853
21 августа 2015 в 17:51
Көмүстээх Алдаҥҥа
Алдан куоратын баһылыгын дуоһунаһыгар алта хандьыдаат хадьыктаһыаҕа. «Ньыгыл» Олег Бабичка уонна Жириновскай «мохсоҕоло» Валентин Семерковка түөрт «адьас көҥүл» хандьыдаат таһаҕас буолуохтара.
Өссө муус устарга ыытыллыбыт праймериз түмүгүнэн, «Биир ньыгыл Арассыыйа» баартыйаттан кыттыбыт 1500 киһиттэн ордук элбэх куолаһы Алдан оройуонун байыаннай хамыһаара Олег Бабич ылбыта. Соторутааҕыта ЛДПР эрэгийиэннээҕи салаатын салайааччыта Гаврил Парахин СИА-ҕа эппитинэн, кинилэр кытаанах харданы биэрэргэ бэлэмнэр. «Алдан өрөспүүбүлүкэҕэ улахан ыйааһыннаах куорат, — диир Гаврил Парахин, — онон охсуһуу уорааннаах буолара күүтүллэр. Биһиги хандьыдааппыт куһаҕана суох шанстаах. Ааспыт быыбарга кини иккис буолбута. Билигин кыайыыга кытаанах дьулуһуулаах».
Баартыйалартан турбут икки хандьыдаакка, бэйэлэрин бэйэлэрэ туруоруммут түөрт киһи – Алдан куорат билиҥҥи мээрэ Александр Бугай, предпринимателлэр Валентин Бянкин, Евгений Никонов уонна быстах үлэтэ суох сылдьааччы Павел Маслов туруулаһааччыларынан буолуохтара. Бу дьонтон Александр Бугай куорат дьаһалтатын баһылыгын дуоһунаһыгар уонтан тахса сыл үлэлээн кэллэ.
Балаҕан ыйын 13 күнүгэр өрөспүүбүлүкэҕэ муниципальнай тэриллиилэр быыбардара барыахтара. 103 поселениелар баһылыктара уонна 1029 муниципальнай тэриллиилэр бэрэстэбиитэллээх уорганнарын дьокутааттара талыллыахтара.
