Александр Жирков Кыргызстан Өрөспүүбүлүкэтин Президенин Алмазбек Атамбаевы кытта көрүстэ

Кыргызстан Өрөспүүбүлүкэтин Президенин сайта иһитиннэрэринэн, көрсүһүү кэмигэр государство Баһылыга Саха сирин парламенын спикеригэр Александр Жирковка кыргыз эпоһын «Манаһы», суруйааччы Чингиз Айтматов уонна да атын кыргыз автордарын айымньыларын киэҥник тарҕатыы үлэтигэр, судаарыстыбаннай деятель Максим Кирович Аммосов аатын үйэтитиигэ биллэр-көстөр кылааты киллэрбитин иһин махтанарын биллэрдэ.

Бу күн Кыргызстан Өрөспүүбүлүкэтин парламеныгар өссө биир бэлиэ түгэн буолла – «М.К.Аммосов. Кыргызский период деятельности» диэн саҥа кинигэни билиһиннэрии. Бу кинигэни таһаарыыны Алмазбек Атамбаев көҕүлээбитэ. Государство баһылыга ол туһунан этиини икки норуот эпостарын кыргыз уонна саха тылларыгар хардарыта тылбаастаан таһаарыы бырайыага ситиһиилээхтик түмүктэммитин бэлиэтиир көрсүһүүлэригэр 2014 сыллаахха сэтинньигэ этэн турар. Көрсүһүү кэмигэр М.К.Аммосов олоҕун Кыргызстаннааҕы кэмин кэрэһилиир кинигэни бэлэмнээн таһаарыы туһунан этии дьүүллэһиллибитэ. Бу ааспыт кылгас кэм иһигэр ол кэпсэтии олоххо киирдэ.

Кыргызстан Өрөспүүбүлүкэтин Президенэ Алмазбек Атамбаев уонна Саха Өрөспүүбүлүкэтин Судаарыстыбаннай Мунньаҕын (Ил Түмэнин) Бэрэссэдээтэлэ Александр Жирков Кыргызстан уонна Саха сирин икки ардыларыгар культурнай-гуманитарнай боппуруостарга бииргэ үлэлээһини дьүүллэстилэр, икки өттүттэн хардарыта сибээстэри күүһүрдүүгэ уонна дириҥэтиигэ бииргэ үлэлээһини салгыы ыытыы суолталааҕын бэлиэтээтилэр.

Кыргызстан Өрөспүүбүлүкэтин Президенин пресс-сулууспатын матырыйаалларынан.