Өлүөнэни туоруур муоста тутуута — Росавтодор сүбэтигэр

Аҕа дойдуга муостаны тутууга бастыҥ исписэлиистэр, экспердэр кыттыылаах Росавтодор Сэбиэтин мунньаҕар стратегическай инфраструктура объегын тутууга инженернэй-техническэй быһаарыылар барыйааннара көрүлүннүлэр.

Ону таһынан, бу Сэбиэккэ интэриэстээх, бырайыак инвестордарынан буолуохтарын сөп өрүттэр – PowerChina International Group Ltd. уонна «ВИС» бөлөх хампаанньаларын бэрэстэбиитэллэрэ этиилэри оҥордулар. Консорциумнар чааһынай концессия көҕүлээһинин төрүтүгэр бырайыагы олоххо киллэрэргэ бэлэмнэрин иһитиннэрдилэр.

Федеральнай суол агентствотын салайааччы солбуйааччыта Дмитрий Прончатов Саха сирэ бу боппуруоска болҕомтону мэлдьи уурарын уонна дойду салалтата РФ Тырааныспарга министиэристибэтин итиэннэ өрөспүүбүлүкэ аадырыстарыгар сорудахтарын бэлиэтээтэ. Кини мунньах түмүгүнэн РФ Бырабыыталыстыбата салгыы үлэлииригэр рекомендациялаах экспердэр түмүктэрэ бэлэмнэниэҕин иһитиннэрдэ. «Научнай-техническэй сэбиэт уонна санааны атастаһыы түмүктэринэн биһиги кыттыгас боротокуолу бэлэмниэхпит. Ол кэннэ өрөспүүбүлүкэни кытта РФ Бырабыыталыстыбатыгар дакылаат бэлэмниэхпит. Салгыы бырабыыталыстыба бу бөдөҥ бырайыагы олоххо киллэрии ньымаларын уонна болдьохторун туһунан быһаарыы ылыныаҕа», — диэтэ Дмитрий Прончатов.

Өлүөнэ өрүскэ муостаны тутуу РФ сирин-уотун 18 % тырааныспар-логистика сибээһинэн хааччыйыаҕа. Сылы эргиччи тырааныспарынан сибээс зонатыгар дойду саамай улахан регионун олохтоохторун 83% түбэһиэҕэ.

Объегы тутуу билигин баар оҥорон таһаарыы сайдыытыгар уонна саҥа бырайыактары үөскэтиигэ модун төһүүнэн буолуоҕа. Ол курдук тырааныспар кэтит магистралларын холбуур кыахтаныаҕа. Чуолаан, биир өттүттэн Транссибирскай уонна Байкал-Амур магистралларын, атын өттүттэн Хотугу муора суолун туһунан этиллэр. Хотугу муора суола «Европа – Хотугу муора суола – Тиксии – Дьокуускай – Благовещенскай – Кытай – АТР» норуоттар икки ардыларынааҕы кэскиллээх тырааныспар көрүдүөрүнэн буолар аналлаах.

Өлүөнэ муостатын тутуу итини сэргэ “Лена” уонна “Халыма” федеральнай массыына суолларын “Бүлүү” массыына суолун кытта холбуоҕа. Кини Илиҥҥи Сибиири Охотскай муора портарын кытта кылгас суолунан сибээстиэҕэ. Ону таһынан, Иркутскайтан Магадаҥҥа диэри тырааныспар көрүдүөрэ үөскүөҕэ. Өрөспүүбүлүкэ наадыйыытыгар ресурсалары тиэйиигэ ороскуоттар балайда намтыахтара.

СӨ Ил Дарханын уонна Бырабыыталыстыбатын пресс-сулууспатын матырыйаалынан.