Саахалланар туруктаах дьиэлэртэн дьону көһөрүү

Ил Түмэн спикерэ Петр Гоголев баһылыктаах парламент делегацията Серебрянай Бор бөһүөлэгэр элбэх квартиралаах саҥа дьиэлэри тутуу хаамыытын билистэ.

Саха сирин тутууга миниистирин бастакы солбуйааччыта Галина Новикова бэлиэтээбитинэн, билигин Серебрянай Борга элбэх квартиралаах 5 дьиэ ситэриллибэккэ турар, олор 2017 с. ахсынньытыгар туттарыллыахтаахтар этэ. Бэйэтин эбэһээтэлистибэлэрин толорботох “Созвездие” тутар хампаанньаны кытта муниципальнай контракт көтүрүллүбүт.

Ити дуогабар 2016 сыл балаҕан ыйын 16 к. түһэрсиллибит. Тутуллар дьиэлэргэ 243 квартираҕа саахалланар туруктаах дьиэлэргэ олорор дьону көһөрүөхтээхтэр эбит. Ити квартиралар иһин бөһүөлэк 767 мөл. тахса солкуобайы номнуо төлөөбүт. Барыта 11 970 кв. м олорор дьиэ тутуллуохтааҕа.  Оттон тутар хампаанньа 2017 с. ахсынньы 25 к. үлэҕэ киллэриэхтээҕин толорботох.

Бөһүөлэк баһылыга Станислав Будуев эппитинэн, ити тутааччы дьайыыларыттан эмсэҕэлээбит дьону көһөрөр туһугар 2013-2017 сс. гражданнары саахалланар туруктаах олорор дьиэ фондатыттан көһөрүү бырагырааматыгар уларытыылар киллэриллибиттэр.

«Тутааччы ситэрбэтэх дьиэлэригэр көһөн киириэхтээх дьону биһиги иккис ырыынакка атыылаһыллыбыт квартираларга көһөрөбүт. 81 квар­тираҕа уопсайа 103 мөл. солк. суумаҕа контрактар номнуо түһэр­силлибиттэрэ, төлөбүрдэр бараллар, дьон көһөр. Квартиралары бө­һүөлэккэ бэйэтигэр да, куоракка да атыылаһабыт. Серебрянай Борга дьиэ иккис ырыынага кыра, онон квартиралар сорохторун Нерюнгрига булабыт», — диэтэ бөһүөлэк баһылыга.

Бу иннинэ Станислав Будуев бэлиэтээбитинэн, дьону иккис ырыынакка көһөрүү кэнниттэн, икки босхоломмут дьиэҕэ 7 мас дьиэттэн олохтоохтор киириэхтэрэ. Кинилэр көһөрүү бырагырааматыгар хапсыбатахтар.

Тутууну ситэрэр туһугар куонкурус түмүгэр саҥа бэдэрээтчит талыллыаҕа. Кини дьиэлэри ситэриэҕэ, кыратык былааннарын уларытыаҕа.

Парламент делегациятыгар бө­һүөлэк көтүрүллэр дьиэлэрдээх эргэ оройуонун көрдөрдүлэр. Спикер Петр Гоголев ыйытыытыгар хоруйдаан, бөһүөлэк баһылыга үгүс дьиэлэр 1975 сыл кэнниттэн тутуллубуттарын быһаарда. «Манна Нерюнгритааҕы ГРЭС тутааччылара олорбуттара. Дьиэлэр быстах кэмҥэ анаан хомуллубуттара, биллэн турар, хаарбах туруктаахтар. Дьону саахалланыан сөптөөх дьиэлэртэн көһөрүүгэ бырагыраама үлэлээбитигэр үгүстэр үөрбүттэрэ», — диэтэ Станислав Будуев.

Кини салгыы иһитиннэрбитинэн, бу микро-оройуоҥҥа биирдиилээн олорор дьиэлэр тутуллаллара былааннанар.