Ил Түмэн делегацията – Нерюнгри оройуонугар

Делегация сырыытын бырагырааматыгар – Чульман, Серебрянай Бор, Беркакит, Золотинка, Иенгра нэһилиэнньэлээх пууннарыгар объектарга сылдьыы, муниципальнай оройуон администрациятын салайааччыларын, поселениелар баһылыктарын уонна депутаттарын, бырамыысыланнаас уо.д.а. тэрилтэлэрин салайааччыларын кытта көрсүһүүлэр.

Чульман бөһүөлэгэр Петр Гоголев уонна норуот депутаттара Кошевой уонна Свердлов уулуссаларын тиксиһиитигэр тутуллубут дьиэлэри көрүөхтэрэ, “Колмар” таас чох хостуур хампаанньа өрөмүөннүүр-механическай собуотун үлэтин кытта билсиэхтэрэ. «Ключ Еловый» объекка сылдьан баран,  парламентарийдар Серебрянай Бор бөһүөлэгэр баһаартан эмсэҕэлээбит дьиэлэри, дьону көһөрбүт дьиэлэри, бөһүөлэк иһинээҕи суоллары көрүөхтэрэ.

Беркакитка депутаттарга канализация-ыраастыыр тутуу станциятын, Золотинкаҕа – саахалланар туруктаах муостаны көрдөрүөхтэрэ. Золотинка бөһүөлэгин актыыбын кытта көрсүһүү тэриллиэҕэ. Иенгра национальнай эбэҥки нэһилиэгэр делегация иннигэр хаарбах туруктаах дьиэлэри кытта сибээстээх кыһалҕалары туруоруохтара.

Нерюнгрига Ил Түмэн Бэрэссэдээтэлэ Петр Гоголев муниципальнай оройуон салалтатын, поселениелар баһылыктарын, бырамыысыланнас предприятиеларын уо.д.а. тэрилтэлэр салайааччыларын кытта көрсүөҕэ. Нерюнгри оройуонун социальнай-экономическай балаһыанньатын туһунан иһитиннэриини муниципалитет баһылыга Виктор Станиловскай оҥоруоҕа, оттон миэстэлэринэн балаһыанньа хайдаҕын поселениелар баһылыктара кэпсиэхтэрэ.

Салгыы парламент спикерэ Нерюнгри оройуонун депутаттарын сэбиэтин бэрэссэдээтэлэ Валерий Селины, оройуон уонна куорат депутаттарын кытта көрсүһүүтэ былааннанар.

Ити курдук Ил Түмэн экономика, инвестиция уонна бырамыысыланнас политикатыгар сис кэмитиэтин бэрэссэдээтэлэ Павел Петров, предпринимательствоҕа, туризмҥа уонна инфраструктура сайдыытыгар сис кэмитиэт бэрэссэдээтэлэ Игорь Григорьев, тутууга, ДьУоКХ уонна энергетикаҕа сис кэмитиэт бэрэссэдээтэлэ Яков Ефимов, доруобуйа харыстабылыгар, социальнай көмүскэлгэ, үлэҕэ уонна дьарыктаах буолууга сис кэмитиэт бэрэссэдээтэлэ Владимир Чичигинаров, бюджекка, үпкэ, түһээн уонна сыана политикатыгар, бас билии уонна приватизация боппуруостарыгар сис кэмитиэт бэрэссэдээтэлин солбуйааччы Гаврил Алексеев тэрилтэлэр салайааччыларын кытта көрсүһүүлэри ыытыахтара.

Итини тэҥэ официальнай делегация састаабыгар өрөспүүбүлүкэ норуотун депутаттара Павел Ксенофонтов, Иван Слепцов, Александр Кошуков, Андрей Дорогань, Иван Данилов, Олег Пустовой киирдилэр..

Ил Түмэн пресс-сулууспата.