563
05 мая 2018 в 10:45
Саха сирэ Уһук Илини уонна Арктиканы кэлимник сайыннарыыны салгыы утумнаахтык өйүүр
Муус устар 27 күнүгэр сокуону оҥорооччулар Сэбиэттэрин Федерация дьыалаларыгар, регионнааҕы бэлиитикэҕэ уонна олохтоох салайыныыга хамыыһыйатын үлэтин кэмигэр Саха сирин парламенын спикерэ Россия Федерациятын Уһук Илиҥҥи регионнарын уонна Арктикатааҕы зонатын социальнай-экономическай сайдыытын сокуонунан хааччыйыы боппуруоһугар этии оҥордо.
Саха сирин парламенын Бэрэссэдээтэлэ бэлиэтээбитинэн, Россия Президенэ Уһук илиҥҥи сирдэри уонна Арктика зонатын сайыннарыыга туруорбут соруктарын толорор туһугар тирэх буолар икки федеральнай сокуон барыла оҥоһуллубута. Ити барыллар Россия Федерациятын бөдөҥ сирин-уотун социальнай-экономическай сайдыытын судаарыстыба өттүттэн сүрүннээһин уонна өйөөһүн дьиҥнээх тутулун, ол эбэтэр макрорегион экэниэмикэтин, нолуок, бюджет эйгэтин, олоҕун-дьаһаҕын уратытын барытын хабар, бэйэтин туһугар Уһук Илин кодексын бөҕөргөтөр аналлаахтар.
Бу сокуоннары оҥорууну түргэтэтэр туһуттан Саха Өрөспүүбүлүкэтин Ил Түмэнэ өссө 2015 сыллаахха «Уһук Илин уонна Байкал регионун тэтимнээхтик сайыннарыы ураты усулуобуйаларын туһунан» уонна «Россия Федерациятын Арктикатааҕы зонатын экономическай сайдыытын ураты усулуобуйатын туһунан» федеральнай сокуоннары ылыныыны өйүүрүн биллэрбитэ, Федеральнай Мунньаҕы кытта тэҥҥэ үлэлэспитэ.
Ол гынан баран, билигин РФ Бырабыыталыстыбата Уһук Илин уонна Арктика сирдэрин сайыннарыыга биир кэлим буолбакка, быстах-быстах сокуоннары ылыныы суолун тутуста. Ол туһунан Александр Жирков: «Россия Федерациятын Бырабыыталыстыбата уонна РФ Федеральнай Мунньаҕын Судаарыстыбаннай Думата Уһук Илиҥҥэ сайдыы тустаах сирин-уотун уонна Арктикатааҕы тирэх буолар зоналары көҕүлээһиҥҥэ уонна өйөөһүҥҥэ туһуламмыт федеральнай сокуоннары биирдиилээн уларытыыны ылыныыларын Саха сирин Парламена утарбат. Ол гынан баран, Россия Федерациятын Уһук Илинин уонна Арктикатааҕы зонатын социальнай-экономическай сайдыытыгар тирэх буолар сокуоннары ылыныыны син биир туруорсар», – диэн иһитиннэрдэ.
Билэрбит курдук, 2013 сыл кулун тутар 13 күнүгэр Федерация Сэбиэтин Бэрэссэдээтэлэ Валентина Матвиенко дьаһалынан Уһук Илини уонна Байкаллааҕы региону сайыннарыы боппуруоһугар Россия Федерациятын сокуоннарын тупсарыыга этиилэри бэлэмнээһиҥҥэ үлэлиир бөлөх тэриллибитэ. Бу бөлөх састаабыгар Федерация Сэбиэтин чилиэннэрэ, Судаарыстыбаннай Дума дьокутааттара, Россия Федерациятын субъектарын бэрэстэбиитэллэрэ, специалистар киирбиттэрэ. Үлэлиир бөлөҕү Федерация Сэбиэтин бэрэссэдээтэлин солбуйааччыта Вячеслав Штыров салайар.
Соторутааҕыта Федерация Сэбиэтигэр эмиэ Вячеслав Штыров салалтатынан Арктика зонатын кэлим сайыннарыыга үлэлэһэр хамыыһыйа тэрилиннэ. Валентина Матвиенко дьаһалынан Ил Түмэн спикерэ бу хамыыһыйа састаабыгар киирдэ.
