15 декабря 2017 в 17:10

5 сылга — 1 мөлүйүөн 200 тыһыынча солкуобай

Саха Өрөспүүбүлүкэтин Баһылыгын уонна Бырабыыталыстыбатын пресс-сулууспата иһитиннэрбитинэн, ахсынньы 8 к. Өрөспүүбүлүкэтээҕи социальнай-үлэ сыһыаннаһыыларын сүрүннээһиҥҥэ үс өрүттээх хамыыһыйа мунньаҕар тыа сирин нэһилиэнньэлээх пууннарыгар уонна оробуочай бөһүөлэктэргэ олорор педагогическай үлэһиттэргэ, култуура уонна доруобуйа харыстабылын үлэһиттэригэр социальнай өйөбүл дьаһалларын хааччыйыы боппуруостара көрүлүннүлэр. Тэрээһини бастакы вице-премьер Алексей Колодезников салайан ыытта.

Үөрэх уонна наука миниистирэ Владимир Егоров эппитинэн, тыа сиригэр уопсай үөрэх оскуолаларыгар педагогическай кадрдары – учууталлары тардыыга уонна хааччыйыыга судаарыстыба дьаһалларыттан биирдэстэринэн “Арктикатааҕы уонна хотугу улуустарга тыа сирин оскуолаларын педагогическай үлэһиттэринэн уонна доруобуйа харыстабылын тэрилтэлэрин медицинскэй үлэһиттэринэн хааччыйыы” хос бырагырааманы олоххо киллэрии буолар. Бырагыраама чэрчитинэн учууталлар олорор дьиэни атыылаһалларыгар бюджеттан өйөбүл оҥоһуллар итиэннэ Хоту сир уонна Арктика ыраах сытар нэһилиэнньэлээх пууннарыгар тыа сирин оскуолаларын кадрдарынан хааччыйыыга туһуланар.
Миниистир иһитиннэрбитинэн, 2006 сылтан саҕалаан үс өрүттээх дуогабарынан ыраах, киһи тиийэригэр ыарахаттардаах тыа сирдэригэр, ол иһигэр аҕыйах ахсааннаах оҕолоох оскуолаларга барыта 330 учуутал үлэлии барбыт. Кинилэртэн 144 учуутал 5 сыл үлэлээн баран, судаарыстыбаттан 1 мөл. 200 тыһ. солк. суумалаах өйөбүлү ылан олорор усулуобуйаларын тупсарбыт, 30 учуутал социальнай төлөбүрү 2017 сыл 4-с кыбартаалыгар ылыахтаах.
Владимир Егоров итиннэ кыттар дьон 40-тан тахса бырыһыана Хоту сир уонна Арктика оскуолаларыгар педагогическай үлэлэрин салгыылларыгар бу хос бырагыраама социальнай көдьүүстээҕин бэлиэтээтэ.
«Дуогабарынан үөрэх тэрилтэтигэр үлэлии барар эдэр исписэлиистэргэ айаннарыгар уонна таһаҕастарын тиэйиигэ ороскуоттара, ону сэргэ ыйдааҕы акылаат кээмэйинэн биир кэмнээх харчы төлөнөр. Итинник социальнай өйөбүлү бары улуустарга учууталынан үлэлии барааччылар, ону тэҥэ оскуола иннинээҕи, эбии үөрэхтээһин тэрилтэлэригэр педагогтарынан үлэҕэ анаммыт выпускниктар ылаллар. Ити сыалларга сыллата регион судаарыстыбаннай бюджетыттан 4 мөл. солк. харчы көрүллэр», — диэн быһаарда дакылаатчыт.
Владимир Егоров “Россия Федерациятыгар үөрэхтээһин туһунан” ФС быһыытынан, тыа сирин нэһилиэнньэлээх пууннарыгар, оробуочай бөһүөлэктэргэ олорор, үлэлиир педагогическай үлэһиттэр олорор дьиэ, сылытыы уонна уотунан сырдатыы иһин ороскуоттарын төлүүллэригэр толуйууну ылар бырааптаахтарыгар болҕомтону туһаайда.
Итиниэхэ анаан анал Бэрээдэк оҥоһуллубута, онно тыа сиригэр, оробуочай бөһүөлэктэргэ үлэлиир, олорор, судаарыстыбаннай, муниципальнай үөрэх тэрилтэлэригэр штат быһыытынан үлэлиир педагогтарга социальнай өйөбүл дьаһаллара тарҕаналларын туһунан этиллэр. Ыйга толуйуу харчы хас биирдии ылааччыга 1100 солк. олохтоммута, итинник дьон ахсаана 16 тыһыынчаттан ордук.
Үөһэ ыйыллар үлэһиттэргэ олорор дьиэ, сылытыы уонна уотунан сырдатыы иһин ороскуоттарын толуйууга судаарыстыба сорох боломуочуйалара 2017 сылтан муниципальнай оройуоннар уонна куорат уокуруктарын олохтоох салайыныы уорганнарыгар бэриллибитэ.
2017 сыллааҕы өрөспүүбүлүкэ судаарыстыбаннай бюджетыгар “2012-2019 сс. Саха Өрөспүүбүлүкэтин үөрэҕин сайдыыта” судаарыстыбаннай бырагыраама чэрчитинэн 203,5 мөл. солк. көрүллүбүтэ.