«Барыларын утарабын» графа оннунан хаалар буолла

Биир саамай мөккүөрдээх боппуруоһунан 9-с пуунунан сылдьар «Саха Өрөспүүбүлүкэтин муниципальнай быыбарын туһунан» сокуоҥҥа уларытыыны киллэрии, чуолаан «барыларын утарабын» диэн графаны суох оҥоруу буолла.
Бу графа быыбардааччылар баһылык дуоһунаһыгар сөптөөх кандидат турбата дии саныыр буоллахтарына, иккиһин быыбары ыытан, бэйэлэригэр сөптөөх киһини талан ылалларыгар кыаҕы биэрэр. Ол эрээри сорох ардыгар бу манан туһанан быыбары ыһан, талыллыахтаах да киһини талбакка хаалар түгэннэрэ эмиэ баар.
Итиэннэ үгүс депутат бу графа ылыллыан кэриэтэ, быыбардааччыны кытта үлэ үчүгэйдик барыахтаах, оччоҕо быыбар сөптөөхтүк, ыраастык барыаҕа диэн санааларын эттилэр.
Норуот депутата Марфа Филиппова: «Быы­бар иккиһин ыытылларыгар муниципальнай бүддьүөттэн харчы барар диэн аргумент буолбатах. Судаарыстыба бүддьүөтэ ону уйунуохтаах”, — диэн санаатын эттэ.
Тиһэҕэр үгүс мөккүөр, араас санаа кэннэ, үгүс куолаһынан бу сокуон барылын парламент ылыммата.

Нолуок тула

«Саха Өрөспүүбүлүкэтин нолуогун политикатын” туһунан СӨ Сокуонугар уларытыыны киллэрэр туһунан сокуон барылын норуот депутаттара сиһилии ырыттылар.
Бу сокуон барылыгар бырамыысыланнай оройуоннарга вахтовай ньыманан үлэлиир дьоҥҥо НДФЛ оннунан хаалларар туһунан хас да депутаттан этии киирдэ. Онуоха кинилэр муниципальнай бюджеты хаҥатыыга улахан оруоллаах буолуо диэн матыыптаатылар.
Сокуон барылын парламент бүтэһиктээх ааҕыыга ылынна.

Саха сирин алта нэһилиэгэ арыгыттан аккаастанна

Ил Түмэн депутаттара Өлүөхүмэ оройуонун Хоро нэһилиэгэр, Амма улууһун Амма-Наахара нэһилиэгэр, Бүлүү улууһун Чинэкэ нэһилиэгэр, Ньурба улууһун Чуукаар уонна Күндээдэ нэһилиэктэригэр, Таатта улууһун Баайаҕа нэһилиэгэр арыгыны атыылааһыны букатын бобор туһунан сокуон барылын биир-биэс тыла суох ылыннылар.
Таатта улууһун Баайаҕа нэһилиэгин баһылыга Роман Романов арыгы буортутун туһунан саха норуотун чулуу уола Алексей Кулаковскай – Өксөкүлээх Өлөксөй «Арыгы» диэн айымньытыттан быһа тардан ааҕан мустубут дьону сэргэхситтэ. Арыгы атыыламмат буолуоҕуттан нэһилиэк олоҕо биллэ тупсубутун, дьон-сэргэ үчүгэй, баай-талым олоххо тардыһыыта үрдээбитин бэлиэтээтэ.

Ыччаты судаарыстыбаннай сулууспаҕа ылыы

Ыччаты судаарыстыбаннай сулууспаҕа үлэҕэ ылыы туһунан сокуон барыла ситэтэ суоҕунан сибээстээн, бастакы ааҕыыга эрэ ылыннылар.
Манна Ил Түмэн депутата Евгения Михайлова мунаах боппуруоһунан ыччат диэн чуолаан хас саастаах киһи ыччат ахсааныгар киирэрин чопчуласта.

Саҥа кылаабынай эрдээктэр дуоһунаһыгар киирдэ

Пленарнай мунньахха норуот депутаттара «Ил Түмэн» парламент хаһыатын кылаабынай эрэдээктэрин дуоһунаһыгар Наталья Романовна Попова кандидатуратын биир санаанан бигэргэттилэр.
Түгэнинэн туһанан, хаһыат эрэдээксийэтэ Наталья Романовнаҕа истиҥ эҕэрдэтин тиэрдэр.

Ирина ХАНДЫ.