883
15 июня 2018 в 14:19
Сындыыстана көтөллөрө буоллар даа…
Аччыгый авиация дойду үрдүнэн биир саамай кыһалҕалаах балаһыанньалаах салаалартан биирдэстэринэн буолар. Ол да иһин, боппуруос бытааннык быһаарыллар. Өрөспүүбүлүкэбитигэр бу тыын суолталаах боппуруоһу туруорсуунан норуот депутаттара дьарыктаммыттара ыраатта. Кырдьык, киэҥ сиринэн тайаан сытар, мөлтөх суоллаах төрөөбүт дойдубутугар “дьоҕус сөмөлүөттэр сындыыстана көтөллөрө буоллар даа” диэн киһи эрэ барыта ыра санааланар.
Бэс ыйын 13 күнүгэр бу сытыы тиэмэҕэ экономическай, инвестиционнай, промышленнай политикаҕа, предпринимательствоҕа, туризмҥа уонна инфраструктура сайдыытыгар Ил Түмэн сис кэмитиэтин бэрэссэдээтэлэ Виктор Федоров, Өрөспүүбүлүкэ аччыгый авиациятын ассоциациятын бэрэссэдээтэлэ Иван Лукин суруналыыстары кытары көрүстүлэр.
Бэлиэтээһин
Өрөспүүбүлүкэ 34 улууһуттан 25-һэ киини уонна чугас сытар улуустары кытта сибээстэһэр үчүгэй суола-ииһэ суох. Барыта 629 нэһилиэнньэлээх пуунтан 44% — ыраах сытар кырыы учаастактар. Оттон 1989 сыллаахха олохтоох авиалиниянан барыта 1,5 мөлүйүөн пассажир таһыллыбыт буоллаҕына, 2016 сылга ити сыыппара 290 тыһыынчаҕа эрэ тэҥнэспит.
Кинилэр, бастакытынан, аччыгый авиация салаатыгар көрсүллэр ороскуоттар туһунан кэпсээтилэр. Билигин көтөр аал мотуорун хас биирдии ат күүһүн көрдөрүүтүгэр нолуок быһыытынан 250 солк. төлөнөр. Ассоциация уонна депутаттар үлэлэһэннэр нолуогу 10 төгүл кыччаппыттар. 2019 сылтан сөмөлүөт хас биирдии ат күүһүн көрдөрүүтүгэр 25 солк. эрэ төлөнөр буолуоҕа. РФ үпкэ миниистиэристибэтэ аэропорт хомуурун кыччаппытын түмүгэр кэлэр сылларга тарыып 15% кыччыан сөп. “Сир сокуонунан тыа сиригэр “сельхозугодье” диэн статустаах сиргэ дьоҕус сөмөлүөт түһэр портун оҥорор көҥүллэммэт этэ. РФ аччыгый авиациятын ассоциацията туруорсан, сир кодексыгар көннөрүү киллэриллэрэ күүтүллэр”, — диэн Виктор Федоров иһитиннэрдэ.
Тас дойдулартан көтөр ааллары атыылаһыы бүддьүөккэ охсуулааҕын туһунан кэпсээтилэр. Ол курдук, таможняҕа тас дойдуттан киирэр көтөр аал 12,9% нолуогунан түһэриллэр. Оччотугар икки нолуогу кытары (НДС) импортнай көтөр аал 35% үрдээн кэлэр. Ол иһин аччыгый авиацияҕа билет сыаната үрдүк. “Биһиги ассоциациябытыгар баар 23 киһиттэн 11-рэ – норуот депутаттара. Онон сокуоннарга көннөрүүлэри киллэрэн, аччыгый авиация сайдыытыгар баар мэһэйдэри суох гынарга үлэлэһиэхпит”, — диэн Иван Лукин эттэ. Санатар буоллахха, бу этиллибит нолуоктар тас дойду көтөр аалларыгар эрэ сыһыаннаах. Олохтоох сөмөлүөттэргэ уонна бөртөлүөттэргэ эбии сыанаҕа нолуогу (НДС) суох оҥорор туһунан быһаарыыны РФ Бырабыыталыстыбатыгар көрөллөр.
Маны таһынан Виктор Федоров аччыгый авиация салаатын чааһынай предпринимателлэргэ тоҕоостоох оҥорор кэм кэлбитин туһунан эттэ. “Билигин бу хайысхаҕа уларыйыылары салгын кодексыгар уонна федеральнай авиация быраабылаларыгар киллэрэр туһунан кэпсэтии барар”, — диэн эттэ.
