14 мая 2018 в 09:23

Поликлиникаларга быраастары элбэтэргэ

Россия Президенэ Владимир Путин Бырабыыталыстыбаҕа поликлиникаларга каадырынан хааччыллыыга баар кыһалҕалары суох оҥорорго, ону тэҥэ 2024 сылга диэри киһи өлүүтүн көрдөрүүлэрин намтатарга сорудахтаата. Ити туһунан кини Кириэмил сайтыгар таһаарыллыбыт «2024 сылга диэри кэмҥэ Россия Федерациятын сайдыытын национальнай сыалларын уонна стратегическай соруктарын туһунан» Ыйааҕар этиллэр.

«РФ Бырабыыталыстыбата доруобуйа харыстабылын эйгэтигэр национальнай бырайыагы оҥороругар 2024 сылга маннык тус сыаллаах көрдөрүүлэри ситиһиини хааччыйыы наадатыгар олоҕуруохтаах: <…> бастакы медицинскэй-санитарнай көмөнү оҥорор медицинскэй тэрилтэлэргэ каадыр тиийбэтин суох оҥоруу», — диэн этиллэр докумуоҥҥа.

Итини тэҥэ миниистирдэр кабинеттара үлэлиир кыахтаах нэһилиэнньэ өлүүтүн көрдөрүүлэрин 100 тыһ. киһиэхэ 350 түгэҥҥэ диэри намтатыыны хааччыйыахтаах, хаан ыарыыларыттан — 450 түгэҥҥэ, искэн, ол иһигэр кутталлаах искэн ыарыыларыттан – нэһилиэнньэ 100 тыһ. киһитигэр — 185 түгэҥҥэ, ону сэргэ кыра оҕо өлүүтүн — саҥа төрөөбүт 1 тыһ. оҕоҕо 4,5 түгэҥҥэ диэри.

Маны таһынан, Бырабыыталыстыба чугастааҕы 6 сылга доруобуйа харыстабылын бастакы сүһүөх тэрилтэлэрин ситимин үөскэтиини түмүктүөх тустаах, онуоха 100-тэн 2 тыһ. киһиэхэ диэри нэһилиэнньэлээх сирдэргэ быраас амбулаториялара, фельдшерскай-акушерскай уонна фельдшерскай пууннар тутуллаллара наадатын итиэннэ 100-тэн кыра киһи олорор нэһилиэнньэлээх пууннарга мобильнай медицинскэй комплекстары туһаныыны учуоттаан, бу эйгэҕэ геоинформационнай система туттуллара хааччыллыахтаах.