584
17 мая 2018 в 20:57
Ольга Балабкина: “Пенсияҕа тахсар сааһы үрдэтии уопсастыба санаатын учуоттууру эрэйэр”
Госдумаҕа тыл этэригэр, Дмитрий Медведев РФ Бырабыыталыстыбата пенсияҕа тахсар сааһы үрдэтэр туһунан сокуон барылын бэлэмниирин иһитиннэрбитэ. Маныаха кини билиҥҥи пенсияҕа тахсар саас 30-с сылларга ылыллыбытын, оччолорго киһи үйэтин орто уһуна 40 саас буоларын санаппыта.
«Пенсияҕа тахсар сааһы улаатыннарыы боппуруоһа регионнарга улахан долгуйууну үөскэттэ. Бу боппуруоһу бюджекка ороскуот өттүттэн көрө сатыыллара төрдүттэн сыыһа. Пенсияҕа тахсар саас атын төрүөтүнэн быһаарыллыахтаах», — диэн ааҕар Ил Түмэн Бэрэссэдээтэлин солбуйааччыта Ольга Балабкина.
«Интернеккэ дьүүллэһиилэртэн уонна социологическай ыйытыктартан көрдөххө, биир дойдулаахтарбыт үгүстэрэ итини утарбаттар. Кэнники кэмҥэ социальнай ситимнэргэ атын дойдуларга пенсиянан хааччыйыыны кытта тэҥниир элбэх иһитиннэрии баар буолла. Маныаха киһи хааччыллыылаах буоларыгар сүрүн болҕомто ууруллар. Атын дойдулар үгүстэригэр киһи пенсияҕа тахсар сааһа Россия киэнинээҕэр балайда үрдүк. Чунуобунньуктар ити боппуруоска, холобур, Германияҕа сигэнэллэрин сөбүлүүллэр. Онно эр дьон, дьахталлар да пенсияҕа 65-гэр тахсаллар, сотору 67-гэр тахсар буолуохтара. Ол эрээри дьон ити дойдуга уһуннук олороллор эбээт», — диэн быһаарда вице-спикер.
Ольга Балабкина санаатынан, Россия гражданнарын олоҕун уһуна Европа көрдөрүүлэригэр чугаһаатаҕына эрэ пенсияҕа тахсар сааһы үрдэтэр тоҕоостоох.
«Биһиги дойдубутугар чахчы да пенсияҕа тахсар саас намыһах. Ол эрэн ити түбэспиччэ буолбатах. Бу дойдуга киһи үйэтэ олус кылгаһыгар толору сөп түбэһэр. Ол курдук, билиҥҥитин курдук ааспыт үйэ ортотугар этэ. Киһи үйэтин уһатыы – олох хаачыстыбатын улаханнык уонна өр кэмҥэ тупсарыы түмүгэ буолар», — диэн ааҕар парламентарий.
Онон норуот депутата пенсияҕа тахсар сааһы үрдэтии боппуруоһа пенсионердары көрүүгэ-истиигэ бюджет ороскуоттарын сарбыйыы наадатын өттүттэн буолбакка, олох таһымын үрдэтиигэ уонна киһи үйэтин уһатыыга туһаайыллыбыт дьаһаллары кытта ыкса сибээстээн көрүллүөхтээҕин этэр. Ити дьаһаллар судаарыстыба баһылыгын ыйаахтарыгар быһаарыллыбыттара.
Бу теманы салҕаан, Ил Түмэн Бэрэссэдээтэлин солбуйааччы «Саха Өрөспүүбүлүкэтигэр аҕа көлүөнэ гражданнарга кэлим медицинскэй-социальнай көмө туһунан» сокуон барылын санатта. Сокуон тутаах сыалынан киһи үйэтин уһатыыга, гражданнар бэйэлэрин көрүнэр кыахтарын чөлүгэр түһэриигэ, олоххо актыыбынай буолалларыгар усулуобуйалары үөскэтии буолар.
«Бу сокуон социальнай эйгэҕэ биир сүрүнүнэн ааҕыллыаҕа. Кини олоххо киирдэҕинэ, оччоҕуна биһиги пенсияҕа тахсар сааһы былаанныырбытыгар кыах үөскүөҕэ. Мин быыбардааччылары кытта чаастатык көрсөбүн, көрсүһүүгэ ордук аҕа көлүөнэ дьон кэлэр. Кинилэр бары араастар, хас биирдиилэрэ туспа дьылҕалаахтар, ол эрэн бары миэхэ чугастар. Кинилэртэн үгүстэрэ пенсияҕа тахсар сааһы оннунан хаалларар наадалааҕын этэллэр, сорохтор кыччатыахха да дииллэр. Мин быыбардаммыт уокуругум уратыта диэн, Саха сирин бүтүннүүтүн да курдук, бастатан туран, бу – Уһук Хоту сир тыйыс усулуобуйаларыгар ыарахан үлэҕэ-хамнаска үлэлээбит пенсионердар», — диэн кэпсиир норуот депутата.
«Билигин маннык уустук боппуруос быһаарылларыгар, былаас дьон санаатын истиэхтээх — барыларын, ким сөбүлэһэрин, ким утарарын, ким саарбахтыырын. Манна уопсастыба санаата олус суолталаах. Итинтэн сиэттэрэн, өрөспүүбүлүкэ парламеныгар уопсастыбаннас бэрэстэбиитэллэрин, пенсионердары бэйэлэрин ыҥыран, бу боппуруоһу депутаттар дьүүллэһэллэрэ былааннанар», — диэн түмүктээтэ Ольга Балабкина.
