Спикер профессор Но Тэ Чолу кытта көрүстэ

Көрсүһүүнү аһарыгар, Ил Түмэн спикерэ ыалдьыкка Саха сиригэр парламентаризм историятын туһунан кылгастык кэпсээтэ, үлэ былаанын, саҥа талыллыбыт алтыс ыҥырыылаах депутаттар корпустарын састаабын уонна тутулун  билиһиннэрдэ. Тойон Но Тэ Чолу эҕэрдэлээн туран, парламент Бэрэссэдээтэлэ Петр Гоголев Саха сирин музыкальнай искусствотын аан дойдуга, Саха сиригэр аан дойду классическай музыкатын сырдатыыга, ону сэргэ СӨ бастакы президенэ Михаил Николаев көҕүлээһининэн “Музыка для всех”, “Неделя музыки” бырайыактары сайыннарыыга ыытар үлэтин иһин ураты махталын биллэрдэ.

Бэйэтин өттүттэн тойон Но Тэ Чол өрөспүүбүлүкэ улуустарыгар уонна оройуоннарыгар оҕолору музыкаҕа үөрэтиигэ табыгастаах усулуобуйалары үөскэтии туһунан санааларын үллэһиннэ. Кини этэринэн, чуолаан миэстэтигэр, ыраах сытар нэһилиэктэргэ, дэриэбинэлэргэ талааннаах оҕолору үрдүк искусствоҕа сыһыарыыны саҕалыыр, маныаха ону үрдүк таһымҥа уонна араас өрүттээхтик үөрэтэр наада.

«Мин үгүс сылларга Европаҕа уонна Америкаҕа үөрэммитим уонна үлэлээбитим, оттон Россияҕа, чуолаан Саха сиригэр кэлэн баран, дьиҥнээх миэстэбин буллум, дууһалыын уоскуйдум. Манна кэриэй быһыытынан буолбакка, Саха сирин киһитин курдук сананабын», — диэн бэлиэтээтэ кини. Маны сэргэ маэстро Саха сиригэр норуоттар икки ардыларынааҕы бөдөҥ музыкальнай бырайыактары тэрийиигэ бэйэтин идеяларын үллэһиннэ. Кини санаатынан, маннык тэрээһиннэри ыытыы, ол иһигэр туризм өттүнэн региону таһаарыыга сулууспалыаҕа. Түмүккэ профессор Саха сирин парламенын спикерин алтынньы 8-9 күннэригэр “Сэргэлээх уоттара” Культура киинигэр буолуохтаах хормейстердар семинар-практикумнарын уонна I Норуоттар икки ардыларынааҕы «Ариранг» хордар парадтарын аһыыга кыттарыгар ыҥырда.

Көрсүһүүнү түмүктээн, Ил Түмэн Бэрэссэдээтэлэ Петр Гоголев тойон Но Тэ Чолга Саха сирин уонна омук сирдэрин музыкальнай эргимтэлэрин кытта айар дьарыкка, үөрэхтээһиҥҥэ сыһыаннары бөҕөргөтүүгэ уонна сайыннарыыга үлэтигэр ситиһиилэри баҕарда.

«Музыкаҕа сыһыарыы биһиэхэ, бастатан туран, духуобунай өттүнэн баай киһини иитэр кыаҕы биэрэр, кини түмүгэр биһиги Ийэ сирбитин араҥаччылыаҕа», — диэн бэлиэтээтэ парламент спикерэ.