Александр Миронов сырдык кэриэһигэр сүгүрүйэн

Александр Миронов сырдык аатыгар анаммыт тэрээһиҥҥэ Ил Түмэҥҥэ бииргэ үлэлээбит депутаттара – Александр Уаров, Леонид Владимиров, Марфа Филиппова, Гаврил Алексеев, Дмитрий Наумов кыттыыны ыллылар. Ону таһынан Александр Степанович “Алмаасэргиэнбаан” акционернай коммерческай бааҥҥа бииргэ үлэлээбит коллегалара – баан бырабылыанньатын билиҥҥи бэрэссэдээтэлэ Людмила Николаева, “Алмаасэргиэнбаан” корпоративнай бизнескэ Департаменын дириэктэрэ Игорь Борисов, “Алмаасэргиэнбаан” Үөһээ Бүлүүтээҕи офиһын салайааччыта Василий Евдокимов уо.д.а. кэлбиттэр. Ону кытары Александр Степанович чугас дьоно – кэргэнэ Лена Миронова, аҕата Степан Миронов, балта Наталья Миронова тэрээһиҥҥэ сырыттылар.
Күн бастакы аҥарыгар Үөһээ Бүлүү улууһун дьа­һалтатын аактабай саалатыгар «Судаарыстыбаннай уонна муниципальнай былаас уорганнарын финансовай-экономическай сыһыаннаһыыларын проблемалара» диэн киэҥ хабааннаах “төгүрүк остуолу” норуот депутата, ДьТХА ректора Леонид Николаевич Владимиров салайда.

