Муниципальнай таһымнаах депутаттары баай-дуол уонна дохуот туһунан сибидиэнньэни биэрииттэн босхолуур туһунан этии

Россия Федерациятын Федеральнай Мунньаҕын иһинэн үлэлиир Россия Федерациятын сокуону оҥорооччуларын Сэбиэтин мунньаҕар РФ субъектарын уонна муниципальнай тэриллиилэр таһымнарыгар коррупцияны утары үлэни ыытыы өттүнэн Россия Федерациятын сокуоннарын тупсарар туһунан боппуруос көрүлүннэ.

Бу боппуруоһу дьүүллэһиигэ СӨ Судаарыстыбаннай Мунньаҕын (Ил Түмэн) Бэрэссэдээтэлэ Александр Жирков муниципальнай таһымнаах депутаттар дохуот туһунан декларацияны туттарыылара тоҕооһо суоҕун туһунан кэпсэтиһиини көҕүлээтэ.

Саха сирин парламенын бэрэссэдээтэлэ 1999 сыл балаҕан ыйын 22 күнүгэр ылыныллыбыт «Россия Федерациятын субъектарын судаарыстыбаннай былааһын сокуону оҥорор (бэрэстэбиитэллээх) уонна толорор уорганнарын тэрийии уопсай бириинсиптэрин туһунан» Федеральнай сокуон муниципальнай таһымнаах депутакка кандидаттар дохуот туһунан декларацияны булгуччу киллэриэхтээхтэрин туһунан ирдэбилэ миэстэтигэр нэһилиэк, улуус депутаттарын талыыга харгыстары үөскэтэр диэтэ. Бу Саха Өрөспүүбүлүкэтигэр эрэ буолбакка, Россия тыатын сиригэр барытыгар баар көстүү.

Александр Жирков бу боппуруоһу Саха Өрөспүүбүлүкэтэ федеральнай сокуону оҥорооччуларга хас да төгүл туруорбутун туһунан бэлиэтээн эттэ. Бу боппуруоска Россия Федерациятын атын субъектарыттан сокуону оҥорууга көҕүлээһиннэр эмиэ бааллар.

Россия регионнарыттан, ордук тыа сириттэн туруорсуулары аахсан, спикер Россия Федерациятын Федеральнай Мунньаҕын иһинэн Россия Федерациятын сокуону оҥорооччуларын Сэбиэтин хамыыһыйатын чилиэннэрин бу боппуруоска сөптөөх быһаарыыны ылыналларыгар ыҥырда.

Муниципальнай таһымнаах депутаттар декларацияны туттарыыларын туһунан боппуруос 2017 сыл кулун тутар ыйга Саха Өрөспүүбүлүкэтин муниципальнай тэриллиилэрин бэрэстэбиитэллээх уорганнарын депутаттарын I съеһигэр туруоруллубута.

Саха сирин парламенын спикерин этиитин бу тиэмэҕэ сүрүн дакылааты оҥорбут Архангельскай уобалас депутаттарын Мунньаҕын Бэрэссэдээтэлэ Виктор Новожилов, итиэннэ Тюмень уобалаһын Думатын Бэрэссэдээтэлэ Сергей Корепанов, Калуга уобалаһын Сокуону оҥорор Мунньаҕын Бэрэссэдээтэлэ Виктор Бабурин, Федерация Сэбиэтин федеративнай тутулга, регионнааҕы бэлиитикэҕэ, олохтоох салайыныыга уонна Хоту дойду дьыалаларыгар кэмитиэтин бэрэссэдээтэлэ Олег Мельниченко уонна РФ Федеральнай Мунньаҕын иһинэн Россия Федерациятын сокуону оҥорооччуларын Сэбиэтин хамыыһыйатын атын чилиэннэрэ өйөөтүлэр. Судаарыстыбаннай Дума федеративнай тутулга уонна олохтоох салайыныы боппуруостарыгар кэмитиэтин бэрэссэдээтэлэ Алексей Диденко Александр Жирков туруорбут боппуруоһугар кини салайар кэмитиэтэ Россия Федерациятын субъектарыттан киирбит этиилэри көрүүгэ ылсыбытын туһунан эттэ. Судаарыстыбаннай Дума анал кэмитиэтэ бу боппуруоһу пленарнай мунньаҕар киллэриигэ анаан бэлэмниир.

Алексей Диденко Саха Өрөспүү бүлүкэтин парламенын спикерин туруорсуута олохтооҕун, Судаарыстыбаннай Думаҕа балайда өйөбүлү ыларын уонна сотору кэминэн Дума көрүүтүгэр бастакы ааҕыыга киириэн сөптөөҕүн туһунан бигэргэтэн эттэ.