Суоттуга саҥа оскуола — икки сылынан

Аны икки сылынан Уус Алдан улууһун Суотту орто оскуолата саҥа дьиэҕэ үлэлиир кыахтанна – 220 миэстэлээх үөрэх кыһатын дьиэтин тутуу 2021 сылга түмүктэниэхтээх. Ити туһунан өрөспүүбүлүкэ салалтатын официальнай делегацията олунньу 6 күнүгэр бу оройуоҥҥа үлэлиир кэмигэр иһитиннэрилиннэ.

Делегация састаабыгар – Судаарыстыбаннай Мунньах (Ил Түмэн) бэрэссэдээтэлэ Петр Гоголев, миниистирдэр кабинеттарын баһылыга Владимир Солодов, парламент бастакы вице-спикерэ Александр Жирков, норуот депутаттара, министиэристибэлэр уонна биэдэмистибэлэр, тэрилтэлэр салайааччылара уонна эппиэттээх үлэһиттэрэ бааллар.

Бу айаннара саҕаланыытыгар Дьокуускайтан ыалдьыттар Суотту сэлиэнньэтигэр оскуола туруохтаах миэстэтигэр сыбаайалары көрдүлэр. Ил Түмэн Бэрэссэдээтэлэ Петр Гоголев уонна Уус Алдан улууһун дьаһалтатын баһылыга Алексей Федотов 2013 сылга оскуола үөрэтэр корпуһун өһүөтэ сууллубутун туһунан Владимир Солодовка кэпсээтилэр. Ити төрүөттэн дьиэ туһаныллара табыгаһа суоҕунан билиниллэн, көтүрүллүбүтэ.

Билигин, номнуо бэһис сылын, бэйэ-бэйэлэриттэн ыраах-ыраах турар 6 дьиэҕэ: начаалынай оскуолаҕа, спорт саалатыгар, эргэ, үөрэнэр мастарыскыайга, производственнай мастарыскыайдарга, эргэ интернакка, үөрэх-оҥорон таһаарыы хаһаайыстыбатыгар оҕолору үөрэтии ыытыллар. 2018-2019 үөрэх дьылыгар 12 комплект-кылааска 196 оҕо үөрэнэр.

“2016-2022 сылларга уонна 2026 сылга диэри былааннаммыт кэмҥэ Саха Өрөспүүбүлүкэтигэр үөрэх сайдыыта” судаарыстыбаннай бырагыраама “Россия Федерациятын субъектарыгар уопсай үөрэх тэрилтэлэригэр саҥа миэстэлэри үөскэтиини (ол иһигэр хапытаалынай өрөмүөн) өйүүр тэрээһиннэри Саха Өрөспүүбүлүкэтигэр олоххо киллэрии” хос бырагырааматыгар оскуола тутуута көрүллүбүтэ.

Симиэтэтин сыаната – 453 398,24 тыһ. солк., ол иһигэр федеральнай бюджеттан – 60 948,64 тыһ. солк., өрөспүүбүлүкэ бюджетыттан – 392 449,60 тыһ. солк.

«Чугастааҕы кэмҥэ Уус Алдан улууһун дьаһалтата бэдэрээтчити быһаарыыга куонкурус биллэриэҕэ, тутуу болдьоҕор түмүктэниэх тустаах», — диэтэ миниистирдэр кабинеттарын баһылыга Владимир Солодов. Кини бырайыагы олоххо киллэрии хаамыытыгар тутуу сыаната үрдээбэтин туһугар болҕомтону туһаайда. «Биһиги бэйэбит өттүбүтүттэн бары эбэһээтэлистибэлэри толоруохпут», — диэн эбэн эттэ.

Делегация састаабыгар парламент ДьУоКХ уонна тутууга сис кэмитиэтин бэрэссэдээтэлэ Яков Ефимов, норуот депутаттара Петр Аммосов, Геннадий Васильев, Иван Слепцов, Владимир Черноградскай бааллар.

