Виталий Измеров аатынан уулусса баар буолла

Бу тэрээһиҥҥэ Ил Түмэн Бэрэссэдээтэлин солбуйааччы Виктор Губарев, норуот депутата Владимир Федоров, СӨ ис дьыалаҕа миниистирэ Владимир Прокопенко, киин куорат Думатын Бэрэссэдээтэлэ Александр Саввинов, Виталий Измеров коллегалара, доҕотторо уонна аймахтара сырыттылар.

Виктор Губарев тыл этэригэр Россия буруйу оҥорооччулары көрдүүр историятыгар  Виталий Измеров номоххо киирбит киһинэн буоларын кэпсээтэ. Кинини бэйэлэрин учууталларынан уонна наставниктарынан үгүс полицейскай ааҕар. Ол курдук идэтигэр билиитэ-көрүүтэ, сатабыла үрдүк уонна киһи сөҕөр үлэһит буоларынан, ураты ыарахан буруйу оҥорууну, буккуурдаах дьыалалары арыйара.

Дьыалатыгар бэриниилээҕин, буруйу оҥорууну утары эйэлэспэтин, сиэрдээҕин уонна бэйэтэ тутуһар санааларыттан халбаҥнаабатын иһин кинини коллегалара Комиссарынан ааттыыллара.

Виталий Константинович атын дьон көхсүгэр саспакка, өрүүтүн охсуһуу инники күөнүгэр сылдьара. 90-с дьалхааннаах сылларга кини тэрээһиннээх буруйу оҥорууну утары охсуһууга Управлениены салайбыта. Чуолаан кини салалтатынан РУБОП бандьыыттарга, рэкетирдарга уонна холуобунай аптарытыаттарга кутталы үөскэппитэ — криминал тэнийиитин сүрүн долгунун саба баттаабыта. Чуолаан кини уонна табаарыстара гражданнары тэрээһиннээх буруйу оҥорууттан көмүскээбиттэрэ, өрөспүүбүлүкэ экономикатын суолталаах салааларын криминалтан хаххалаабыттара, былаас эргимтэтигэр буруйу оҥорбуттар өтөн киириилэригэр мэһэйи үөскэппиттэрэ.

Астаапкаҕа тахсан баран, Виталий Константинович “Саха Өрөспүүбүлүкэтин күндү металларга уонна таастарга кэмитиэтэ” ГУП салайааччытын куттал суох буолуутугар солбуйааччытынан үлэлээбитэ.

Кини бэртээхэй спортсмен, Саха сирин үтүөлээх тренерэ этэ, үгүс сылларга Саха сирин самбоҕа Федерациятын салайбыта. Виталий Константинович ыччакка бэйэтин үөрүйэхтэрин тиэрдэрэ — Норуоттар икки ардыларынааҕы полицейскайдар ассоциацияларын Россиятааҕы секциятын юридическай колледжын Саха сиринээҕи филиалын вице-президенинэн буолан, кэнэҕэски полицейскайдары бэлэмнээһиҥҥэ ыйааһыннаах кылаатын киллэрбитэ.

“Виталий Константинович туһунан өйдөбүл биһиги сүрэхпитигэр эрэ буолбакка, биһиги дьыалаларбытыгар эмиэ хаалыаҕа. Буруйу оҥоруу намтыырын, коррупция сүтэрин туһугар, биһиги кыаллары барытын оҥоруохпут. Виталий Константинович үтүө аатын түһэн биэриэхпит суоҕа. Өссө төгүл сэбиэскэй милиция, Саха сирин милициятын күнүнэн! Дойдубутугар ситиһиилэри уонна бэрээдэги баҕарабын!”, — диэн мустубут дьону Виктор Губарев эҕэрдэлээтэ.