679
20 июля 2018 в 12:45
Айсен Николаев үлэни болдьоҕор түмүктүүр соругу туруорда
Саха сирин Баһылыгын э.т. Айсен Николаев от ыйын 18 к. халаан уутун содулларын туоратыыга бырабыыталыстыба хамыыһыйатын уочараттаах мунньаҕын ыытта. Манна сири-уоту чөлүгэр түһэриини, нэһилиэнньэҕэ көмөнү оҥорууну, суолу, социальнай объектары уонна коммунальнай инфраструктураны чөлүгэр түһэриини тэрийии уонна ыытыы боппуруостарыгар ураты болҕомто уурулунна.
Экология, айылҕаны туһаныы уонна ойуур хаһаайыстыбатын миниистирин э.т. Сахамин Афанасьев иһитиннэрбитинэн, бүгүҥҥү күҥҥэ чөлүгэр түһэрии үлэлэрин былаана 30% туолбут. 4 тыһ. тахса киһи өрөспүүбүлүкэтээҕи резервэ фондатын үбүн суотугар материальнай көмө ылбыт. Баайдарын-дуолларын бүтүннүү эбэтэр сороҕун сүтэрбит дьоҥҥо материальнай көмөнү оҥорууга федеральнай үбү анааһыҥҥа РФ ЫБММ сөбүлэһэр түмүктээһиннэри оҥорбут. Чугастааҕы күннэргэ резервэ фондатыттан үбү аныыр туһунан РФ Бырабыыталыстыбатын дьаһала тахсара күүтүллэр.
Билигин биир тутаах боппуруоһунан халаан уутуттан эмсэҕэлээбит оройуоннар олохтоохторун тутуу матырыйаалларынан хааччыйыы буолар.
Өрөспүүбүлүкэ тутууга министиэристибэтэ олорор дьиэлэри уонна социальнай объектары чөлүгэр түһэриигэ наадалаах тутуу матырыйаалларын кэрискэтин уонна кээмэйин быһаарыыга үлэни ыыппыт. Бэдэрээтчит тэрилтэлэри уонна тутуу матырыйаалларын атыылааччылары кытта дуогабар түһэрсиллибит. Матырыйааллары уунан уонна массыына суолунан тиэйиэхтэрэ, оттон Орто Халыма Березовкатыгар – салгын тырааныспарынан. Билигин сайаапка быһыытынан оройуоннарга лафет, буруус мас, кырыыһа матырыйааллара, кирпииччэ ыытыллаллар.
Миэстэтигэр тырааныспар уонна коммунальнай хаһаайыстыба инфраструктуратын, уот, сибээс линияларын, тыа хаһаайыстыбатын объектарын чөлүгэр түһэриигэ үлэлэр салҕаналлар. Нэһилиэнньэҕэ көмөҕө анаан устудьуоннар тутар этэрээттэрэ ыытылыннылар. Ону сэргэ үлэтэ суох гражданнар тардыллаллар.
Министиэристибэлэр уонна биэдэмистибэлэр салайааччыларын этиилэрин истэн баран, регион Баһылыгын э.т. Айсен Николаев саахалламмыт сири-уоту чөлүгэр түһэрии үлэлэрин ыытыы тэтимэ бытаанын бэлиэтээтэ. «Чугастааҕы болдьоххо күттүөннээх түмүктэри ситиһэргэ көмөлөһөр дьаһаллары күүһүрдэр наада. Ураты болҕомто хотугу оройуоннарга тутуу матырыйаалларын тиэрдии боппуруостарыгар ууруллуохтаах. Саахалламмыт олорор дьиэлэри уонна социальнай объектары чөлүгэр түһэрэр үлэлэр болдьоҕор туолуохтаахтар. Онуоха анаан бары күүһү уонна ресурсалары түмэ тардыы ирдэнэр», — диэн мунньаҕы түмүктээтэ Айсен Николаев.
СӨ Баһылыгын уонна Бырабыыталыстыбатын пресс-сулууспата.
