Асылбек Жээнбеков бииргэ үлэлээһин хайысхаларын ыйда

Кыргызстаҥҥа ыытыллыахтаах тэрээһиннэргэ кытта Саха сириттэн официальнай делегация тиийдэ. Көрсүһүүгэ Кыргызстан парламенын Норуоттар икки ардыларынааҕы дьыалаларга кэмитиэтин бэрэссэдээтэлин солбуйааччы Бахтияр Кадыров, М.К.Аммосов сиэнэ Максим Аммосов уонна хос сиэнэ Елизавета Аммосова кытыннылар.
Асылбек Жээнбеков Киргизия саҥа Союзнай Өрөспүүбүлүкэтэ тэриллиитигэр, атаҕар туруутугар Максим Кирович Аммосов ураты суолтатын бэлиэтээтэ. «Кыргызстан Өрөспүүбүлүкэтэ төрүттэниитигэр уонна сайдыытыгар биллэр-көстөр кылаатын киллэрбит аймахтыы саха норуотун уһулуччулаах уолун туһунан үтүө өйдөбүлү Кыргызстан ытыктыыр. Киргизия К(б)П КК бастакы секретарын дуоһунаһыгар үлэтигэр хара маҥнайгыттан кини судаарыстыбаннай салалтаҕа Киргизия олохтоох кадрдарын киэҥник киллэрэр политиканы утумнаахтык ыыппыта», – диэтэ кини.

«Биһиги М.К. Аммосов. Кыргызский период деятельности» кинигэни бэчээттээн таһаарыыга кыттыгас бырайыакпыт ситиһиилээхтик олоххо киирбититтэн үөрэбит», – диэтэ салгыы Асылбек Жээнбеков. Бэрэссэдээтэл судаарыстыбаннай уонна  общественнай деятель М.К. Аммосов олоҕун тиһэх кэмин туһунан сиһилии билиһиннэрэр кинигэ тахсыыта бүгүҥҥү күҥҥэ тирээн турар суолталааҕын ыйда. «Кинигэни таһаарыы Саха Өрөспүүбүлүкэтин уонна Кыргызстан Өрөспүүбүлүкэтин кыттыгас бырайыактарынан буолар. Кинигэ Саха Өрөспүүбүлүкэтин уонна Россия парламентаризмын Күннэрин көрсө бэчээттэнэн тахсыбыта дьоһун бэлиэ түгэн», – диэн бэлиэтээтэ Асылбек Жээнбеков.

Саха сирин парламенын спикерэ Александр Жирков Максим Кирович Аммосов аатын үйэтитиигэ тахсыылаахтык бииргэ үлэлээһин иһин махтанна. Кини Кыргызстан өттүттэн көмөтө суох маннык кинигэ тахсыыта кыаллыа суох этэ диэн эттэ. «Бэйэтин историятын ытыктыыр уонна өйдүүр норуот кэлэр кэскилэ дьоһун», – диэн туран, Ил Түмэн спикерэ кинигэҕэ М.К.Аммосов Киргизияҕа бииргэ үлэлээбит соратниктарын ахтыылара, Кыргызстан уонна Саха сирин кыраайы үөрэтээччилэрин, чинчийээччилэрин, учуонайдарын, архивистарын  ыстатыйалара хомуллан киирбиттэрин бэлиэтээтэ. «Биһиги  инники ыытыллыбыт чинчийиилэргэ олоҕураммыт саха норуотун уһулуччулаах деятелин аатын салгыы үйэтитэбит. Бу үлэни кэлэр көлүөнэ дьон иилэ хабан ылан салгыахтара диэн эрэнэбит. Ааспыт уонна кэлэр көлүөнэлэр икки ардыларыгар сибээс быстыбакка салҕанара уонна историческай кырдьыгы харыстааһын улахан суолталаах», – диэтэ Александр Жирков.

Көрсүһүү кыттыылаахтара салгыы буолуохтаах тэрээһиннэри, Бишкеккэ М.Аммосов пааматынньыгар сибэккини ууруу сиэрин-туомун,  «М.К. Аммосов. Кыргызский период деятельности» саҥа кинигэни билиһиннэриини тэрийэн ыытыыны, кинигэни Кыргызстан Өрөспүүбүлүкэтин А.Осмонов аатынан Национальнай библиотекатыгар үөрүүлээх быһыыга-майгыга туттарыыны, дьүүллэстилэр.

Кыргыз уонна саха норуоттарын культурнай сибээстэрин дьүүллэһиини таһынан, парламеннар спикердэрэ икки регион сокуону оҥорор үрдүкү уорганнара бииргэ үлэлээһиннэрин тула кэпсэттилэр. Кыргызстан парламенын спикерэ Саха Өрөспүүбүлүкэтин уонна Кыргызстан Өрөспүүбүлүкэтин сыһыаннаһыыларын бөҕөргөтүүгэ күүһү холбоон бииргэ үлэлээһиҥҥэ Саха сирин Судаарыстыбаннай Мунньаҕын Бэрэссэдээтэлэ Александр Жирков улахан кылаатын бэлиэтээтэ. Асылбек Жээнбеков икки өттүттэн хардарыта бииргэ үлэлээһини сайыннарыыга кэскиллээх хайысхалары ыйда, Кыргызстан уонна Россия икки ардыларыгар бары таһымнарга бииргэ алтыһан үлэлээһин  үрдүк тэтимнээҕин астынан туран бэлиэтээтэ. Александр Жирков Кыргызстан уонна Саха сирэ бииргэ үлэлээһиннэрин тэтимин күүһүрдэр эрэйиллэрин  бэлиэтээтэ итиэннэ культурнай-гуманитарнай, наука уонна үөрэхтээһин эйгэлэригэр бииргэ үлэлээһини кэҥэтиигэ болҕомтону туһаайда.

Ил Түмэн пресс-сулууспата.