Ил Түмэн депутаттара Уус Алдан улууһугар сырыттылар

Алтыс ыҥырыылаах парламент салайааччыларын кытта II, IV, V   ыҥырыылаах Ил Түмэн депутата, I ыҥырыылаах Госдума депутата Егор Жирков, VI ыҥырыылаах Ил Түмэн депутата Геннадий Васильев, “Полярные авиалинии”  компания генеральнай директора Семен Винокуров сырыттылар.

Бороҕоҥҥо кэлээт, кинилэр бастакынан В.В.Алексеев аатынан Мүрүтээҕи «Уолан» гимназия үөрэнээччилэрин уонна учууталларын кытта көрүстүлэр.

Ол кэнниттэн депутаттар Г.Г.Никифоров аатынан улуустааҕы киин балыыһаҕа сылдьан эмтэнэр усулуобуйаны көрдүлэр, быраастары кытта кэпсэттилэр. Санатар буоллахха, балыыһа бастакы уочарата 2015 сыл муус устар 15 күнүгэр тутуллубута. Кэлэр өттүгэр балыыһа иккис уочаратын тутуу ирдэниллэр. Оробуочай бөлөх салгыы Мүрү 2 №-дээх орто оскуолатыгар тиийэн, оскуола таас дьиэтин туттарыы боппуруоһун дьүүллэстилэр, 500 миэстэлээх саҥа объект бырайыагын көрдүлэр.

Улуус актыыбын кытта көрсүһүү улуус дьаһалтатыгар буолла. Баһылык Алексей Федотов улуус олохтоохторун ааттарыттан Александр Николаевич Жиркову Саха Өрөспүүбүлүкэтин Бочуоттаах гражданинын үрдүк аата иҥэриллибитинэн, Петр Васильевич Гоголевы Ил Түмэн Бэрэссэдээтэлинэн талыллыбытынан итиитик-истиҥник эҕэрдэлээтэ, улуус билиҥҥи социальнай-экономическай туругун уонна тирээн турар соруктар тустарынан кэпсээтэ.

Егор Жирков бэйэтин этиитигэр Александр Николаевич Жирков салалтатынан бэһис ыҥырыылаах Ил Түмэн бүттүүн норуоту көмүскүүр аналын, араҥаччылыыр суолтатын дьоһуннаахтык, күүскэ тутан кэлбитин бэлиэтээтэ уонна парламент үлэтигэр үрдүк сыанабылы биэрдэ.

«Полярные авиалинии» компания генеральнай директора Семен Винокуров улуус инфраструктуратын сайыннарыы, суол-иис, салгынынан сибээс боппуруостарын таарыйда.

Улуус депутаттарын Сэбиэтин бэрэссэдээтэлэ Иван Колодезников 2017 сыл муус устарга Ил Түмэн тэрийэн ыыппыт муниципальнай тэриллиилэр бэрэстэбиитэллээх уорганнарын депутаттарын бастакы Съеһэ миэстэтигэр депутаттар үлэлэригэр хамсааһыны таһаарбытын бэлиэтээтэ уонна олохтоох салайыныы таһымыгар боломуочуйалары үбүлээһин  боппуруоһугар болҕомтону уурда.

Найахы нэһилиэгин баһылыга Петр Сивцев улуус олохтоохторун ититиинэн хааччыйыы боппуруоһугар тохтоото. Норуот маастара Екатерина Колодезникова норуот маастардарын үлэлэрин билиһиннэрдэ, Мандар Уус көҕүлүүр Моҕол Туос ураһа тутуллуутун туруоруста. Улуус Ытык сүбэтин бэрэссэдээтэлэ Иван Данилов норуот депутаттарыгар алгыс тылын эттэ.

Ил Түмэн Бэрэссэдээтэлэ Петр Гоголев биир дойдулаахтарыгар өйөбүллэрин иһин махтанна уонна алтыс ыҥырыылаах Ил Түмэн үлэтигэр сүрүн болҕомтону ханнык хайысхаларга ууруохтааҕын билиһиннэрдэ. Парламент ылыммыт, билигин үлэлии сылдьар сокуоннары олох тэтимигэр сөп түбэһиннэрэн сайыннарыы, сокуон хаачыстыбатын тупсарыы боппуруостарын  бэлиэтээтэ.

Бэһис ыҥырыылаах Ил Түмэн Бэрэссэдээтэлэ, алтыс ыҥырыылаах Ил Түмэн Бэрэссэдээтэлин бастакы солбуйааччы Александр Жирков биир дойдулаахтарыгар, Уус Алдан дьонугар-сэргэтигэр Ил Түмэн быыбарыгар кини кандидатуратын өйөөбүттэригэр улахан махталын биллэрдэ, истиҥ баҕа санааларын тириэртэ уонна туох-баар уопутун, бары күүһүн быыбардааччыларын итэҕэллэрин салгыы толорууга ууруоҕун туһунан эттэ. Александр Николаевич Саха сирин парламена өрөспүүбүлүкэ олохтоохторун интэриэһин туруулаһыыга утумнаах үлэни ыытыаҕын санатта. Итиэннэ Ил Түмэн депутаттара, олохтоох салалта, нэһилиэнньэ улуус сайдыытыгар тирээн турар соруктары быһаарыыга бары күүһү түмүөхтээхтэр диэн эттэ.

Улуус дьаһалтатыгар буолбут көрсүһүү кэнниттэн спикер Петр Гоголев Лөгөй нэһилиэгэр суоппардар сквердэрэ аһыллыытыгар кыттыыны ылла. Дүпсүн-Найахы суолун тутуутугар үлэ хаамыытын билистэ.

Бу күн Петр Гоголев төрөөбүт-улааппыт, үүнэн-сайдан тахсыбыт Дүпсүнүгэр сырытта. Дүпсүн оскуолатын биир бастыҥ выпускнигын оскуола педколлектива, үөрэнээччилэрэ эҕэрдэлии көрүстүлэр. Спикер нэһилиэккэ «Сардаана» оҕо саада тутуллуохтаах миэстэтин көрдө, быйыл муус устар 12 күнүгэр үлэҕэ киирбит В.В.Никифоров-Күлүмнүүр аатынан оҕо технопаркатыгар сырытта, музей экспонаттарын билистэ.

Ил Түмэн Бэрэссэдээтэлэ олохтоохтору кытта көрсүһүүтүгэр нэһилиэк, улуус, өрөспүүбүлүкэ сайдыытын боппуруостарын  кэпсэттилэр. Биир дойдулаахтара Петр Васильевичка эппиэттээх үлэтигэр ситиһиилэри баҕардылар.