Парламеннар ассоциацияларын уопсай мунньаҕар – видео сибээһинэн

Балаҕан ыйын 30 к. Ил Түмэн Бэрэссэдээтэлэ Петр Гоголев “Уһук Илин уонна Забайкалье” Парламеннар ассоциацияларын уопсай мунньаҕар видеоконференция сибээһин туһанан кытынна.

Уопсай мунньахха “Уһук Илин уонна Забайкалье” Парламеннар ассоциацияларын бэрэссэдээтэлэ уонна бэрэссэдээтэли солбуйааччы талылыннылар. Ассоциацияны Приморскай кыраай Сокуону таһаарар Мунньаҕын спикерэ Александр Ролик салайыаҕа, кини солбуйааччытынан Камчатка кыраайын Сокуону таһаарар Мунньаҕын бэрэссэдээтэлэ Валерий Раенко буолла.
Аан бастаан онлайн-режимҥэ ыытыллыбыт мунньахха Уһук Илин уонна Забайкалье састаабыгар киирэр федерация субъектарын судаарыстыбаннай былааһын 9 сокуону таһаарар (бэрэстэбиитэллээх) уорганнарын салайааччылара кытыннылар. Бэбиэскэҕэ сүрүн боппуруоһунан ассоциация саҥа бэрэссэдээтэлин уонна кини солбуйааччытын кандидатуратын дьүүллэһии уонна сөбүлэһиннэрии буолла.
Хабаровскай кыраай Сокуону таһаарар Мунньаҕын бэрэссэдээтэлин Сергей Луговской боломуочуйалара 2019 с. алтынньы 1 күнүттэн тохтообутунан сибээстээн бэрэссэдээтэл миэстэтэ аһаҕас хаалбыта.
Дуоһунаска хандьыдаатынан Приморскай кыраай Сокуону таһаарар Мунньаҕын бэрэссэдээтэлэ Александр Ролик туруоруллан, биир санаанан талылынна.
Ил Түмэн спикерэ Петр Гоголев кандидатураны өйөөн тыл эттэ. Кини ассоциацияҕа биир сыл үлэлиир кэмигэр Александр Ивановиһы кытта сирэй алтыспытын уонна үлэтигэр идэтийбитин көрбүтүн бэлиэтээтэ.

Сергей Луговской итини сэргэ ассоциация бэрэссэдээтэлин солбуйааччыга хандьыдааты – Камчатка парламенын спикерэ Валерий Раенконы билиһиннэрдэ. Ассоциация чилиэннэрэ биир санаанан кинини өйөөтүлэр, иккис болдьоххо таллылар. Валерий Федорович 3 сыл устатыгар бу дуоһунаска үлэлиир уонна туруоруллубут соруктары үчүгэйдик быһаарар.
Саха сирин парламенын спикерэ Петр Гоголев эҕэрдэлэргэ кыттыста уонна ситиһиилээх үлэни баҕарда.
Саҥа талыллыбыт бэрэссэдээтэллээх “Уһук Илин уонна Забайкалье” Парламеннар ассоциацияларын уопсай мунньаҕа 2020 сыл иккис кыбаарталыгар буолуоҕа.
Парламеннар ассоциацияларын састаабыгар Уһук Илин уонна Забайкалье 11 сокуону оҥорор уоргана киирэр, кини 1995 сылга тэриллибитэ.

Ил Түмэн пресс-сулууспатын матырыйаалларынан  Елена БАИШЕВА бэлэмнээтэ