454
15 марта 2019 в 13:17
Сөмөлүөтүнэн олохтоох тиэйиини субсидиялааһын тула
Ил Түмэн Бэрэссэдээтэлэ Петр Гоголев салайааччылаах Саха сирин парламенын делегацията кулун тутар 12 к. “Уһук Илин уонна Забайкалье” Парламеннар ассоциацияларын уопсай мунньаҕар регион иһинээҕи сөмөлүөтүнэн тиэйиилэри субсидиялааһыны таарыйар өрөспүүбүлүкэ этиилэрин билиһиннэрдэ.
Ол курдук, пассажирдары салгын тырааныспарынан олохтоох (регионнааҕы) тиэйиини тэрийиигэ өйөбүлү оҥорор сыалтан Уһук Илиҥҥи федеральнай уокурук субъектарыгар туспа бырагырааманы оҥорорго Саха сирин парламентарийдара этии киллэрдилэр.
Ил Түмэн предпринимательствоҕа, туризмҥа уонна инфраструктура сайдыытыгар сис кэмитиэтин бэрэссэдээтэлэ Игорь Григорьев «Уһук Илин федеральнай уокурукка авиациянан тиэйиини субсидиялааһын” диэн этиитигэр ити туһунан иһитиннэрдэ.
Игорь Григорьев бэлиэтээбитинэн, Саха сирэ, бэйэтин иэнинэн Россия саамай бөдөҥ субъега, бүгүҥҥү күҥҥэ диэри ойдом олохсуйбут, тырааныспар сырыытыгар саамай эрэйдээх регионунан буоларын быһыытынан, ити экономика сайдыытыгар, ордук регионнар икки ардыларынааҕы уонна тас эргиэн сибээстэригэр туһаайыллар салааларга, ону сэргэ өрөспүүбүлүкэ нэһилиэнньэтигэр тырааныспар тииһимньилээх буолуутугар мөлтөхтүк сабыдыаллыыр.
«Саха сирин 10 тыһ. кв. км иэнигэр 1,7 км уопсай туһаныллар тимир суол тиксэр (Уһук Илиҥҥэ – 13, Россия үрдүнэн – 50 км). 1 тыһ. кв. км иэҥҥэ уопсай туһаныллар кытаанах бүрүөһүннээх массыына суола – 2,4 км (федерация субъектарын ортотугар 78-с миэстэ), бу Россия орто көрдөрүүтүттэн 11 төгүл намыһах уонна Уһук Илиҥҥи федеральнай уокурук орто көрдөрүүтүттэн — 2,3 төгүл», — диэтэ өрөспүүбүлүкэ народнай депутата.
Парламентарий бэлиэтээбитинэн, салгын тырааныспара гражданнар өрөспүүбүлүкэ иһигэр, атын региоҥҥа да көтөллөрүгэр альтернативата суох айанныыр кыахтарынан буоларын бэлиэтээтэ. Маныаха уматыгы тиэрдии уустугун кытта сибээстээх аэропортар үрдүк ставкалара, кыраһыын сыанатыгар ноҕуруускалар авиабилиэт сыаната үрдүүрүгэр сабыдыаллыыллар.
Олохтоох ис авиалинияларга тиэйиилэри субсидиялааһыҥҥа Саха сирин таһымыгар ылыллар дьаһаллар нэһилиэнньэ хамсааһыныгар дьайыылара кыра. Ол курдук, өрөспүүбүлүкэ иһинээҕи маршруттары ортотунан 964 км ыллахха, нэһилиэнньэ сөмөлүөтүнэн айаннааһына сылга 200 пассажир/килэмиэтиргэ тэҥ — Россия Федерациятын үрдүнэн орто көрдөрүүттэн 7 төгүл намыһах.
“РФ Бырабыыталыстыбатын 2013 с. ахсынньы 25 к. 1242 №-дээх уурааҕынан бигэргэммит субсидиялары биэрии Быраабылаларыгар Саха сирин 24 ыраах сытар нэһилиэнньэлээх пууна киллэриллибит. Маныаха нэһилиэнньэ аҕыйаҕынан, сирдэр икки ардылара ыраахтарынан, көтөр-түһэр балаһалар туруктара мөлтөҕүнэн, регионнар икки ардыларынааҕы быһа тиэйии 5 эрэ аэропортан оҥоһуллар. Онтон хаалбыт, сылы эргиччи авиациянан эрэ сибээстэһэр кыахтаах 19 нэһилиэнньэлээх пуун олохтоохторо авиациянан тиэйии федеральнай бырагырааматынан туһанар кыахтара, дьиҥэр, суох”, — диэн кэпсээтэ Игорь Григорьев.
Өрөспүүбүлүкэ парламена ити боппуруоһу Ил Түмэн Күннэрин ыытыы чэрчитинэн Федерация Сэбиэтин көрүүтүгэр таһаарбыта. Федерация Сэбиэтин «Саха Өрөспүүбүлүкэтин социальнай-экономическай сайдыытыгар судаарыстыба өйөбүлүн туһунан” 2017 с. ахсынньы 26 к. 626 №-дээх уурааҕынан сылы эргиччи сиринэн сибээстэһэр кыахтара суох нэһилиэнньэлээх пууннартан бөдөҥ куораттарга диэри аара аэропорка тохтоон, салгын аалын уларытан пассажирдары тиэйэр салгын тырааныспарын тэрилтэлэригэр федеральнай бюджеттан субсидияны аныыр кыаҕы көрөрүгэр РФ Бырабыыталыстыбата сорудахтаммыта.
РФ Бырабыыталыстыбатын 2018 с. олунньу 13 к. 150 №-дээх уурааҕынан, субсидиялары биэрии Быраабылаларыгар уларытыылар киллэриллибиттэрэ, ол иһигэр РФ субъегын бюджетыттан хос үбүлэнэр субсидияланар маршруттар кэрискэлэригэр сөмөлүөттэр аара түһэн ааһар, салгын аалын биир тиибин атыҥҥа уларытар маршруттара ордук быраабынан туһаналларын туһунан этиллэр. Маныаха сөмөлүөт айаҥҥа турунар пууна уонна аара түһэр пууна РФ араас субъектарын сирдэригэр баар буолуохтаахтар.
Онон ыраах сытар нэһилиэнньэлээх пууннартан Россия киин куораттарыгар диэри аара Дьокуускайга түһэн ааһар маршруттары субсидиялааһын боппуруоһа быһаарылла илигин, нэһилиэнньэ уруккутун курдук федеральнай бырагырааманан туһанар кыаҕа суоҕун парламентарий быһаарда. Ол курдук, аара сөмөлүөт түһэр сиринэн Дьокуускай куорат буолар, оттон сөмөлүөт айанын саҕалаабыт сириттэн аара түһэн ааһар пуунугар диэри маршрута биир субъект иһигэр баар буоллаҕына, ол субсидияламмат.
Манан сибээстээн Уһук Илиҥҥи федеральнай уокурук субъектарыгар салгын тырааныспарынан пассажирдары олохтоох тиэйиини тэрийиини өйүүр сыалтан Ил Түмэн туспа бырагырааманы оҥорорго этиилээх.