Норуот депутата уонна улуус сайдар суоллара

“Төгүрүк остуол” саҕаланыытыгар модератор Леонид Владимиров: “Саха сирин Судаарыстыбыннай Мунньаҕар (Ил Түмэҥҥэ) үрдүк таһымнаахтык үлэлээн, барыбытыгар үтүө өйдөбүлү хаалларан, инникитин күргүөмнээхтик үлэлиирбитигэр кыах биэрбит киһини, Александр Степанович Мироновы, ахтан-санаан, бүгүн бары түмсэн олорон, кини идеяларын туһанан, Үөһээ Бүлүү улууһун сайдар суолларын туһунан кэпсэтиигэ ыҥырабын”, – диэн тэрээһин кыттыылаахтарын эҕэрдэлээтэ. “Үөһээ Бүлүү улууһа” МТ баһылыга Владимир Поскачин: “Хас биирдии депутат бэйэтэ туспа суоллаах-иистээх буолар. Александр Миронов курдук аҕыйах сыл иһигэр норуотун туһугар үгүс үлэни ыыппыт депутат ахсааннаах. Кини улууспутугар улахан бырайыактар тутуллан олоххо киириилэригэр сүрэҕинэн-быарынан ыалдьан үлэлээбит киһи буолар. Маннык хабааннаах түмсүү үгэскэ кубулуйан сыл аайы ыытыллар буолуоҕа диэн эрэнэбин”, – диэн бэлиэтээтэ уонна ыраахтан-чугастан тэрээһиҥҥэ мустубут дьоҥҥо махталын биллэрдэ.
Салгыы аактабай саала иһигэр толору мустубут Үөһээ Бүлүү улууһун нэһилиэктэрин баһылыктара биир-биир бэйэлэрин санааларын үллэһиннилэр. “Үөһээ Бүлүү нэһилиэгэ” МТ баһылыга Николай Ни­колаев: “Александр Сте­па­нович Миронов Ил Түмэн депутатынан талыллыаҕыттан ыла улуус сайдыытыгар көмөлөһөн барбыта. Ол курдук, бастатан туран, кини быһаччы көмөтүнэн Туобуйаҕа диэри суол оҥоһуллубута. Билигин бу балыыһа дьиэтэ тутуллан бүтэн дьэндэйэн турарын көрө-көрө киһи үөрэр. Александр Степанович хайаан даҕаны сыл аайы нэһилиэнньэни кытта кэлэн көрсөн, тугу ситиспитин, былааннаабытын кэпсээн-ипсээн барар этэ. Билигин бу холобуру тутуһан үлэлиир улуус да депутаттара, нэһилиэк да депутаттара баалларыттан олус үөрэбин. Үөһээ Бүлүү дьоно-сэргэтэ биһиэхэ үлэлээн ааспыт, сүрдээх улахан көмөнү оҥорбут киһибитин чиэстээммит саҥа тутуллубут балыыһаҕа Александр Миронов аатын иҥэриэхтээхпит”, — диэн этии киллэрдэ. Онтон “Ороһу нэһилиэгэ” МТ баһылыга Анатолий Антонов Александр Миронов дойдутун дьонун аатыттан улуус баһылыгар В.С.Поскачиҥҥа бүгүҥҥү тэрээһин иһин махталын тириэртэ. “Александр Степанович ийэтэ Ороһуттан төрүттээх. Онон биһиги кинини бэйэбит уолбут курдук саныыбыт. Төрөөбүт нэһилиэгэр көмөлөһөн, эдэр ыччаты олохсутар сыалтан, дьиэ тутуутун саҕалаабыта. Билиҥҥитэ эдэр ыалларга 30-ча дьиэ тутулунна. Бу барыта – Александр Степанович көмөтө”, – диэтэ Анатолий Антонов. Александр Миронов Үөһээ Бүлүү улууһугар спорт сайдыытыгар кылаатын эмиэ бэлиэтээтилэр. Физическэй култуура уонна спорт управлениетын начальнига Егор Николаев: “Мин Александр Степановиһы улууска спорт сайдыытыгар биир улахан суолталаах киһинэн сыаналыыбын. Кини биһиэхэ урукку өттүгэр суох спортинг диэн көрүҥү киллэрэн, станок аҕалан туруоран, күрэхтэһиилэри тэрийэрэ. Бүгүҥҥү күҥҥэ диэри спортинг көрүҥэ сайда турар. Ол курдук, “Азия оҕолоро” норуоттар икки ардыларынааҕы спортивнай оонньууга бу көрүҥҥэ биһиги улуустан биир кандидаттаахпыт. Ону таһынан, Александр Миронов үбүнэн-харчынан өйөөн билигин Олимпиадаҕа кыттар чиэһи ситиспит Сардаана Трофимова профессиональнай спорка киирбитэ”, — диэн иһитиннэрдэ.
Александр Мироновы кытта төрдүс ыҥырыыга бииргэ үлэлээбит депутат Дмитрий Наумов: “Бүгүҥҥү мустуубут хомолтолоох өрүтэ эмиэ баар. Биһиги көлүөнэ оҕобут кэриэтэ киһини кэриэстиир тэрээһиҥҥэ мустубуппут сүрдээх ыарахан. Ол эрээри, үлэ-хамнас, аныгы кэм киһитин туһунан кэпсэтии буоларын быһыытынан, туспа хайысхалаах күн буолар дии саныыбын”, – диэн бэлиэтээн эттэ уонна тыа хаһаайыстыбатын кирэдьииттээһин систиэмэтин тула санаатын үллэһиннэ.
