Ууну түһэрэр тутуулар хапытаалынай өрөмүөн кэрискэтигэр киирбэттэр

Алтынньы 23 к. буолбут X (уочараттаах) пленарнай мунньахха “Саха Өрөспүүбүлүкэтин сиригэр-уотугар элбэх квартиралаах дьиэлэргэ уопсай баай-дуол хапытаалынай өрөмүөнүн ыытыыны тэрийэр туһунан” сокуоҥҥа көннөрүүлэр көрүлүннүлэр.

Үөһэ ыйыллар сокуон 19.25 уонна 31 ыстатыйаларыгар уларытыылары киллэрии көрүллэр. Чуолаан, элбэх квартиралаах дьиэ турар сир учаастагын кыраныыссаларын чэрчитинэн ууну түһэрэр тутуулар өрөмүөннэрэ элбэх квартиралаах дьиэлэргэ уопсай баай-дуол хапытаалынай өрөмүөнүн үлэлэрин кэрискэтиттэн таһаарыллар. Ити үлэ көрүҥэ дьиэ аттынааҕы сирдэри тупсарар үлэлэргэ киирсэр.
Элбэх квартиралаах таас дьиэлэргэ иэс ылбыт үптэрин төннөрүү муҥутуур болдьоҕо 30 сылга диэри уһуур, ол түмүгэр 400 мөл. солк. диэри иэс харчыны туһанар кыахтара улаатар.
Бу иннинээҕи сылга регионнааҕы оператор туһаммакка хаалбыт үбүн тобоҕун учуоттаан, сыллата хапытаалынай өрөмүөн регионнааҕы бырагырааматын үбүлээһиҥҥэ регионнааҕы оператор ороскуоттуур бырааптаах үбүн кээмэйэ билиҥҥи сылга хапытаалынай өрөмүөҥҥэ киирэр усунуостар билгэлэнэр кээмэйдэриттэн 85 бырыһыаныгар диэри улаатар. Бу нуорма үп тиийбэт кыһалҕатын аҕыйатыаҕа уонна быйылгы уонна кэлэр сылларга эбии 34 мөл. солк. ордук сууманы хапытаалынай өрөмүөнү ыытыыга туһанар кыаҕы биэриэҕэ.
Сокуон бүтэһиктээх ааҕыыга ылылынна.