Путин саҥа ыйаахтарга илии баттаата

Владимир Путин кулун тутар 1 к. Федеральнай Мунньахха анал этиитин түмүктэринэн, туһааннаах уурааҕы бэлэмнииригэр бэйэтин администрациятын баһылыга Антон Вайноҕа сорудах биэрбитэ.

Сорудахха этиллэринэн, ити докумуон дойду 2024 сылга диэри сайдыытын национальнай сыалларын-соруктарын быһаарар аналлаах.

Бастакы суолталааҕынан экономикаҕа үүнүү тэтимэ аан дойду киэниттэн үрдүүрүн хааччыйыы уонна Россия аан дойду биэс бөдөҥ экономикаларын ахсааныгар киириитэ, сыллата 5 мөлүйүөнтэн итэҕэһэ суох дьиэ кэргэн олорор усулуобуйатын тупсарыы, талааннары өйөөһүн механизмнарын үөскэтии ааттаммыттара.

Итини сэргэ ыйаахха маннык хайысхаларынан ситиһиллиэхтээх көрдөрүүлэр быһаарыллаллар: доруобуйа харыстабыла, үөрэх, демография, олорор дьиэ уонна куорат эйгэтэ, норуоттар икки ардыларынааҕы кооперация уонна экспорт, үлэ оҥорон таһаарыыта, аччыгый бизнес, суоллар, экология уонна цифровой экономика.

Маны таһынан, докумуоҥҥа 2024 сылга диэри магистральнай инфраструктураны саҥардыы уонна кэҥэтии кэлим былаанын тус сыаллаах көрдөрүүлэрэ бааллар.

Бу иннинэ бэнидиэнньиккэ президент саҥа болдьоххо дуоһунаһыгар киириитин сиэрэ-туома буолла.

Дуоһунаска киирээт да тута Путин улахан бырагыраамалаах ыйаахха илии баттаан, “ыам ыйынааҕы” ыйаахтар үгэстэрин салҕаата – 2012 сыл ыам ыйын 7 күнүнээҕи 11 докумуон дойду чугастааҕы сылларга социальнай-экономическай сайдыытын сүрүн соруктарын быһаарбыта.

Москва аннынааҕы Горкига президени кытта көрсүһүүтүгэр Бырабыыталыстыба бэрэссэдээтэлэ Дмитрий Медведев 2012 сыл ыам ыйынааҕы ыйаахтар 98 % толорулуннулар диэбитэ.