Петр Гоголев Бурятияҕа байыаннай чааска сырытта

СӨ Судаарыстыбаннай Мунньаҕын (Ил Түмэн) делегацията Бурятия Өрөспүүбүлүкэтигэр үлэлиир сырыытын чэрчитинэн Ил Түмэн бэрэссэдээтэлэ Петр Гоголев бэс ыйын 28 к. Онохой-2 бөһүөлэккэ баар байыаннай чааска сырытта. Манна РФ Сэбилэниилээх күүстэрин радиационнай, химическэй уонна биологическай көмүскэлгэ чаастарын 26-с полката баар.

Бу чааска Саха сириттэн ыҥы­рыллыбыт 10 саллаат сулууспалыыр. Петр Гоголевы кытта байыаннай чааска Ил Түмэн мандаакка уонна регламеҥҥа хамыыһыйатын бэрэссэдээтэлэ Андрей Николаев уонна СӨ саллааттарын уонна матростарын төрөппүттэрин кэмитиэтиттэн бэрэссэдээтэл Мария Емельянова сырыттылар. Ил Түмэн делегациятын Бурятия Народнай Хуралын депутаттара уонна аппараат үлэһиттэрэ арыаллаатылар.
Көрсүһүүгэ Петр Гоголев уолаттарга кылгастык Саха сиригэр буола турар бэлиэ түгэннэр тустарынан кэпсээтэ, кинилэр ханнык оройуоннар бэрэстэбиитэллэрэ буолалларын интэриэһиргээтэ, сулууспаларын кэнниттэн олоххо былааннарын ыйытта. Саха сирин парламенын спикерэ саллааттары чиэстээхтик сулууспалыылларыгар, Саха сирин дьоһун бэрэстэбиитэллэрэ буолалларыгар ыҥырда.
Олохсуйбут үтүө үгэс быһыы­тынан, Ил Түмэн делегацията уолаттарга саха киинэлэрин коллекциятын, Дьокуускайга көҥүл тустууга аан дойду кубогын видеоҕа уһуллуутун, “Ил Түмэн” хаһыат сибиэһэй нүөмэр­дэрин, минньигэс астары уонна саха алаадьытын аҕалла.
Ил Түмэн делегациятын байыаннай чаас командирын байыаннай-политическай үлэҕэ солбуйааччытын эбээһинэһин быстах кэмҥэ толорооччу, майор Константин Дымченко көрсөн арыаллаата. Кини бэлиэтээбитинэн, Саха сириттэн уолаттар баар-суоҕа икки ый сулууспалаабыт кэмнэригэр номнуо араас тэрээһиннэри ыытыыга бэйэлэрин айымньылаах өттүттэн көрдөрбүттэр. Көрсүһүү кэмигэр байыаннай сулууспалаахтар аһылыктарын, медицинскэй хааччыйыы боппуруостара дьүүллэһилиннилэр. Байыаннай чаас замполита Саха сирин парламенын бэрэссэдээтэлигэр дойду араас байыаннай чаастарыгар сулууспалыыр Саха сириттэн ыҥырыллыбыт саллааттарга болҕомтону уурарын иһин махтанна. Сокуону таһаарар уорган салалтата үлэлиир сырыытын кэмигэр бириэмэ булан, анаан-минээн байыаннай чаастарга сылдьан биир дойдулаахтарын көрсөрө, хайдах сулууспалыылларын билсэрэ, кини өйдүүрүнэн, аан бастакы түгэн буоларын билиннэ.