Улуустарга сөмөлүөтүнэн тиэйиигэ депутат ирдэбилин туһунан

Парламент Х (уочараттаах) пленарнай мунньаҕын кэмигэр Саха сирин улуустарыгар, ол иһигэр Арктика сиригэр-уотугар авиациянан тиэйиигэ депутат ирдэбилин туһунан Ил Түмэн уурааҕын барыла көрүлүннэ.

Норуот депутата Виктор Федоров 2019 с. бэс ыйын 5 к. Ил Түмэн бэрэссэдээтэлэ Петр Гоголев аадырыһыгар депутат ирдэбилин аныыр туһунан этиилээх сурук киллэрбитэ.
Санаттахха, быйыл ыам ыйын 23 к. “Саха Өрөс­пүү­бүлүкэтигэр салгын тырааныспарын сайдыытын уонна үлэтин проблемалара” диэн темаҕа төгүрүк остуол буолан ааспыта. Онно сөмөлүөккэ туттуллар кыраһыыҥҥа сыаналары бэрэбиэркэлиир туһунан этии оҥоһуллубута. Ити иннинэ кэккэ өрөспүүбүлүкэтээҕи уонна федеральнай сонуну тарҕатар ситимнэргэ Уһук Илин регионнарыгар, чуолаан, Саха сиригэр, сөмөлүөтүнэн тиэйиигэ тарифтар тустарынан суруналыыстар ыыппыт чинчийиилэрин түмүктэрэ иһи­тиннэриллибиттэрэ.
Холобур, «Россия-1» телевидение ханаала Саха сирин, Камчатка, Хабаровскай кыраай, Чукотка автономнай уокуругун салгынынан тиэйээччилэрин тарифтарын туһунан биэриини көрдөрбүтэ. Онно Саха сиригэр авиация уматыгын иһин аһара төлөөһүн сылга 2 млрд солк. тэҥ, авиабилиэккэ барыстара – 300%, түмүгэр 7 млрд солк. барыстаныахтарын сөп диэн этиллибитэ.
Виктор Федоров Судаарыстыбаннай Мунньах Регламенын 132 ыст. 1-кы чааһыгар уонна “Депутат ирдэбилин туһунан Балаһыанньа туһунан” парламент уурааҕын 3-с разделын 2-с пуунугар сөп түбэһиннэрэн, депутат ирдэбилин аныырга эппитэ.

«Билигин улуустарга (оро­йуоннарга), ордук СӨ Аркти­катааҕы сиригэр-уотугар авиациянан тиэйиигэ мөлтөх балаһыанньа үөскээтэ. Өрөспүүбүлүкэ нэһилиэнньэтэ тырааныспарга уонна сыана өттүнэн тииһиниитин хааччыйар сыалтан авиациянан тиэйии боппуруоһа сытыытык турар. Үөһэ ыйыллыбытынан сибээстээн, “Якутия” авиахампаанньа” АУо уонна “Полярные авиалинии” авиахампаанньа” АУо тэрилтэлэригэр авиакеросиҥҥа сыана хайдах үөскүүрүн боппуруоһун быһаарсар наадалаах», — диэн Виктор Федоров суругар этиллэр.
Кини уматыкка сыана араас­таһарын бэлиэтээбитэ: «Якутия» АХ авиакеросины тоннатын 81 тыһ. солк. атыылаһар, «Полярные авиалинии» — 67 тыһ. солк. Маныаха уматык 1 тонната Ангарскайга 46 тыһ. атыыланар. Ону таһынан, авиатырааныспары хааччыйыынан дьарыктанар «Аэропорт-Сервис» тэрилтэ чааһынай илиигэ хайдах түбэспитин туоһуласта.
Депутат Федоров туруорсуута алтынньы 16 к. Ил Түмэн предпринимательствоҕа, туризмҥа уонна инфраструктура сайдыытыгар кэмитиэтин мунньаҕар көрүллүбүт. Депутат ирдэбилин көҕүлүүр туһунан этиини өйүүргэ быһаарбыттар.
Пленарнай мунньахха ити боппуруос улахан дьүүлгэ турда. Парламентарий Алексей Еремеев кэккэ чопчулуур ыйытыылары биэрдэ. Норуот депутаттара Юрий Николаев, Виктор Губарев, Виктор Федоров, Любовь Явловская, Алексей Еремеев тыл эттилэр.
Дьүүллэһии түмүгэр Саха сирин кэккэ улуустарыгар, ол иһигэр Арктика сиригэр-уотугар, авиация тиэйиитигэр депутат ирдэбилин оҥорууга хамыыһыйаны тэрийэр туһунан уураах ылылынна. Хамыыһыйа салайааччытынан Ил Түмэн предпринимательствоҕа, ту­ризмҥа уонна инфраструктура сайдыытыгар сис кэмитиэтин бэрэссэдээтэлэ Игорь Григорьев, солбуйааччытынан – Виктор Федоров, сэкирэтээринэн – Евгений Перфильев ананнылар. Хамыыһыйа састаабыгар итини сэргэ норуот депутаттара Андрей Николаев, Павел Петров, Аркадий Семенов, Виктор Губарев, Любовь Явловская, Петр Аммосов, Михаил Эверстов уонна Олег Пискунов киирдилэр.
Хамыыһыйа үлэтин түмү­гүнэн Ил Түмэҥҥэ депутат ирдэбилин туһунан туһааннаах түмүктээһиннэрдээх уонна сүбэлээһиннэрдээх дакылааты оҥоруохтаах.

Ил Түмэн пресс-сулууспатын матырыйаалларынан Елена БАИШЕВА бэлэмнээтэ