Кытайтан фруктаны уонна оҕуруот аһын киллэриини бобуу

Ветеринарнай уонна фитосанитарнай кэтэбилгэ Федеральнай сулууспа 2019 с. атырдьах ыйын 10 күнүттэн Кытайтан Россияҕа сиэмэлээх уонна уҥуохтаах култууралары киллэриини боборго күһэлиннэ.

Россияҕа карантиҥҥа сылдьар кутталлаах объектардаах Кытайга оҥорон таһаарыллар үүнээйи бородууксуйатын дойдуга тиэйэн киллэрии салҕана турарынан сибээстээн, бу быһаарыы ылылынна.
2018-2019 сс. карантиннаах объектар 48 түгэҥҥэ булуллубуттар. Ол ордук сиэмэлээх уонна уҥуохтаах култуураларга баара биллибит. Россельхознадзор булан ылбыт объектара сиэмэлээх уонна уҥуохтаах култууралар үүнүүлэрин 30–90% намтатар эбит.
Россияҕа итинник сутуллубут бородууксуйа киириитин хас биирдии чахчытыгар Россельхознадзор Кытай карантиҥҥа уонна үүнээйи харыстабылыгар национальнай сулууспатыгар официальнай нуоталары туһаайбыта. Биэдэмистибэ наадалаах экспердэр консультацияларын уонна үүнээйи табаардарын оҥорон таһаарыы, харайыы уонна хаалааһын миэстэлэригэр инспекциялары ыытар туһунан Кытай өрүтүгэр 6 төгүл этиилээх тахсыбыта.
Хомойуох иһин, Россельхознадзор туһаайан этиилэрэ инспекциялары ыытыыга тиэрдибэтилэр.
Бэлиэтээн эттэххэ, Россияҕа үүнээйи бородууксуйатын биир бөдөҥ тиэйэн киллэрээччинэн Кытай буолар. Дойдуга сыллата 900 тыһыынча тоннаттан ордук үүнээйи бородууксуйата тиэйиллэр, ол иһигэр 180 тыһыынча тоннаттан ордук цитрусовайдар, 190 тыһ. тоннаттан элбэх дьаабылыка, груша, слива, нектарин, абрикос, персик, 80 тыһыынча тоннаттан ордук томат, 53 тыһыынча тонна хортуоппуй, ону сэргэ 100 тыһыынча тонна луук уонна чеснок.
Маныаха 90-с сылларга Кытайтан бородууксуйа киириитин көҥүллээһин судургу этэ. Ол курдук, оҥорон таһаарыллар миэстэтигэр уонна оройуонугар хааччаҕа суох ханнык баҕарар провинцияттан киирэрэ.
Хомойуох иһин, Кытайга фитосанитарнай балаһыанньа балайда уларыйда, онон карантиннаах организмнары булан ылыы ити балаһыанньаны хаттаан көрөр наадатын ирдиир.
Россельхознадзор Кытай өрүтэ консультациялары уонна үүнээйи табаардарын оҥорон таһаарар, харайар уонна хаалыыр миэстэлэригэр инспекцияны ыытарын күүтэр. Ол кэнниттэн атыы-эргиэн сөргүтүллэрин туһунан боппуруос көрүллүөҕэ.

amurmedia.ru