Госдума кэмитиэтин көһө сылдьар мунньаҕар бэлэмнэнии

Госдума федеративнай тутулга уонна олохтоох салайыныы боппуруостарыгар кэмитиэтин көһө сылдьар мунньаҕын 2016 с. бэс ыйыгар бэлэмнээн ыытыыга Ил Түмэн бэрэссэдээтэлэ Александр Жирков дьаһалынан оробуочай хамыыһыйа тэриллибитэ.
Бу хамыыһыйа мунньаҕар парламент вице-спикерэ, оробуочай хамыыһыйа бэрэссэдээтэлин солбуйааччы Ольга Балабкина, хамыыһыйа чилиэннэрэ: Ил Түмэн бэрэссэдээтэлин солбуйааччы Виктор Губарев, парламент сис кэмитиэттэрин бэрэссэдээтэллэрэ Василий Местников, Антонина Григорьева, Ил Түмэн аппараатын салайааччылара кытыннылар.
СӨ Ил Дарханын уонна Бырабыыталыстыбатын администрациятыгар Юрий Куприянов салалтатынан уопсай бырабыыталыстыба хамыыһыйата тэриллибит. Өрөспүүбүлүкэ уопсай хамыыһыйатын бастакы мунньаҕар депутаттар куорпустарын аатыттан Ольга Балабкина уонна парламент аппараатын салайааччытын э.т. Андрей Антонен кыттыбыттара.
Мунньахха оробуочай хамыыһыйа чилиэнэ Андрей Антонен кэккэ тэрээһин боппуруостарын таарыйда. Дьокуускайга Госдума депутаттара 2016 с. бэс ыйын 19 к. кэлэллэрэ сабаҕаланар. Вице-спикер Ольга Балабкина көһө сылдьар мунньах ис хоһоонун сырдатта.
Дакылааттары бэлэмнээһиҥҥэ чопчулуур ыйытыылары хамыыһыйа чилиэнэ, спикери солбуйааччы Виктор Губарев биэрдэ.
Тэрийээччилэр федеративнай тутул уонна олохтоох салайыныы боппуруостарыгар санааны атастаһыы сэргэхтик барарыгар эрэнэллэр. Онуоха Саха сирин парламеныгар ити боппуруостарга сокуону оҥорууга үтүө уопут баара бэлиэтэннэ.
Ил Түмэн бэрэссэдээтэлин бастакы солбуйааччыта, депутаттар оробуочай хамыыһыйаларын бэрэссэдээтэлэ Анатолий Добрянцев кэккэ сорудахтары биэрдэ.