Ил Түмэн Хонтуруоллуур кэмитиэтин бэрэссэдээтэлэ Александр Уаров Александр Миронов аҕатыгар Степан Спиридоновичка кини аһыытын өйдүүрүн биллэрдэ. “Сүрдээх чаҕылхай, эдэр дьон олохтон бараллара олус хомолтолоох. Бүгүн Александр Степанович туһунан үтүө тыллар этилиннилэр. Биһиги биир кэмитиэккэ алта сыл устата бииргэ үлэлээбит буоламмыт, мин кинини чугастык билэрим. Бюджет кэмитиэтин сүрүн боппуруостарын быһаарсара. Айылҕаны, бултуурун сөбүлүүр этэ. Эдэр киһи диэтэххэ, сүрдээх дириҥ толкуйдаах, олоххо интэриэһинэй көрүүлэрдээх киһи этэ”, – диэн Александр Миронов туһунан ахтан-санаан аһарда Александр Уаров. Уонна: “Бүгүн “төгүрүк остуол” кэмигэр сытыы боппуруостар турдулар. Билигин тыа хаһаайыстыбатын сокуонугар Ил Дархан киллэрбит барылын концепциятын, хайысхаларын Ил Түмэн бастакы ааҕыыга ылаары олорор, ылыахпыт дии саныыбын. Ол кэннэ саамай эриирдээх-мускуурдаах, нэһилиэнньэттэн киирбит 400-тэн тахса этиини ырытан куоластааһын барыаҕа. Федеральнай былаас республикаҕа анаабыт үбүн, бэйэбит үппүт кээмэйин иһигэр эрэ уларытыылары, көннөрүүлэри киллэрэр кыахтаахпыт. Биһиги республикабыт тыа хаһаайыстыбатыгар аныыр үбүн кээмэйин саҕаны биир даҕаны Россия субъега көрбөт”, – диэн бүгүҥҥү кэпсэтии киэҥ далааһыннаахтык барбытын бэлиэтээтэ.
Үөһээ бүлүүлэр биир дойдулаахтара, Ил Түмэн депутата Марфа Филиппова: “Александр Степановиһы кытта Үөһээ Бүлүүгэ үлэлии сылдьар кэммиттэн саҕалаан үп-харчы эргиирин, кирэдьиит боппуруостарыгар үлэлэспитим. 2013 сылтан Ил Түмэҥҥэ бииргэ үлэлээбиппит. Олох кылгас кэмҥэ алтыһан хааллым. Ол эрээри, кини туһунан үгүс үтүө санаа хаалбыта. Кини ыыппыт үлэтэ салҕанан бара туруоҕа диэн эрэнэбин”, – диэтэ. Салгыы тыа хаһаайыстыбатын боппуруостарыгар, чуолаан үүт харчытын аахсыыга, бэйэтин санаатын этэригэр: “Тыа сирин дьонугар үүт харчыта саамай сытыытык турар боппуруос буолар. Биһиги үүт харчытын кээмэйэ 50 солк. тиийэрин ситиһэр былааннаахпыт”, — диэн иһитиннэрдэ.
“Алмаасэргиэнбаан” бырабылыанньатын бэрэссэдээтэлэ Людмила Николаева баан коллективын аатыттан улуус баһылыгар Александр Миронов сырдык кэриэһигэр аналлаах тэрээһин иһин махтанна. “2005 сылтан бааны салайан сылдьыбыта. Баан ырыынагар күүстээх конкуренция баар. “Алмаасэргиэнбаан” кинилэр быыстарыгар биир бастыҥ быһыытынан сылдьар. Билигин биһиги бааммытын ханнык да баан самнарар, ырыынактан туоратар кыаҕа суох. Бу – Александр Миронов үлэтин түмүгэ”, – диэн бэлиэтээтэ. Людмила Валерьевна салгыы Александр Миронов салайааччы быһыытынан уратытын, “Алмаасэргиэнбаан” инники былааннарын туһунан кэпсээтэ, баһылыктар ыйытыыларыгар хоруйдаата. “Олох уларыйар, бириэмэ уларыйар. Былаас, бизнес уонна нэһилиэнньэ икки ардыгар диалог олохтонуохтаах. Маннык хабааннаах көрсүһүүлэр сылга иккитэ да ыытыллыахтарын сөп”, – диэтэ.
Тэрээһиҥҥэ мустубут улуус нэһилиэктэрин баһылыктара Александр Степанович сырдык аатыгар сүгүрүйэр махтал тылларын эттилэр, улуус сайдыытын туһугар кэннигэр хаалларбыт үлэлэрин үрдүктүк сыаналаатылар. Ол курдук, “Дүллүкү нэһилиэгэ” МТ баһылыга Иван Ан, “Хоро нэһилиэгэ” МТ баһылыга Семен Чиряев, “Үөдүгэй нэһилиэгэ” МТ баһылыга Михаил Донской, “Маҥаас нэһилиэгэ” МТ баһылыга Павел Львов, улуус депутата Зоя Федорова, “Манчаары оонньуулара” пуонда бэрэссэдээтэлэ Василий Чонохов, ветеран быраас Зинаида Золотарева уо.д.а. Александр Миронов аатын сылаас тылынан аҕыннылар.
Бу күн Үөһээ Бүлүү улууһун олоҕун-дьаһаҕын, социальнай-экономическай сайдыытын, кэлэр кэскилин хабар олус наадалаах тэрээһин буолан ааста.

