Радиология салаатын дьиэтэ саҥардылынна

Саха сирин салалтата өрөс­пүүбүлүкэ нэһилиэнньэтэ хаачыстыбалаах уонна тииһимньилээх медицинскэй көмөнү ыларыгар тупсаҕай усулуобуйалары үөскэтэр туһугар кыаллары барытын оҥорор. Регион бырабыыталыстыбатын дьаһалынан “Дьокуускай куоракка Саха сиринээҕи 210 куойкалаах радиологическай отделениелаах уонна хаһаайыстыбаннай блоктаах онкологическай диспансер” объект тутуутун кэнсиэпсийэтин бигэргэппитэ. Бүгүҥҥү күҥҥэ тутуу бастакы уочаратын олоххо киллэрии – 30 куойкалаах радиотерапевтическай отделениены саҥардан тутуу түмүктэннэ.

Бэлиэ түгэҥҥэ өрөспүүбүлүкэ Баһылыга Айсен Николаев, СӨ-гэр федеральнай инспектор Александр Третинников, доруобуйа харыстабылын миниистирэ Елена Борисова, үлэ ветерана, РФ үтүөлээх бырааһа Иван Местников, Ил Түмэн депутаттара, бырабыыталыстыба чилиэннэрэ, ыҥырыллыбыт ыалдьыттар кыттыыны ыллылар.
Саха норуотун үтүө үгэһинэн тэрээһин алгыстан саҕаланна. Алгыс, арчылааһын сиэрин-туомун биллиилээх алгысчыт Иван Васильев – Алгыс Уйбаан ыытта.

СӨ Судаарыстыбаннай Мунньаҕын (Ил Түмэн) аатыттан бэлиэ түгэнинэн уонна саҥа 2019 сылынан мустубут дьону Пётр Гоголев эҕэрдэлээтэ. Кини бу өрөспүүбүлүкэ олохтоохторугар, ордук ыарахан ыарыыны көрсүбүттэргэ эбэтэр чугас дьонун сүтэрбиттэргэ суолталаах түгэн үүммүтүн, бу күнү быраастар, эмчиттэр, ыарыһахтар күүппүттэрин бэлиэтээтэ.
Ил Түмэн спикерэ радиологическай отделение үлэҕэ киириитэ, манна лучевой терапия кутталлаах искэни эмтээһиҥҥэ сүрүн ньымалартан биирдэстэрэ буоларынан, онкологическай ыарыылартан киһи өлүүтүн көрдөрүүтүн намтатыыга көмөлөһүөҕэр эрэнэрин биллэрдэ.

Парламент Бэрэссэдээтэлэ Саха сиригэр кутталлаах искэннэртэн киһи өлүүтүн көрдөрүүтэ кэтээн көрүү ыытыллыбыт сылларыгар Россия Федерациятын орто көрдөрүүтүттэн намыһаҕын бэлиэтээтэ. Спикер Дьокуускайга Онкологическай диспансер тутуута түмүктэниитигэр Ил Түмэн өйөбүлү оҥоруоҕун бэлиэтээтэ.
Пётр Гоголев күннэтэ ыары­һахтар туруктарын тупсарыыга үлэлиир, кинилэргэ ис сүрэхтэн кыһамньылаахтык сыһыаннаһар тэрилтэ бары үлэһиттэрин эҕэрдэлээтэ. Өрөспүүбүлүкэ народнай депутаттарын, парламент аппараатын аатыттан кини махтал тылларын этэн туран, онкологическай диспансер кылаабынай бырааһа Лена Афанасьеваҕа эҕэрдэ аадырыһы туттарда.
Саха сирин Баһылыга Айсен Николаев саҥардыы кэмигэр, дьиҥэр, отделение саҥа куорпуһа тутуллубутун, эргэ дьиэтин иэнэ 2,6 төгүл улааппытын эттэ. Кини бу эйгэҕэ медицинскэй көмөнү оҥорууга улахан хардыы оҥоһуллубутун, ол өрөспүүбүлүкэ уонна дойду бүттүүнүн сайдыытын стратегическай докумуоннарыгар киирбит кэнсиэпсийэни кытта сөп түбэһэрин бэлиэтээтэ.

