Андрей Турчак: “Баартыйа маннааҕы салаатын үлэтэ ааппытын-суолбутун үрдэтэр”

Мунньахтар сабыылаах ньыманан ыытылыннылар. Түмүгэр Андрей Турчак суруналыыстары кытта көрүстэ. Кини Саха сиригэр ыытыллыбыт мунньахха көтөҕүллүбүт боппуруостары чопчулаата. “Баартыйа салайар уорганнарыгар регионнар бэрэстэбиитэллэрэ хото киириэхтээхтэр. Ону сэргэ үбүлээһин улаатыннарыллан, эрэгийиэннээҕи  салаалар үлэлэрэ күүһүрдүллүөхтээх, бастыҥ үлэлээх маҥнайгы сүһүөх тэрилтэлэр куоластара иһиллиэхтээх. Билигин регионнар  икки ардыларынааҕы сүрүннүүр сэбиэттэр (МКС) быыбардыыр уокуруктарга баайылла сылдьалларын уларытан, урукку ситими сөргүтэн, федеральнай уокуруктарга сыһыарыахпыт. Баартыйа бырайыактарын сааһылыыр уолдьаста, онон Саҥа дьылга диэри аудит ыытыллыаҕа. Ол түмүгэр күн бүгүн баар 25 бырайыактан төһөтө ордуоҕун этэр уустук. Саамай тыын суолталаахтар хаалыахтара, сорох бырайыактар хайысхаларынан көрөн холбонон, бөҕөргөтүллэн биэриэхтэрэ. Баартыйа ис платформалара үлэни-хамнаһы регионнар икки ардыларынааҕы таһымынан тэрийэллэригэр уонна регионнартан тахсар идиэйэлэри, көҕүлээһиннэри хамсатар күүс буолалларыгар ирдэбил туруоҕа”, — диэн эттэ.

Андрей Турчак Саха сиригэр кэлбит соруктарыттан биирдэстэринэн регионнааҕы баартыйалар салайааччыларын кытта билсиһии буоларын ыйда. “Айаммын Саха сириттэн саҕалаабытым мээнэҕэ буолбатах. “Биир ньыгыл Арассыыйа” маннааҕы  салаата көдьүүстээхтик үлэлиирин көрдөрөн, баартыйа аатын-суолун үрдэтиигэ биллэр кылаатын киллэрэр”, —  диэн бэлиэтээтэ. Кини Саха сиригэр социальнай эбийиэктэри кытары ситимнээх бырайыактар көдьүүстээхтик олоххо киирэллэрин көрбүтүн туһунан суруналыыстары кытта үллэһиннэ.
Дьокуускайга икки күн устата “Биир ньыгыл Арассыыйа” политическай баартыйа мунньаҕын үлэтэ толору ис хоһоонноохтук ыытылынна. Мунньахха “Биир ньыгыл Арассыыйа” Саха сиринээҕи салаатын актыыбын кытта кулун тутар уонна балаҕан ыйдарыгар буолуохтаах быыбардарга бэлэмнэниини дьүүллэстилэр. Андрей Турчак быһаарбытынан, баартыйа иһинээҕи куоластааһын муҥутуур аһаҕас буолара күүтүллэр.
Андрей Турчак өрөспүүбүлүкэ Баһылыгын Егор Борисовы кытары көрүстэ. Кини өрөс­пүүбүлүкэҕэ “Биир ньыгыл Арассыыйа” политическай баартыйа култуураҕа, оҕо спордугар, куораттары тупсарыыга, уһуйааннар дьиэлэрин тутууга туһуламмыт элбэх бырайыактара олоххо киллэриллэллэрин бэлиэтээн туран, Егор Борисовка махтанна уонна баартыйа Уһук Илин федеральнай уокурукка регионнааҕы салааларын сэкирэтээрдэрин, ситэриилээх кэмитиэттэрин салайааччыларын мунньаҕын ыытар сиринэн Дьокуускайы талбыттарын эттэ.

Саха сиригэр сырыытын бүтэһик күнүгэр Андрей Турчак Егор Борисовы кытары Нам улууһугар тахсан, спортивнай, култуурунай олоҕу көрдүлэр-иһиттилэр. Намҥа буола турар волейболга күрэхтэһиини көрдүлэр, Хамаҕатта спортивнай саалатыгар сырыттылар. Санатар буоллахха, “Биир ньыгыл Арассыыйа” баартыйата бу саалаҕа анаан 13 мөл. солк. суумалаах тэрил атыыласпыта. Салгыы Кыһыл дэриэбинэҕэ тутулла турар култуурунай, спортивнай саалалардаах киини көрдүлэр.