Юрий Готовцев төрөөбүтэ 80 сылыгар

Саха сиригэр САССР Үрдүкү Сэбиэтин X, XI, XII ыҥырыыларын дьокутаата, өрөспүүбүлүкэ Ил Түмэнин II, III ыҥырыыларыгар норуот дьокутаата, РСФСР эргиэнин үтүөлээх үлэһитэ, Саха сирин норуотун хаһаайыстыбатын үтүөлээх үлэһитэ, Өймөкөөн, Муома уонна Орто Халыма оройуоннарын бочуоттаах гражданина Юрий Александрович Готовцев аатын үйэтитиигэ тэрээһиннэр буолуохтара.

Ил Түмэн Бэрэссэдээтэлэ Петр Гоголев дьаһалынан үбүлүөй тэрээ­һиннэрин бэлэмнээн ыытыыга үлэлиир хамыыһыйа тэрилиннэ, ону парламент вице-спикерэ Антонина Григорьева салайар. Кини бэлиэтээбитинэн, парламент былааннаммыты олоххо киллэриигэ күүһүн-уоҕун барытын ууруоҕа, тэрээһини үрдүк таһымҥа ыытыаҕа.
Юрий Готовцев төрөөбүтэ 80 сылыгар аналлаах кэриэстэбил киэһэтэ алтынньы 7 к. Дьокуускайга буолуоҕа. Сотору кэминэн тэрээһин сценарийыгар үлэ саҕаланыахтаах, Юрий Александрович олоҕун уонна үлэтин туһунан дакылаат бэлэмнэниэҕэ.
Былаан быһыытынан, мемориальнай дуосканы туруоруу боппуруоһа көрүлүннэ.
Итини таһынан, мунньах кыттыылаахтара Дьокуускайдааҕы сервис технологическай техникумун кэлэктиибин уопсай мунньаҕын ыытан, онно Юрий Готовцев аатын үөрэх тэрилтэтигэр иҥэрэр туһунан боппуруоһу көтөҕөн, өрөспүүбүлүкэ салалтатын көрүүтүгэр киллэрэри бэлиэтээтилэр.
Муниципальнай оройуоннар (улуустар) баһылыктарыгар, бэрэстэбиитэллээх уорганнар салайааччыларыгар Юрий Готовцев аатын үйэтитиигэ тэрээһиннэр былааннарын оҥороллоругар уонна кини төрөөбүтэ 80 сылыгар аналлаах кэриэстэбил биэчэрдэрин ыыталларыгар официальнай этии туһаайыллыаҕа.

Ыспыраапка

Готовцев Юрий Алек­­­сан­­дро­вич 1939 с. алтын­ньы 7 к. Өймөкөөн оро­йуонун I Бороҕон нэһилиэгэр төрөө­бүтэ.
1958 сылга Дьокуускайдааҕы кооперативнай техникуму, 1966 сылга – Москваҕа Г.В.Плеханов аатынан норуот хаһаайыстыбатын институтун бүтэрбитэ. Юрий Александрович Хаҥалас оройуонугар тыа сирин кооперациятыгар, Аллараа Халымаҕа – судаарыстыбаннай эргиэҥҥэ үлэлээбитэ.
1974 сылтан – Саха АССР Госснабын начальнигын солбуйааччыта. 1978 сылтан – Якутгорпромторг директора. 1981 с. – САССР эргиэҥҥэ миниистирэ. 1989 с. – ССРС уонна РСФСР тас экономическай сибээстэргэ миниистирин Саха сиригэр бэрэстэбиитэлэ. 1992 с. – СӨ үлэҕэ уонна нэһилиэнньэ социальнай көмүскэлигэр миниистирин бастакы солбуйааччыта, Пенсия сулууспатын департаменын директорын солбуйааччыта.
1997-2008 сс. – СӨ Судаарыстыбаннай Мунньаҕын (Ил Түмэн) үлэҕэ, социальнай политикаҕа уонна ветераннар дьыалаларыгар сис кэмитиэтин бэрэссэдээтэлэ.
САССР Үрдүкү Сэбиэтин X, XI, XII ыҥырыыларын дьокутаата, өрөспүүбүлүкэ Ил Түмэнин II, III ыҥырыыларыгар норуот дьокутаата.
РСФСР эргиэнин үтүөлээх үлэһитэ, Саха сирин норуотун хаһаайыстыбатын үтүөлээх үлэһитэ, Өймөкөөн, Муома уонна Орто Халыма оройуоннарын бочуоттаах гражданина.

Ил Түмэн вице-спикерэ Антонина Григорьева салайан ыыппыт хамыыһыйа мунньаҕар тэрээһин боппуруостары дьүүллэстилэр. Тэрээһиннэр быйыл алтынньыга Дьокуускайга, Өймөкөөн, Муома уонна Орто Халыма оройуоннарыгар ыытыллаллара былааннанар. Соторутааҕыта Антонина Григорьева уонна Родион Фёдоров хомуйууларынан кинигэ күн сирин көрдө. Бу таһаарыыга Юрий Готовцев олоҕо уонна үлэтэ сырдатыллар. Кинигэ “Саха Өрөспүүбүлүкэтин уһулуччулаах дьоно” серияҕа таҕыста.
Өрөспүүбүлүкэ народнай дьокутааттара Владимир Чичигинаров, Любовь Явловская, СӨ наукаҕа уонна үөрэххэ министиэристибэтин орто идэлээх үөрэххэ отделын салайааччытын э.т. Айаал Докторов, «Ил Түмэн» хаһыат кылаабынай редактора Наталья Попова, СӨ норуоттарын аудиовизуальнай нэһилиэстибэтин Национальнай киинин директора Бэргэн Парников, Дьокуускайга Өймөкөөн улууһуттан биир дойдулаахтар түмсүүлэрин салайааччыта Анна Атастырова, «Чысхаан» түмсүү салайааччыта Иннокентий Сивцев, Саха сирин араас ыҥырыылаах народнай дьокутааттара Александр Подголов, Родион Федоров, Дмитрий Горохов, Сергей Сюльскай уо.д.а. дьүүллэһиигэ кытыннылар.

Ил Түмэн пресс-сулууспата.