Өнөр оскуолатыгар үлэ усулуобуйаларын билсэ

Ил Түмэн спикерэ Петр Гоголев уонна СӨ Бырабыыталыстыбатын бэрэссэдээтэлэ Владимир Солодов баһылыктаах Саха сирин парламенын уонна бырабыыталыстыбатын делегацията олунньу 6 к. Уус Алдан улууһун Эһэлээх сэлиэнньэтигэр Өнөр орто оскуолатын үлэлиир усулуобуйаларын кытта билистэ.

Биэс сыллааҕыта үөрэх тэрилтэтин дьиэтэ саахалланар туруктаах буолан сабыллыбыта. Билигин оскуола 80 үөрэнээччитэ үс араас миэстэҕэ дьарыктаналлар: спорт саалатыгар, массыына мастарыскыайыгар уонна 4 квартиралаах дьиэҕэ.

Оскуола директора Василий Борисов Петр Гоголевка уонна Владимир Солодовка үөрэнэр кабинекка уларытыллыбыт, 5-6 паарталаах кыараҕас хостору көрдөрдө.

Спорт саалатыгар үөрэнээччилэри уонна оскуола кэлэктиибин кытары көрсүһүү буолла. Ыалдьыттар иннилэригэр 6-с кылаас үөрэнээччитэ Михаил Лукачевскай тахсан, үөрэх тэрилтэтин историятын, ситиһиилэрин билиһиннэрдэ.

Үөрэнээччи итини сэргэ Россия Геройа Михаил Стрекаловскай кэриэһигэр анаммыт фонданы аһыы туһунан кэпсээтэ. Мунньуллубут харчыга оҕолор өйдөбүнньүк сквери сөргүтэн оҥорор былааннаахтар.

«Оскуолабыт бары үөрэнээччилэрин аатыттан уонна тус бэйэм ааппыттан мин өрөспүүбүлүкэ салалтатыттан биһиэхэ саҥа оскуоланы туттаралларыгар көрдөһүөм этэ», — диэн бырабыыталыстыба чилиэннэригэр уонна норуот депутаттарыгар туһаайан Миша Лукачевскай эттэ.

Онуоха миниистирдэр кабинеттарын баһылыга Владимир Солодов Өнөр орто оскуолатын кыһалҕата бырабыыталыстыба хонтуруолугар буолуоҕун уонна саҥа дьиэни тутуу туһунан быһаарыы номнуо быйыл ылыллыаҕын туһунан хоруйдаата.

«Биллэн турар, эһиги манна үөрэнэр усулуобуйаҕыт олус үчүгэй буолбатаҕын көрөбүт, онон эһиэхэ бастыҥ усулуобуйалары үөскэтэр туһугар үлэлэһиэхпит. Уустуктар баалларын үрдүнэн, эһиги үөрэххитигэр олус үчүгэй ситиһиилэрдээххитин нэһилиэк баһылыгыттан уонна оскуола директорыттан астына иһиттим. Онон эһигини эҕэрдэлиибин уонна салгыы ситиһиилэри баҕарабын», — диэн эбэн эттэ Владимир Солодов.

Бу сырыы түмүгэр парламент уонна бырабыыталыстыба делегациятын чилиэннэрэ Россия Геройа Михаил Михайлович Стрекаловскай кэриэһигэр анаммыт фондаҕа үбү хомуйуу акциятыгар кыттыстылар.

Оскуола тутуута эмиэ “2016-2022 сылларга уонна 2026 сылга диэри былааннаммыт кэмҥэ Саха Өрөспүүбүлүкэтигэр үөрэх сайдыыта” судаарыстыбаннай бырагыраама “Саха Өрөспүүбүлүкэтигэр уопсай үөрэх тэрилтэлэригэр саҥа миэстэлэри үөскэтиигэ көмөлөһүү” хос бырагыраама чэрчитинэн көрүллүбүтэ.

Оскуола тутуутун сметатын сыаната 152 749,80 тыһ. солк. тэҥнэһиэҕэ, ол иһигэр федеральнай бюджеттан – 135 947,32 тыһ. солк., өрөспүүбүлүкэ бюджетыттан – 16 802,48 тыһ. солк.

Ил Түмэн пресс-сулууспатын

матырыйаалынан.

Анатолий Шестаков хаартыскаҕа түһэриитэ