдааҕы кэллиэгэлэрин эҕэрдэлии кэлиэхтэрэ.
Хабаровскай кыраай Думатын маҥ­найгы мунньаҕа 1994 сыл кулун тутар 31 к. буолбута. 25 сыл устатыгар бу региоҥҥа бэрэстэбиитэллээх уорган атаҕар турда, кыраай сайдыытыгар парламентаризм оруола үрдээтэ.

Үйэ чиэппэрэ депутаттар куорпустара Хабаровскай кыраай социальнай-экономическай уонна уопсастыбаннай-политическай сайдыытын үгүс боппуруостарын быһаарыыны түргэтэппит тыын суолталаах сокуоннары ылыныыга үлэлээтэ. Кинилэр ыллыктаах уонна чопчу быһаарыылары ылыммыттарын түмүгэр сокуон аакталарыгар кыраай олохтоохторун интэриэстэрэ көдьүүстээхтик тыктарылыннылар, уопсастыба сыһыаннаһыыларын араас эйгэлэригэр сокуону оҥоруу тупсарылынна.
Хабаровскай кыраай Сокуону таһаарар Думатын Бэрэссэдээтэлэ Сергей Луговской бэлиэтээбитинэн, регионнааҕы сокуоннар үгүстэрэ социальнай хайысхалаахтар, олор олох хаачыстыбатын уонна кыраай олохтоохторун уйгутун үрдэтии суолталаах соруктарын быһаарарга тирэх буолаллар.
«Правовой механизмнары үөскэтиигэ уонна олохтоох салайыныы бэрэстэбиитэллээх уорганнарын, ыччат түмсүүлэрин, уопсастыба институттарын кытта хардарыта үлэни олохтооһуҥҥа үлэ саҥа көрүҥнэрэ сайдыыны ыллылар», — диэн кыраай парламенын спикерэ туһаайан эттэ.
«Хабаровскай кыраай Сокуону та­һаарар Думатын депутаттара “Уһук Илин уонна Забайкалье” Парламеннар ассоциацияларын үлэтигэр кылааттара ыйааһыннаах. Регионнар сокуону көҕүлээһиннэрин хаачыстыбатын үрдэтиигэ, федеральнай сокуоннары тупсарыыга кинилэр оруолларын күүһүрдүүгэ Ассоциация Россия Федерациятын 11 субъегын сокуону таһаарар уорганнара бииргэ үлэлээһиннэрин бөҕөргөтөр кыахтанна», — диэн бэлиэтиир Луговской.
Кини салгыы эппитинэн, тус көрсү­һүүлэргэ, гражданнар туруорсууларын кытта үлэлиир кэмнэригэр быыбардааччылары кытта аһаҕас уонна ыллыктаах кэпсэтии түмүгэр парламентарийдар сокуону оҥоруу үлэтигэр көннөрүүлэри киллэрэр уонна нэһилиэнньэҕэ социальнай суолталаах боппуруостары кэмигэр быһаарар кыахтаналлар.