Муниципальнай уорганнарга сыананы бэрээдэктиир боломуочуйалар

Ил Түмэн онус (уочараттаах) пленарнай мунньаҕар алтынньы 23 к. “Саха Өрөспүүбүлүкэтин муниципальнай оройуоннарын уонна куорат уокуруктарын олохтоох салайыныы уорганнарыгар сыаналары (тарифтары) судаарыстыбаннай сүрүннээһиҥҥэ сорох судаарыстыбаннай боломуочуйалары биэрии туһунан” сокуоҥҥа көннөрүүлэр көрүлүннүлэр.

Сокуон барылыгар сүрүн дакылааты СӨ сыана политикатыгар Судаарыстыбаннай кэмитиэтин бэрэссэдээтэлэ Антонина Винокурова оҥордо. Кини бу сокуон барыла федеральнай уонна өрөспүүбүлүкэтээҕи сокуоннары кытта сөп түбэһиннэрэр сыалтан оҥоһуллубутун эттэ. Ол курдук, сокуоҥҥа сыананы (тарифтары) судаарыстыбаннай сүрүннээһиҥҥэ СӨ толорор былааһын боломуочуйалаах уорганын бырааптарын уонна эбээһинэстэрин уонна “Саха Өрөспүүбүлүкэтигэр олохтоох салайыныы уорганнарыгар сорох судаарыстыбаннай боломуо­чуйалары анааһын бэрээдэгин туһунан” өрөспүүбүлүкэ сокуонугар сөп түбэһиннэрэн, олохтоох салайыныы уорганнарыгар бэриллибит боломуочуйалары тохтотуу бэрээдэгин туһунан салаалар киирэллэр.

Парламентарийдар чопчулуур ыйытыылара

Чуолаан, норуот депутата Петр Аммосов олохтоох салайыныы уорганнара ханнык тарифтары сүрүннүүллэрин туоһуласта. Антонина Винокурова иһитиннэрбитинэн, олохтоох салайыныы уорганнарыгар кытаанах уматыкка – оттук маска уонна чоххо, уопсай туһаныллар тырааныспарынан – автобустарынан тиэйиигэ, социальнай суолталаах аһылык бородуукталарыгар эргиэн надбавкаларыгар уонна оскуолаҕа оҕо аһылыгар сыаналары (тарифтары) судаарыстыбаннай сүрүннээһин боломуочуйалара бэриллибиттэрин туһунан сокуон барылыгар этиллэр.
Бэриллибит боломуочуйалары бу сокуоҥҥа уларытыылары киллэриинэн эрэ тохтотуллуоҕа, диэн норуот депутата Павел Ксенофонтов ыйытыытыгар судаарыстыбанннай кэмитиэт салайааччыта хоруйдаата.
Ил Түмэн бюджекка, үпкэ, нолуок уонна сыана политикатыгар, бас билии уонна приватизация боппуруостарыгар сис кэмитиэтин бэрэссэдээтэлэ Юрий Николаев бэйэтин хос дакылаатыгар сокуон барыла бастакы ааҕыыга көрүллүбүтүн уонна парламент сааскы сессиятыгар ылыныллыбатаҕын санатта.
Саҥа сокуон барылын СӨ Бырабыыталыстыбата оҥорон, 2019 с. балаҕан ыйын 2 к. киллэрбитэ. Ону киэҥ ыҥырыылаах мунньахха көрбүттэр, ол кэннэ Ил Түмэн бюджекка кэмитиэтигэр сиһилии дьүүллэһиллибит, туһааннаах биэдэмистибэлэр сөбүлэһэр түмүктээһиннэрин ылбыт.
Норуот депутата Виктор Федоров саҥа редакцияны өйөөтө, бэриллибит судаарыстыбаннай боломуочуйалары тохтотуу төрүөттэрин олохтуур нуормалар бу сокуоҥҥа киирбиттэрин бэлиэтээтэ.

Ил Түмэн пресс-сулууспатын матырыйаалларынан 

Елена БАИШЕВА бэлэмнээтэ