Александр Миронов аатынан сквери аһыы

Күнүс 2 чаастан Үөһээ Бүлүү киинигэр саҥа тутуллубут таас балыыһа иннигэр Александр Миронов сырдык кэриэһигэр сүгүрүйэн туран, кини аатын үйэтитэр боруонсаттан кутуллубут бүүһү үөрүүлээх быһыыга-майгыга арыйдылар. Манна улуус баһылыга Владимир Поскачин: “Бүгүн биһиги саҥа балыыһа олбуоругар А.С.Миронов скверин арыйан эрэбит. Бу балыыһа дьиэтэ тутуллуутугар Александр Степанович сүдү оруоллаах. Кини быыбарданан талыллыаҕыттан ыла хайаан да таас балыыһа туттарыаҕым диэн бигэ санааны ылынан, тылын биэрэн, онтукатын толорор сыалтан күүскэ үлэлээбитэ. Бүгүҥҥү күҥҥэ балыыһа тутуутун үлэтэ түмүктэнэн, ахсынньы ыйга үлэҕэ киирээри турар”, — диэтэ. Улуус баһылыга сквер оҥоһуллуутугар күүс-көмө буолбут дьоҥҥо уонна архитектор Огочонов Николай Николаевичка барҕа махталын биллэрдэ. Ил Түмэн депутата Александр Уаров: “Александр Миронов үлэтэ бүгүҥҥү эрэ күнүнэн сыаналаммат. Кини Үөһээ Бүлүү улууһун социальнай-экономическай сайдыытыгар киллэрбит кылаата сүдү”, – диэн бэлиэтээтэ. Онтон “Алмаасэргиэнбаан” бырабылыанньатын бэрэссэдээтэлэ Людмила Николаева бүүс көрүүтүгэр-харайыытыгар инникитин “Алмаасэргиэнбаан” күүс-көмө буолуоҕа диэн эрэннэрдэ. Сквер аһыллыытын кэмигэр Александр Степановичка анаан олус итии-истиҥ, ахтыы санаалар этилиннилэр.
Александр Степанович олус сэмэйин, киһи быһыытынан кэрэтин, кимиэхэ баҕарар болҕомтолоох сыһыаннааҕынан ура­ты­лааҕын туһунан тэрээ­һин кыттыылаахтара бары бэлиэтээн аһар­дылар. Александр Миронов үлэтэ-хамнаһа, олох­хо ситиһиилэрэ өрөс­пүүбүлүкэ сайдыытын исто­риятыгар умнуллубаттык хаалан, саҥа кыайыыларга сирдии туруохтара!

Ыспыраапка

Августина Александровна, Степан Спиридонович Мироновтар улахан уоллара Саша 1978 сыллаахха Үөһээ Бүлүү оройуонун киинигэр Исидор Барахов аатынан 1№-дээх орто оскуола маҥнайгы кылааһыгар үөрэнэ киирбитэ. Оскуоланы Тааттаҕа үрүҥ көмүс мэтээллээх бүтэрбитэ. Талааннаах салайааччы, общественнай деятель, төрөөбүт дойдутун дьиҥнээх патриота, баан ырыынагын профессионала Александр Степанович Миронов 2008 сыллаахха Yөhээ Бүлүүтээҕи-Горнайдааҕы быыбардыыр уокурукка быыбардааччылар баhыйар үгүс куоластарын ылан Ил Түмэн IV ыҥырыытын депутатынан талыллыбыта. Кини өрөспүүбүлүкэ парламенын бюджекка, үпкэ, нолуок уонна сыана политикатыгар, бас билии уонна приватизация боппуруостарыгар сис кэмитиэтин бэрэссэдээтэлин солбуйааччытынан, тутууга уонна дьиэ-уот, коммунальнай хаһаайыстыбаҕа сис кэмитиэт чилиэнинэн үтүө суобастаахтык үлэлээбитэ. Быыбардааччыларын үрдүк итэҕэллэрин ылан, 2013 сыллаахха хаттаан талыллыбыта.

Мария Павлова