Мас тардыһыытын кыайыылаахтара Россия чемпионатыгар кыттыахтара

/ Спортсменнары кытта көрсүһүү /

2019 с. кулун тутар бүтэһигэр Дьокуускайга мас тардыһыытыгар саамай күүтүллэр күрэстэһии – эр дьон, дьахталлар уонна ветераннар ортолоругар Г.Р.Десяткин – Күүстээх Дэһээккин бирииһигэр мас тардыһыытыгар биирдиилээн уонна хамаанданан күрэхтэһии ыытыллыбыта.

Өрөспүүбүлүкэ народнай депутата, парламент вице-спикерэ Антонина Григорьева тренер Алексей Агапов баһылыктаах Ньурба оройуонун спортсменнарын кытта көрүстэ. Кинилэр бары мас-рестлинг турнирыгар кыайыылаахтарынан буолбуттара. Моисеев Данил 90 кг ыйааһыҥҥа бастакы миэстэни ылбыта, Андреев Дьулустаан – 125 кг үөһэ ыйааһыннаахтарга, оттон Юлия Михайлова 85 кг ыйааһыҥҥа дьахталлар ортолоругар чемпионнаабыттара.
«Күрэхтэһииллэр Норуоттар икки ардыла­рынааҕы мас-рестлинг федерациятын быраабылаларынан, быһаччы туорааһын систематынан ыытылыннылар. Турнир түмүгүнэн биһиги спортсменнарбыт бары спорт маастарыгар нормативтары толордулар, Саха сирин сүүмэрдэммит хамаандатыгар киирэн муус устар 26-28 кк. Чебоксары куоракка буолар Россия чемпионатыгар кыттыахтара», — диэн Алексей Агапов кэпсээтэ. «Нэһилиэнньэ ортотугар спорт национальнай көрүҥүн — мас тардыһыытын тарҕатыыга уонна сайыннарыыга Ньурба оройуонугар утумнаах үлэ ыытыллар, Дьаархан нэһилиэгэр төрөөбүт, номоххо киирбит мадьыны Софрон Андреев – Кэрэ киһи уолун кэриэһигэр сыллата мас тардыһыытыгар өрөспүүбүлүкэ турнира уо.д.а. күрэхтэһиилэр ыытыллаллар», — диэтэ.
Антонина Григорьева көрсүһүү кэмигэр мас тардыһыыта бүгүҥҥү күҥҥэ бөҕө уонна чэгиэн дьону иитии ньыматынан буолбутун бэлиэтээтэ. «Бу олус кэрэхсэтэр, тэтимнээх, дьоҥҥо барытыгар тииһимньилээх уонна онон тардар спорт көрүҥэ. Россия Президенэ Владимир Путин 2013 с. олунньу 9 к. омуктар икки ардыларыгар сыһыаннаһыыларга Сэбиэт мунньаҕар тыл этэригэр, Россия норуоттарын спордун национальнай көрүҥнэрин сайыннарыыга, олимпиада бырагырааматыгар киллэриигэ тиийэ сорудах биэрбитэ. Мас-рестлинг атын регионнарга күүскэ сайдар уонна спортсменнара сылтан сыл аайы ситиһиилэрин эбэн иһэллэр. Норуоттар икки ардыларынааҕы мас-рестлинг федерациятын састаабыгар номнуо аан дойду 5 континеныттан 47 национальнай федерация киирбитэ. Бу баай историялаах көрүҥ аан дойдуга бүттүүнүгэр хардыылаабыта кинини спорт саамай кэскиллээх көрүҥнэриттэн биирдэстэринэн оҥорор. Чуолаан биһиги мас тардыһыыбыт Олимпийскай оонньуулар бырагыраамаларыгар киириэҕэ диэн эрэнэбит», – диэтэ кини.
Вице-спикер кэпсээбитинэн, 2018 с. сэтинньитигэр мас тардыһыытыгар аан дойдутааҕы чемпионакка бэлэмнэнии уонна ыытыы кэмигэр парламеҥҥа мас-рестлинг сайдыытыгар уонна проблемаларыгар, ону сокуонунан сүрүннээһин боппуруостарыгар “төгүрүк остуол” тэриллибитэ. Ол түмүгэр Ил Түмэҥҥэ уонна Саха сирин бырабыыталыстыбатыгар кэккэ сүбэлээһиннэр бэлэмнэммиттэрэ. Чуолаан, 2020-2025 сс. Саха сиригэр мас-рестлинг сайдыытыгар судаарыстыбаннай бырагыраама барыла уонна 2019 с. мас тардыһыытыгар Норуоттар икки ардыларынааҕы киини тэрийии.
Түмүккэ Антонина Григорьева махтал суруктары туттарда уонна спортсменнарга Россия чемпионатыгар ситиһиилээхтик кытталларыгар, тулууру, эр санааны уонна дьулуурдаах буолалларыгар баҕа санаатын эттэ.

Мария Андросова