849
21 августа 2015 в 12:07
Ил Түмэн дьокутаата быыбарга кыттыаҕа
Уус-Маайа улууһун киинэ Уус-Маайа бөһүөлэгин баһылыгын быыбарыгар аҕыс хандьыдаат илин-кэлин түсүһүөҕэ. Мантан үс хандьыдаат бэлитиичэскэй баартыйалартан турда. Кинилэр истэригэр билиҥҥи бэһис ыҥырыылаах Ил Түмэн дьокутаата, РФКП парламеҥҥа фракциятын чилиэнэ Ирина Енторова баар.
«Биир ньыгыл Арассыыйа» баартыйаттан «Уус-Маайа нэһилиэгэ» МТ дьаһалтатын баһылыгын эбээһинэһин быстах кэмҥэ толорооччу Дмитрий Томтосов, ЛДПР чилиэнэ Оксана Шубина быыбарга киирсиэхтэрэ. Кинилэри таһынан, быыбарга кандитатураларын бэйэлэрэ туруоруммут оскуола тириэньэрэ, предприниматель, быстах үлэтэ суох хандьыдаат, МУП дириэктэрэ, буҕаалтыр идэлээх 5 киһи баар.
Сүрүн күрэстэһии Дмитрий Томтосов, Оксана Шубина уонна Михаил Дьячковскай икки ардыларыгар барара сабаҕаланар. Томтосов баһылыыр-көһүлүүр баартыйа туруорбут киһитэ. Шубина ааспыт быыбарга куһаҕана суох түмүгү ситиспитэ, оттон Дьячковскай Уус-Маайа улууһун урукку баһылыга Александр Антипин саҕана, кини бастакы солбуйааччытынан үлэлээбит уопуттаах.
