Александр Васильев – Аграрнай партия салаатын салайааччыта

Бу конференцияны ыытыыны Ольга Башмачникова бэрэссэдээтэллээх партия киин аппарата көҕүлээбитэ. Маныаха бэрэстэбиитэллэр нуормалара олохтоммута – олохтоох салаа 50 чилиэниттэн 1 делегат. Ити түмүгэр уочараты таһынан конференция үлэтигэр 32 киһи кытынна.

Мунньах сүрүн боппуруо­һунан «Россия Аграрнай партиятын» Саха сиринээҕи олохтоох салаатын бэрэссэдээтэлин талыы этэ. Маныаха икки кандидатура көрүлүннэ – «Саха Өрөспүүбүлүкэтин бааһынай (фермер) хаһаайыстыбаларын уонна тыа хаһаайыстыбатын кооперативтарын Ассоциациятын» толоруулаах , бэйэтин туруоруммут Валерий Ефремов, уонна «Туймаада» ҮАПК ГУП генеральнай Александр Васильев, кини кандидатуратыгар «Россия Аграрнай партията» БРПП Киин Сэбиэтин правлениета сөбүлэспитэ.

Кистэлэҥ куоластааһын түмүгэр баһыйар үгүс куолаһы ылан Александр Васильев кыайда. Ону таһынан делегаттар регионнааҕы салаа Сэбиэтин уонна хонтуруоллуур-ревизиялыыр хамыыһыйа чилиэннэрин таллылар.

ЫСПЫРААПКА:

Александр Гаврильевич Васильев 1955 с. алтынньы 18 к. Хаҥалас улууһун Улахан Аан сэлиэнньэтигэр төрөөбүтэ. 1982 с. Иркутскайдааҕы тыа хаһаайыстыбатын институтун бүтэрбитэ.
1982-1986 сс. – ССТХНЧИ опытнай-конструкторскай уонна бырайыактыыр-технологическай бюротун 2-с кат. конструктора;
1986-1990 сс. – «Хачыкаат» сопхуос кылаабынай инженерэ, директора;
1990-1993 сс. – Орджоникидзевскай оройуон народнай депутаттарын оройуоннааҕы сэбиэтин бэрэссэдээтэлэ;
1993-1996 сс. – СӨ тыа хаһаайыстыбатын миниистирин бастакы солбуйааччы;
1996-1998 сс. – «Якутптицепром» ПО генеральнай директора;
1998-2000 сс. – Хаҥалас улууһун администрациятын баһылыгын бастакы солбуйааччыта;
2000-2001 сс. – Хаҥалас улууһун администрациятын баһылыгын э.т.;
01.2001-02.2001 с. – «Туймаада» ҮАПК ГУП бастакы вице-президенэ;
23.02.2001 с. – «Туймаада» ҮАПК ГУП президенэ;
19.09.2001 сылтан билиҥҥэ диэри – «Туймаада» ҮАПК ГУП генеральнай директора.
СӨ норуотун хаһаайыстыбатын үтүөлээх үлэһитэ, «Гражданскай килбиэн» бэлиэлээх.