Оҕоҕо ыйдааҕы көмө харчы кээмэйэ төһөнүй?

Өрөспүүбүлүкэҕэ олорор оҕолоох гражданнарга аадырыстаах социальнай өйөбүлү оҥорор сыалтан, оҕоҕо ыйдааҕы көмө харчыны анааһыны уонна төлөөһүнү кытта сибээстээх сыһыаннаһыылары бу сокуон сүрүннүөҕэ.
Төрөппүттэртэн биирдэстэрэ (оҕону иитэ ылбыт, эппэкиин, попечитель) бэйэтэ төрөппүт, иитэ, эппиэкэҕэ ылбыт оҕото 16 сааһын туолуор диэри (уопсай үөрэх тэрилтэтигэр үөрэнэр түгэнигэр — үөрэҕин бүтэриэр диэри, ол эрээри оҕо 18 сааһын туоллаҕына, ити көмө тохтуур) кинини кытта олорор буоллаҕына, ону сэргэ дьиэ кэргэн орто дохуота Саха Өрөспүүбүлүкэтин зоналарынан нэһилиэнньэ биир киһитигэр тиксэр айах ииттэн олоруу алын кээмэйин аһарбат буоллаҕына, оҕоҕо ыйдаа­ҕы көмө харчыны ылар быраап­таах.
Дьиэ кэргэн орто дохуотун ааҕыы бэрээдэгин СӨ Бырабыыталыстыбата олохтуур.
Сокуоҥҥа көннөрүү ааптарынан Ил Түмэн бэрэссэдээтэлин солбуйааччы Ольга Балабкина буолар. Кини бу көннөрүүлэр норуот депутаттарын уонна бырабыыталыстыба улахан үлэни ыыппыттарын түмүгэр буоларын бэлиэтээтэ.
Ыйдааҕы көмө харчы оҕо­лорго маннык кээ­мэйинэн төлөнөр: СӨ зоналарынан нэһи­лиэнньэ биир киһитигэр тиксэр айах ииттэн олоруу алын кээмэйин 0,30-1,0 тэҥнэһэр орто дохуоттаах дьиэ кэргэттэргэ: 1035 солк. – оройуон коэффициена 1,7 буоллаҕына; 1218 солк. — оройуон коэффициена 2,0. Оттон айах ииттэн олоруу алын кээмэйин 0,30 аһарбат орто дохуоттаах ыаллар оҕолоругар: 1346 солк. – оройуон коэффициена 1,7; 1584 солк. – оройуон коэффициена 2,0. Ыйдааҕы көмө харчыны индексациялааһын бол­дьоҕун уонна кээмэйин сыллата СӨ Бырабыыталыстыбата олохтуур.
Оҕоҕо көмө харчыны анаа­һын уонна төлөөһүн бэрээдэгин эмиэ Бырабыыталыстыба олохтуур. Харчы судаарыстыбаннай бюджет үбүн суотугар төлөнөр.
Норуот депутаттара со­куон барылын билсэн баран, иккис уонна бүтэһиктээх ааҕыыга ылыннылар.