Доруобуйа харыстабылын салаатыгар үтүөлэрин, өрөспүүбүлүкэ социальнай-экономическай сайдыытыгар кылаатын уонна өр сыллаах үтүө суобастаах үлэтин иһин онкологическай диспансер кылаабынай бырааһа Лена Афанасьеваҕа СӨ доруобуйатын харыстабылын үтүөлээх үлэһитин бочуоттаах аата иҥэрилиннэ. Диспансер бастакы уочаратын тутууга кылаатын иһин СӨ Баһылыгын махтал суруктара производственнай отдел начальнигын солбуйааччы Валерий Филипповка, техническэй отдел начальнигын солбуйааччы Егор Неустроевка уонна СӨ Судаарыстыбаннай сакаасчыт сулууспатын производственнай отделын сүрүн инженерэ Семен Ивановка туттарылыннылар.
Радиология отделениетын аһыллыытынан доруобуйа харыстабылын миниистирэ Елена Борисова уонна 1984-1990 сылларга СӨ доруобуйа харыстабылыгар миниистирэ, 1970-1981 сс. диспансер кылаабынай бырааһа, үлэ ветерана, РФ үтүөлээх бырааһа Иван Местников эҕэрдэлээтилэр.
«Кинг-95» ХЭТ генеральнай директора Сос Варджапетян этэҥҥэ буолууну уонна ситиһиилээх үлэни баҕаран, саҥа дьиэ бэлиэ күлүүһүн диспансер кылаабынай бырааһа Лена Афанасьеваҕа туттарда.
Саҥа дьиэни аһыыга үгэс буолбут лиэнтэни кырыйар бочуоттаах быраап Саха сирин Баһылыгар Айсен Николаевка, өрөспүүбүлүкэ доруобуйа харыстабылыгар миниистирэ Елена Борисоваҕа уонна онкологическай диспансер кылаабынай бырааһа Лена Афанасьеваҕа бэрилиннэ. Тэрээһин дьиэни кэрийэн көрүүнэн түмүктэннэ.
Бу саҥа куорпус Россиятааҕы доруобуйа харыстабылын аныгы ирдэбиллэригэр эппиэттиир, ыарыһахтарга тупсаҕай усулуобуйалаах: киэҥ-куоҥ сырдык палааталар, киэҥ көрүдүөрдэр, сынньанар зоналар, ыарыһахтары кытта көрсөр хостор уо.д.а. бааллар.
Куорпуска аныгы эмтиир медицинскэй тэриллэр хааччыллыбыттар. Саҥа оборудованиеҕа Н.Н.Блохин аатынан Онкология национальнай медицинскэй чинчийэр киинигэр, ону сэргэ быстыбат профессиональнай үөрэхтээһин Россиятааҕы медицинскэй академиятыгар үөрэммит исписэлиистэр үлэлиэхтэрэ.
Бу саҥа радиологическай куорпус онкология салаатыгар үрдүк квалификациялаах медицинскэй көмөнү оҥоруу тииһимньилээх буолуутун уонна хаачыстыбатын балайда тупсарыаҕа. Ол курдук, бастатан туран, лучевой диагностикаҕа уочараты уонна лучевой терапия отделениетыгар эмтэнэ киириини күүтүү болдьоҕун сарбыйар кыахтар үөскүүллэр, иккиһинэн, искэни сардаҥанан тыктарыы саҥа ньымаларын киллэрии суотугар лучевой терапия мөлтөх сабыдыала аччыаҕа, ити онкологическай ыарыһахтар олохторо уһууругар итиэннэ олохторун хаачыстыбата тупсуутугар дьайыылаах буолуоҕа.

Мария Васильева түһэриитэ, СИА.