24 апреля 2015 в 11:46

Александр Жирков ХНТ төрүт норуоттар боппуруостарыгар Форумугар кыттар

Россия Бырабыыталыстыбатын бэрэссэдээтэлэ Дмитрий Медведев дьаһалынан РФ официальнай делегацията Нью-Йорк куоракка ХНТ штаб-квартиратыгар ыытыллар ХНТ төрүт норуоттар боппуруостарыгар Бастайааннай Форумун 14-с сессиятын үлэтигэр кыттар. Бу сонуну Ил Түмэн пресс-сулууспата иһитиннэрдэ.

Россия омук дойдуларын дьыалаларыгар министерствотын гуманитарнай бииргэ үлэлээһиҥҥэ уонна киһи бырааптарыгар Департаменын директора Анатолий Викторов салайааччылаах делегация састаабыгар Россия араас субъектарын: Ямало-Ненецкэй АУо, Крым Өрөспүүбүлүкэтин, Ханты-Мансийскай АУо – Югра, Камчатка кыраайын, Красноярскай кыраай уонна Саха Өрөспүүбүлүкэтин салайааччылара киирдилэр. ХНТ төрүт норуоттар боппуруостарыгар Бастайааннай Форумун Секретариатын ыҥырыытынан биһиги өрөспүүбүлүкэбит бэрэстэбиитэлинэн Ил Түмэн Бэрэссэдээтэлэ Александр Жирков кыттар.

Сессия үлэтигэр ону таһынан Саха сиригэр Хоту дойду төрүт норуоттарын бырааптарыгар Боломуочунай Константин Роббек уонна «Эллэйаада» этнокультурнай холбоһук салайааччыта Михаил Ершов кытталлар. Бу коммерческайа суох «Эллэйаада» автономнай тэрилтэ 2010 сылтан ХНТ төрүт норуоттар боппуруостарыгар Бастайааннай Форумугар кэтээччи статустаах.

Форум программатын быһыытынан Саха сирин парламенын спикерэ Александр Жирков муус устар 22 к. тыл этиэхтээҕэ былааннаммыта. Дакылаат темата: «Төрүт норуоттар культурнай нэһилиэстибэлэрин харыстааһын: Саха сирин уопута». Александр Николаевич өрөспүүбүлүкэ уонна Саха сирин төрүт норуоттарын үгэс буолбут культураларын харыстааһын туһунан, ону сэргэ норуоттар икки ардыларынааҕы бырайыак – «Саха сирин норуоттарын ХVII – ХХ үйэ саҥатынааҕы материальнай уонна духуобунай культурата аан дойду музейдарыгар» диэн системалаах каталогу таһаарыы туһунан кэпсиэҕэ. Хотун Чандра Рой Хенриксен салайааччылаах ХНТ төрүт норуоттар боппуруостарыгар Бастайааннай Форумун чилиэннэрин быһаарыытынан үөһэ ахтыллар бырайыак ХНТ Форумун өйөбүлүнэн таһаарыллыаҕа. Саарбаҕа суох, бу – өрөспүүбүлүкэҕэ уонна бүттүүн Россияҕа ыытыллар культурнай политика өҥөлөрүн билинии буолар.