Саха сирэ – Арктика сүрэҕэ

Ил Түмэн Хоту сир аҕыйах ахсааннаах төрүт олохтоох норуоттарын уонна Арктика дьыалаларыгар, парламент ыччат дьыалаларыгар, физическэй култуураҕа уонна спорка сис кэмитиэттэрин бэрэссэдээтэллэрэ Елена Голомарева, Михаил Гуляев от ыйын 5 к. “Саха сирэ – Арктика сүрэҕэ” форум үлэтигэр кытыннылар.

Бу форум, өрөспүүбүлүкэ норуоттарын VII спортивнай оонньууларын чэрчитинэн, Сомоҕолоһуу сылыгар уонна Саха сирин 8 оройуонун РФ Арктикатааҕы зонатыгар холбооһуҥҥа ананан Аммаҕа буолан ааста. Модераторынан норуот дьокутаата Елена Голомарева буолла.
Тэрээһиҥҥэ итини сэргэ экономика миниистирэ Майя Данилова, Арктика сайдыытыгар уонна Хоту сир норуоттарын дьыалаларыгар миниистири бастакы солбуйааччы Сергей Неустроев, Орто Халыма уонна Анаабыр улуустарын баһылыктара, Үөһээ Дьааҥы, Эдьигээн, Эбээн-Бытантай оройуоннарын бэрэстэбиитэллэрэ кытыннылар.

Елена Голомарева Россия президенэ Владимир Путин “Арктика – территория диалога” IV Норуоттар икки ардыларынааҕы форумҥа эппит тылларын санатта: «Биһиги сыалбыт — Арктика туруктаах сайдыытын хааччыйыы, оттон бу – аныгы инфраструктураны үөскэтии, ресурсалары баһылааһын, бырамыысыланнас базатын сайдыыта, Хоту сир төрүт олохтоох норуоттарын олоҕун хаачыстыбата үрдээһинэ, кинилэр ураты култуураларын, үгэстэрин харыстааһын, итиниэхэ судаарыстыба өттүттэн харыстабыллаах сыһыан”.
Дьокутаат Саха сирин Баһылыга Айсен Николаев көҕү­лээһининэн Ил Түмэн Арктика оройуоннарын олохтоохторун тырааныспар нолуогуттан босхолуур туһунан сокуону ылыммытын бэлиэтээтэ.
Сергей Неустроев Арктика сайдыытыгар уонна Хоту сир норуоттарын дьыалаларыгар министиэристибэ үлэтин билиһиннэрдэ. Кини билигин 2030 сылга диэри СӨ Арктикатааҕы зонатын сайдыытын стратегията оҥоһулларын бэлиэтээтэ. «От ыйын ортотугар Россия экспердэрэ кыттыылаах стратегия бырайыагын дьүүллэһиигэ стратегическай сессия буолуоҕа. Онно Арктика оройуоннарын бары баһылыктарын көхтөөх кыттыыны ылалларыгар ыҥырабыт», — диэтэ кини.
Форум кыттыылаахтара Саха сирин Арктикатааҕы оройуоннарын сайдыытын сүрүн хайысхаларын дьүүллэстилэр. Норуот дьокутаата Михаил Гуляев дьүүллэһиигэ турбут боппуруостар сытыы суолталаахтарын уонна тоҕоостоохторун бэлиэтээтэ.
«Биһиги Халымаҕа олоруон, үлэлиэн баҕалаах бэйэбит дьоммутунан баайбыт. Ол туһугар сөптөөх усулуобуйалары тэрийиэх тустаахпыт. Онон өрөспүүбүлүкэ баһылыга Айсен Николаев биллэрбит Сомоҕолоһуу сыла биһиэхэ, хотугу дьоҥҥо, ураты суолталанар. Иннибитигэр билигин турар соруктары биһиги түмсэн эрэ быһаарыахпытын сөп», — диэтэ форуму көҕүлээччилэртэн биирдэстэрэ, Орто Халыма оройуонун баһылыга Евгений Слепцов.
Биир саамай сытыы боппуруоһунан Арктика олоҕор-дьаһаҕар федеральнай сокуоннар сөп түбэспэттэрэ ааттанна. «Арктика зонатын оройуоннарыгар туспа сокуоннар наадалар, олор хас биирдии оройуон ирдэбиллэрин учуоттаан ылыллыахтаахтар», — диэн Анаабыр оройуонун баһылыга Иван Семёнов эттэ.
Итини таһынан, форумҥа Арктика оройуоннарыгар цифровизация уонна тыа хаһаайыстыбатын сайдыытын боппуруостара көтөҕүлүннүлэр.

Сонуну тарҕатар ситимнэр,
Ил Түмэн пресс-сулууспатын
матырыйаалларынан уо.д.а.