783
31 июля 2015 в 11:21
Федот Тумусов биэс күүстээх хандьыдаат иһигэр сылдьар
РФ Федеральнай Мунньаҕын Госдуматын депутата Федот Семенович Тумусов, социальнай-экономическай уонна политическай чинчийиилэргэ Институт (ИСЭПИ) уонна сокуону оҥорууну өйүүр Киин Фондатын дакылаатын быһыытынан, 2016 сыл балаҕан ыйынааҕы быыбардарга «Сиэрдээх Россия» партияттан биир мандааттаах уокурукка 5 күүстээх хандьыдаат иһигэр киирэр.
Политологтар 2016 сыл балаҕан ыйынааҕы Госдума быыбарыгар биир мандааттаах уокуруктарынан билигин үлэлиир депутаттар төһө бэлэмнэрин бэйэлэрин чинчийиилэригэр быһаардылар. Ол түмүгэр кинилэр хас биирдии партияҕа 5 инники иһээччи «биир мандааттаах локомотивтары» быһаардылар, ол дьон бэйэлэрин уокуруктарыгар лидердэринэн буолуохтарын сөп.
Чинчийии түмүгүнэн, «Сиэрдээх Россия» партияттан биир мандааттаах кэскиллээх хандьыдааттар испииһэктэригэр Госдума депутата, СР Саха сиринээҕи салаатын лидерэ Федот Тумусов киирдэ.
Атын партияларга маннык 5 иһигэр киирбиттэринэн политическай «ыарахан ыйааһыннаах» Госдума спикерэ Сергей Нарышкин (ЕР, Ленинград уобалаһа), Госдумаҕа «Биир ньыгыл Россия» фракциятын салайааччыта Владимир Васильев (Тверь уобалаһа), вице-спикер Иван Мельников (РФКП, Москва), оборона кэмитиэтин бэрэссэдээтэлэ адмирал Владимир Комоедов (РФКП, Крым эбэтэр Севастополь) буолаллар.
Экспердэр сыанабылларынан, билигин Госдума 450 депутатыттан 148-һа (быһа холоон билиҥҥи ыҥырыы депутаттарын 33 бырыһыана) биир мандааттаах уокурукка талыллар баҕалаахтар уонна ситиһиилээх буолар чинчилээхтэр. Маныаха биир мандааттаах уокуруктар 40-45%-гар, политологтар бэлиэтииллэринэн, Госдума билиҥҥи депутаттара туруоруна иликтэр.
Госдума кэлэр, сэттис, ыҥырыытыгар быыбардар 2016 сыл балаҕан ыйын 18 к. булкаас системанан ыытыллыахтара: 225 депутат партийнай испииһэгинэн талыллыаҕа уонна 225 – биир мандааттаах уокуруктарынан.
Андрей Козлов.
