Саха сирин көҕүлээһиннэрин тула

Бу көрсүһүүгэ РФ Госдуматыгар Саха сирин парламена киллэрбит сокуон барылларыгар көҕүлээһиннэрин боппуруостара дьүүллэһилиннилэр.

Саха сириттэн Госдума депутата, бастатан туран, өрөспүүбүлүкэ парламенын спикерин уонна кини коллегаларын – алтыс ыҥырыыга норуот депутаттарын үлэлэрэ саҕаламмытынан эҕэрдэлээтэ.

Галина Данчикова Ил Түмэн бу иннинээҕи ыҥырыытын кытта ыллыктаах үлэ барбытын, биэс сыл устатыгар Саха сирин парламена өрөспүүбүлүкэ олоҕун бары эйгэтин сокуонунан сүрүннээһиҥҥэ бэйэтин кылаатын улаатыннарбытын уонна федеральнай сокуоннары оҥорууга көхтөөхтүк кыттыбытын иһитиннэрдэ.

Салгыы кини бүгүҥҥү күҥҥэ федеральнай таһымҥа көрүллэр өрөс­пүү­бүлүкэ сокуону оҥорууга көҕүлээ­һиннэрин туһунан иһитиннэрдэ. Ил Түмэн депутаттара Госдумаҕа туһаайыллыбыт көҕүлээһиннэри сиһилии көрөллөрө итиэннэ ханнык сокуон барылларын бастакы суолталааҕынан ааҕан үлэлииллэрин быһаараллара наадалааҕын бэлиэтээтэ.

Федеральнай Мунньахха Саха сирин сокуону оҥорууга көҕүлээһиннэрин хамсатыыга салгыы бииргэ үлэлээһини уонна ол үлэ көрүҥнэрин быһаарсыыны дьүүллэһэр сыалтан Госдума депутата Ил Түмэн сис кэмитиэттэрин бэрэссэдээтэллэрин кытта көрсүһүүтүн боппуруоһа туспа көрүлүннэ.

Ил Түмэн Бэрэссэдээтэлэ Петр Гоголев толору ис хоһоонноох кэпсэтиитин иһин Галина Данчиковаҕа махтанна. Кини бэлиэтээбитинэн, Саха сирин парламенын алтыс ыҥырыыта үлэлииргэ бэлэм. «Сыаллар-соруктар бааллар. Бүгүн Саха сирин парламена РФ Президенэ Федеральнай Мунньахха туһаайан этиитигэр уонна Саха Өрөспүүбүлүкэтин Баһылыга бырагырааматын туһунан этиитигэр туруоруллубут соруктары бэйэтин боломуочуйаларын чэрчитинэн толорууга бэлэм. Бу үлэ түмүктээх буоларын туһугар биһиги утумнаах уонна инникигэ туһаайыллар хардыылары быһаарыахтаахпыт», — диэн бэлиэтээтэ Петр Гоголев.

Алтыс ыҥырыылаах парламент үлэтин сүрүн хайысхаларын ортотугар кини өрөспүүбүлүкэҕэ ылыллар сокуоннар аакталарын хаачыстыбатыгар уонна олоххо киириилэригэр хонтуруолу уонна мониторины ааттаата.

Итини таһынан, Петр Гоголев Ил Түмэн иһинэн урукку ыҥырыыларга спикердэр, Госдума депутаттара, Федерация Сэбиэтин чилиэннэрэ кыттыылаах сүбэлэһэр уорган тэриллиэҕин иһитиннэрдэ. Регион нэдиэлэтин чэрчитинэн Галина Данчикованы актыыбынай кыттыыны ыларыгар уонна бу сэбиэт үлэтигэр сытыы суолталаах федеральнай бэбиэскэни сырдатарыгар ыҥырда.