486
14 января 2019 в 15:18
Петр Гоголев уопсай аһыллыытыгар кытынна
Ил Түмэн Бэрэссэдээтэлэ Пётр Гоголев ахсынньы 29 к. үрдүк үөрэх кыһаларын уопсайын үөрүүлээхтик аһыыга кыттыыны ылла. Бу Губин уулуссатын 5 нүөмэригэр тутуллубут саҥа дьиэҕэ ХИФУ педагогическай институтун 250 устудьуона уонна АГИКИ 250 устудьуона олохсуйуохтара.
Саха сирин Ил Дархана Айсен Николаев эҕэрдэ тылыгар аныгы эдэр каадырдары, бастатан туран, олохтоох вузтар бэлэмниэхтээхтэрин бэлиэтээтэ.
«Маннык уопсайдар баар буолуулара биһиги үрдүк үөрэхпит кыһалара күрэстэһэр кыахтаналларыгар, талааннаах ыччаты тардалларыгар көмөлөөх. ХИФУ уонна АГИКИ материальнай-техническэй базаларын бөҕөргөтүүгэ, араас саҥа бырайыактарга тардыыга үөскүүр боппуруостарын биһиги кыттыһан быһаарыахпыт диэн эрэнэбин», — диэтэ кини.
Ил Түмэн Бэрэссэдээтэлэ Пётр Гоголев Саха судаарыстыбаннай университетыгар ааспыт устудьуон сылларын ахтан ылла итиэннэ билиҥҥи устудьуоннар табыгастаахтык, тупсаҕайдык олороллоругар бары усулуобуйа тэриллэрин бэлиэтээтэ.
«Мин бэйэм – СГУ урукку устудьуонабын уонна ХИФУ билиҥҥи преподавателэбин. Онон үөрэххэ, үлэҕэ сөптөөх усулуобуйалары, бастатан туран, олорор дьиэни хааччыйыы боппуруоһа устудьуоҥҥа уонна педагогка туох суолталааҕын бэркэ диэн билэбин», — диэн бэлиэтээтэ Саха сирин парламенын спикерэ.
Пётр Гоголев алтыс ыҥырыылаах депутаттар куорпустарын аатыттан эҕэрдэ аадырыстары Максим Аммосов аатынан Хотугулуу-Илиҥҥи федеральнай университет ректора Евгения Михайловаҕа, Арктикатааҕы култуура уонна искусство судаарыстыбаннай институтун ректорыгар Саргылана Игнатьеваҕа уонна вузтар икки ардыларынааҕы уопсай директорыгар Иннокентий Дегтяревка туттарда.
Бу үөрүүлээх тэрээһин күлүүһү туттарыынан түмүктэниитигэр “Кинг-95” ХЭТ директора Сос Варджапетян уонна уопсай директора Иннокентий Дегтярев кытыннылар.
Анатолий Шестаков хаартыскалара.
